JEREMIAH 27 - PATHIAN LEKHABU THIANGTHO (BSI)

Suak Ngawngkol ah Kipat Tepte’na Chu

¹ Judai gam ah Josiah chapa Zedekiah leng ahi lim lai in, zia thu hi Lalpa‘n a hun gen a:

² Zia gual hin Lalpa‘n ka kiang in a hun gen a: Thing ngawngkol leh a khau ding savun in siam inla, la ngawng ah awk in.

³ Judai gam ah Lengpa Zedekiah umna Jerusalem khua gam palai hungte khut in, Edom lengpa, Moab lengpa, Ammon lengpa, Tura lengpa leh Sidon lengpa kiang in thu thot in.

⁴ A puteu kiang chiat ah zia thu hi piaksak uh hen: Israelte Pathian, Sepai honte Lalpa‘n zia gual hin a gen hi: La puteu chiat kiang in zia thu hi la gen ding uh ahi, ti’n:

⁵ Ka thilhitheina nasa tak leh, ka khutbân jak in lei tawh a sung ah mihing hileh, sa chitinte hi ka la siam a; piak ding ah kilawm ka sakte kiang ah chun ka piak mai ahi.

⁶ Tu’hin, ka suak Babulon Lengpa Nebukadnezar khut in zia gam zosia hi tawh, a sung ah sa zosia hile ama nasêm ding ah ka piaksa a hi tai.

⁷ Ama lenggam a pûk hun a tun masang sia, nam zosia’n ama leh a chapa leh a tupa na sep piak in au; ziazaw chuleh vang, nam tam tak leh leng lopi takte chun suak in mang ta’n au.

⁸ Himaleh, Babulon Lengpa Nebukadnezar nasêm nuamlote leh, Babulon lengpa ngawngkol bât nuam lo chu, a khut ah ka sukmangthai zaw masang sia, zia nam chu chemjam, kial, natpi’n gawt ding ka hi, Lalpa‘n a tii.

⁹ Nanghaw’n vang, la jawlneiteu, la âisân thiamteu, la mang mat mi teu, la mi bum thiamteu leh la dawi thiamteu, la kiang ua, “Babulon lengpa suak in pang talojen in lau,” ti ah thu gente chu ngaitha kiu in.

¹⁰ La gam ua kipat gamla tak ah pui mang la hitheina ding ua, la kiang ua zuau thu a hun gen piak sek uh ahi ngal a; hun nawdok ing ka tin, mangthai ngei ngei ding la hiu.

¹¹ Himaleh, Babulon lengpa ngawngkol bât ah, a na sep piak nuam tapo chu, a gam chiat un nusia ing ka tin, a lou chiat uh kithaw in, hing in au, Lalpa‘n a ti ahi.

¹² Judai gam ah Lengpa Zedekiah kiang inle zia gual hin ka gen tai: Babulon lengpa ngawngkol bât unla, ama leh a mipite na chu sêm un la khawsau in.

¹³ Babulon lengpa na sêm nuam lo taphot chungchâng ah Lalpa‘n a la gensa gual ngei in, bang ding ah chemjamte, kialte leh natpite ah nang leh la mipite thi mai ding la hiu em?

¹⁴ La kiang un, Babulon lengpa na sêm kiu in, ti thu gen jawlneite chu ngaitha kiu in, la kiang ua zuau thu bep gen ahi ngal un.

¹⁵ Ka sawl lo sa sa’ ka min ah zuau thu a gen un, nanghaw leh la kiang ua thugentu jawlneite chu ka nawdaw ah mangthai gêl ding la hiziak in, Lalpa‘n a tii.

¹⁶ Ziaphatchun, thiampute tawh zia mipite zosia kiang ah hin hiti hin ka la gen ta’n: Lalpa‘n zia gual hin a gen hi: La kiang ua hung ah, “Babulon ah Lalpa In ah matchâk ûm leh bêlte chu puak tung kitpai hi’n a,” ti ah la kiang ua zuau thu hung gen, la jawlneiteu thugen haw chu ngaitha kiu in.

¹⁷ A thugen uh chu ngai kiu inla, Babulon lengpa na sêm un la khawsa tau in. Bang ding ah zia khawpi hi a hawm ah nutsia hi mai ding a hem?

¹⁸ Jawlnei dik tak hileu vang, Lalpa thu a kiang un um tak tak in tin, chutileh vang, ûm leh bêlte chu Lalpa In leh Judai gam ah lengpa In ah um zing ah, Jerusalem ah kipat Babulon lam ah puak mang hilo dingin, sepai honte Lalpa kiang in a la don ding a hiu a.

¹⁹ Sepai honte Lalpa chun zia khawpi nutsia ah um nalaite lak ah khuampite, tuikuang leh a tunna zosia tawh, ûm leh bêlte chungchâng ah zia gual hin a la gen ta’n:

²⁰ Babulon Lengpa Nebukadnezar in Judai gam ah Lengpa Jehoiakim chapa Jekoniah tawh, Judai gam leh Jerusalem khua milian leh lalte Babulon sal ah a pui mang lai ah, a puimangte chungchâng thu zia gual hin a la gen a:

²¹ Israelte Pathian, sepai honte Lalpa chun: Lalpa In leh Judai gam ah lengpa In leh Jerusalem ah ûm leh bêl nutsia ah a la um nalai zosia chungchâng thu zia gual hin a la gen a:

²² A leng un Babulon lam ah puak mang hi’n tiu in, amau ka hun kanthâk kit masang sia, zia tak ah chun um zing ta’n au, Lalpa‘n a tii. Ziazaw chuleh, keima’n puidok kit ing ka tin, zia mun ah hin tungding kit ding ka hi, ti in.