JEREMIAH 26 - PATHIAN LEKHABU THIANGTHO (BSI)

Tempul ah Jeremiah Thugenna

¹ Judai gam ah Josiah chapa, Jehoiakim lengpa vaihawm lim ah chun, Lalpa‘n zia thu hi a hun gen a:

² Lalpa‘n zia gual hin a hun gen a: Lalpa In huang sung ah dingin la, Lalpa In ah Pathian ho ding ah hung kuan, Judai gam sung ah khawpite zosia ah kipat hungkhawmte kiang in gen in; ka thu hun piak zosia chu a kiang un gen inla, thumal khat le la îm lo ding ahi.

³ A leng ua ka thu chu a ngai ua, a thil bawlkhial ziak ua, a chung ua thil phalo ka bawl guatna ziak ah, a nunchan phaloteu chu a haisan thei khâk uh leh.

⁴ A kiang un zia gual hin gen inla: Lalpa‘n zia gual hin a gen hi, ti’n: Ka thu ngai lo ah, la masang ua ka dan koite la zui lo ua,

⁵ la kiang ua thu gen ding ah kin tak ah ka hun sawl, ka suak jawlneite thugen haw la ngai lo ua leh vang, a la ngaisak lo hi maleu chinle,

⁶ ziaphat chuleh, zia In hi Shilloh gual in siam ing ka tin, zia khawpi hi lei chung nam zosiate hânsia dong in siam ding ka hi, ti in.

⁷ Thiampute, jawlneite leh mipite zosia chun, Lalpa In ah Jeremiah in zia thu a gente zosia chu a hechiat tau a.

⁸ Chun, mipite zosia kiang ah, Lalpa‘n thu a gen ding ah Jeremiah a piak zosia chu a gen zaw phatin, thiampute, jawlneite leh mipite zosia’n ama chu a man tau a, ka hun thalup ding uh ahi!

⁹ Bang ding ah Lalpa min ah, “Zia In hi Shilloh gual hung hi’n tin, zia khawpi hile a sung ah chêng umlo ah a hawm ah nutsia hung um ding ahi, la ti a hem?” a tiu a. Tichun, Lalpa In ah Jeremiah chu mipite chun a hun ûm tau a.

¹⁰ Judai gam ah vaihawmte’n zia thute chu a la het phat un, lengpa In ah kipat in Lalpa In ah a hung un, Lalpa In ah Kotpi Thak mun ah chun thutan dingin a hung khawm tau a.

¹¹ Ziaphatchun, thiampute tawh jawlneite chun vaihawmte leh mipi zosiate kiang ah chun, “Zia mipa hi a thitâk ahi, ama’n zia khawpi siatna ding thu hi a gen, la nakhang ua la het chiat gual un,” a tiu a.

¹² Ziaphatchun, Jeremiah in vaihawmte leh mipi zosia kiang ah chun, “Zia In leh zia khawpi chungchâng ah ka thugen la hetsau thute hi gen ding ah, Lalpa‘n ei sawl ka hi.

¹³ Ziaziakchun, tu’hin la umdan leh bawl dan zosiau kisiam phau in la, Lalpa la Pathian un a thugente hi mang un; chutileh, la chung ua siatna hung tung ding a la gendawsa zosia hi lamang dingin a lungthim hei danglam kit ziang ding ahi.

¹⁴ Kei ka hileh vang la khut ua um ka hi. Pha leh dik lasak dan dan un ei bawl mai un.

¹⁵ Lei thalup ua leh vang, nanghaw leh zia khawpi leh a sung ah chêng zosia hin, midik thisan sua la hiu ti vang kihiat tin ten un; a dik tak in, la nakhang ua zia thute hi hung gen ding ah Lalpa‘n ei sawl ka hi,” a ti tai.

¹⁶ Ziaphatchun, vaihawmte leh mipi zosiate chun, thiampute leh jawlneite kiang ah chun, “Zia pa hi a thi tâk lawm lawm ahi puai; Lalpa I Pathian uh min ah I kiang ua thu gen ahi ngal in,” a tiu a.

¹⁷ Chuleh, gam sung ah upate lak ah khenkhat chu hung dingdok in, mipi pungkhawmte zosia kiang in,

¹⁸ “Moreseth khua jawlnei Mikah in, Judai gam ah Lengpa Hezekiah dam lai in thu a gen a, Judai gam ah mipi zosiate kiang in: ‘Sepai honte Lalpa‘n zia gual hin thu a gen hi,’ a ti’n: ‘Zion chu lou gual ah kai hi’n a; Jerusalem khua chu ki’dak kipaikhawm vûm gual hi’ntin, tempul umna tâng le gammâng hung suak in a,’ ti in,” a tia.

¹⁹ Judai gam ah Lengpa Hezekiah tawh, Judai gam ah mipite chun a la that ziang sam awm? Lalpa chu lau in, Lalpa doisakna a dot ziak un a chung ua siatna tung ding ah a la gendawsa kha, Lalpa‘n a lungthim theng kit mai hilo a hem? Tu’hin, ei haw vang, I chung ua siatna huaisia tak tunsak ding I hitau hilam! a hun tiu a.

²⁰ Chuleh, midang pakhat Lalpa min ah thu gen, Kirjath-jearim khua Shemaiah chapa Uriah kiti kha a la um ah. Jeremiah thu gen gual gual in zia gam leh a khawpi siatna ding thu hi a la genlawk a.

²¹ Chuleh, Lengpa Jehoiakim tawh a sepai hangsan leh a siamângte’n a la het phat un, thalup a la guau a; himaleh, zia chu Uriah in a het phat in a lau ah, Aigupta gam lam in a taimang ta’n.

²² Ziaphatchun, Lengpa Jehoiakim in Akhbor chapa Elnathan tawh mi khenkhat Aigupta gam in a sawl a,

²³ Aigupta gam ah kipat in Uriah chu a vapuidok un, Lengpa Jehoiakim kiang ah a hun pui tau ah; ama chun chemjam in a satlum ah, a luang chu mipi vantang thanmual in a vui tau hi.

²⁴ Himaleh, Shaphan chapa Ahikam chun, Jeremiah a panpi ziakin, mipite thalup ding ah piakdaw in a um ta puai.