JEREMIAH 25 - PATHIAN LEKHABU THIANGTHO (BSI)

Babulon Saltânna Ding Genlawkna

¹ Judai gam ah Josiah chapa, Lengpa Jehoiakim a lal kum li’na chun, Jeremiah kiang in Judai gam ah mi zosia chung ah hung tung ding thu khat a hung tung a, (zia chu Babulon lengpa Nebukadrezar lal kum khatna ahi’n;)

² zia thu chu jawlnei Jeremiah in Judai gam ah mipi zosia leh, Jerusalem khua chêng zosiate kiang in a gen a:

³ Kum sawmni leh thum sung, Judai gam ah Amon chapa, Lengpa Josiah a lalna kum sawm leh thumna kipat tu’ni tiang hin, Lalpa‘n ka kiang ah thu a gen zing a; zia thu chu gunchu tak in la kiang un ka la gen ta’n; himaleh, nang un vang la ngaitha nuam puau hi.

⁴ Lalpa‘n a suak jawlnei zosiate kha gunchu tak in hun sawl zing maleh, la limsak nuam puau a, la nakhang uh le la daw nuam puau hi.

⁵ Amau in la kiang un, “Tu’hin la leng un la umchan phalo uh nusia in, la thil phalo bawl uh haisan un; chutileh, nanghaw leh la pu leh pateu kiang ah la kumkhua go ding ua, masang lai ah kipat a hun piakna gam ah hin um zing thei in lau;

⁶ pathian dangte nasep piak ding leh, ho ding leh la khut nasep ua ka lung a natna dingin chia mang kiu in. Chuti gual ah la um uh chun, hun gawt lo ding ka hi,” a ti sek un.

⁷ Chutisapi’nle, lei ngaisak nuam puau ah; tichun, la khutsuak thilteu chun ei sulungna’n, nang uh â ding ah thil phalo la kibawldaw ta zaw sek ui, Lalpa‘n a tii.

⁸ Ziaziakchun, sepai honte Lalpa chun zia gual hin a gen hi: Ka thu la ngai lo ziak un,

⁹ mallam ah nam um zosiate chu ko ing ka tin; ka suak Babulon Lengpa Nebukadrezar natiang, zia gam leh a kim a kiang ah nam um zosiate do ding hin hun pui ding ka hi; tichun, a leng un susia gawp dim dem intin, tichun, mite tizat leh eulau hung hi’n, kumkhua’n chavai ta’n au, Lalpa‘n a tii.

¹⁰ Chuleh, a lak ua kipat limna husa, kipakna thil git leh mo neipa aw hihen la, mo nu aw hitaleh, buhêkna khawl git leh thaumei vakna zosia naw mang ta’ng ka.

¹¹ Zia gam pumpi hi segawp in hawm suak ta’n tin; chuleh, zia namte hin Babulon lengpa na chu kum sawmsagi sung sep piak ta’n au.

¹² Kum sawmsagi a ti’n zaw phat leh, Babulon lengpa tawh, zia nam leh Kaldaite gam chu a khawlona ziak un gawt ding ka hi; tichun, a gam uh chu suchavai dik dek ding ka hi, Lalpa‘n a tii.

¹³ Zia gam chung ah chun, a chung ua tung ding ah ka la gendawsa, zia lekhabu a la kiziksa zosia, jawlnei Jeremiah in namtin chung ah thil tung ding a la gensa zosia chu hung guitung ta’n a.

¹⁴ Nam tam tak ah leng lopi tak tak te chun amau chu a suak ding un kisiam ta’n au; tichun, amau sep ga, a khut ua a sep uh tawh kiphutawk in a chung un thuk kit ta’ng ka.

Pathian Lungnatna Khawn Chu

¹⁵ Zia gual hin Lalpa, Israelte Pathian chun a gen ngal a: Ka khut ah kipat in zia ka lungnatna zuhâi hi la’n la, ka hun sawlna ding namte zosia chu dawnsak in.

¹⁶ A lak un chemjam ka sawl piak ding ziakin, zia uain chu dawn kham in, hoi dong dong intiu in, a lungthim uh mansua ta’n au, a ti’n.

¹⁷ Tichun, Lalpa khut ah hâi chu ka la ta’n; chuleh, Lalpa‘n ei sawlna gam ah namte chu ka dawnsak ta’n;

¹⁸ Jerusalem leh Judai gam ah khawpite, a lengteu leh a khawnbawlteu tawh, a leng ua a segawp leh a hawm ah nutsia a um ua, tu’ni a um gual ua, mite eulau leh hânsedawl ah siam in;

¹⁹ Aigupta Lengpa Pharaoh tawh a suakte, a milian leh lalte tawh a mipite zosia;

²⁰ nam dang tawh kichok-hel zosia tawh; Uz gam ah leng zosia tawh; Philistin gam ah leng zosia–Ashkelon, Gaza, Ekron tawh Ashdod ah um nalai sunte tawh;

²¹ Edom, Moab leh Ammonte tawh,

²² Tura lengte zosia, Sidon lengte zosia tawh, tuisuagiat pangjul gamte ah leng zosia tawh;

²³ Dedan, Tema, Buz leh tempul ah sam kimette zosia tawh;

²⁴ Arabia gam ah lengte zosia tawh, gamkeu ah chêng mipi kichok-hel zosia lak ah lengte zosia tawh;

²⁵ Zimri ah lengte zosia, Elam ah lengte zosia leh Media gam ah lengte zosia tawh;

²⁶ mallam ah lengte zosia, a gamla leh a nai tuam, a ban ban in, chuleh, lei chung ah khawvel lenggam zosia ka dawnsak tai. Ziate zosia chun a dawn zaw phat uh leh, Sheshak lengpa’n hun dawn in a.

²⁷ Ziazaw chun, a kiang un zia gual hin la gen ding ahi, ei ti’n: Sepai honte Lalpa, Israelte Pathian chun zia gual hin a gen hi, ti’n la: La lak un chemjam ka lênsak ding ziakin, dawn unla, dawn kham unla, lawdok unla, kipuk unla, thodok kit ta kiu in, ti’n gen a.

²⁸ Chun, la khut ah hâi ah um chu a dawn lo ua leh zia gual hin gen in: Sepai honte Lalpa‘n zia gual hin a gen hi: La dawn tei tei ding ahi! ti in.

²⁹ En un, ka min pu khawpi ngei ah siatna tung ding chu ka pan ta hen, bangti’n gawtna pêl thei ding la hem? Gawt lo in suakcha pua’n la; lei chung zosia ah chêngte chung ah tung ding chemjam chu ka ko ta’ngal in, sepai honte Lalpa‘n a tii.

³⁰ Ziaziakchun, nang Jeremiah in amau dodâlna thu zia zosia hi a kiang un, zia gual hin la vagen ding ahi: Lalpa chu chung lam ah kipat in a hung kiko in, a umna thiangtho ah kipat in a aw a hun sua hi; lei chung ah chêngte zosia do dingin, kul sung ah mite do in ngai tak in hung kiko intin, grep sûk ah kikote gual in kiko in a.

³¹ Lalpa‘n nam tinte chung ah lung damlo na a nei ziakin, a kiko husa chun lei kil zosia thawng pha hial in a; mitin chung ah vaihawm di’n a kisa’n, thiamlo chang taphot chu, chemjam in that in a, Lalpa‘n a tii.

³² Sepai honte Lalpa‘n zia gual hin a gen a: En un, siatna chu namtin chung ah, a ban ban in hung tung ding ahi; thigawpi hat tak leimun gamla pen ah kipat in, a hung hâng hi!

³³ Zia ni Lalpa‘n a thalupte chun lei mong langkhat ah kipat a tawp lam tiang lua in au. Sûn lo, chomkhawm lo leh vui lo in um in tiu in, mun tin ah êk denchek bang ta’n au.

³⁴ Nanghaw belampute haw, kap unla, kiu chuai chuai un; nanghaw gancha hon chung ah vaihawmte haw, leivui lak in kitâl puang un, nanghaw thalupna ding ni leh, thejak ah la umna ding uh nite chu, a hung tung tai; bêl doichuamte gual in um ta’n lau.

³⁵ Belampute jam mang thei pua’n tiu in, gan hon lak ah hotute suachâtna dingle um diak pua’n a.

³⁶ Katei! Belampute kâ thawm leh, gan hon lak ah hotute mau thawm chu ngai tiam u! Lalpa‘n a gan tatnau mun a suksiat piak ta’ngal a.

³⁷ Lalpa lungnatna huaisia tak ziakin, huang nuam tak te chule suksiat ahi tai.

³⁸ Sakeibaknei gual in a kua a hun nusia ta’n, a chemjam huhamna leh a hachang thakna huaisia tak ziakin, a gam uh chu a sia zo tai.