JEREMIAH 19 - PATHIAN LEKHABU THIANGTHO (BSI)

Bêl Kêksa Chu

¹ Zia gual hin Lalpa‘n a hun gen ah: Chia inla, lei bêl pakhat va chawn. Mipite lak ah upa khenkhat tawh, thiampute lak ah mi kumlui deu khenkhat le pui inla;

² Hinnom chapa phâijawl lam, Bêlhal kotpi ah chun pawtdok inla, zia tak ah chun ka thu hun hilte hi va puangjak in.

³ A kiang un zia gual hin vagen in: Aw, Judai gam ah lengte leh Jerusalem ah chêngte haw, Lalpa thu gen hi ngai un. Israelte Pathian, sepai honte Lalpa chun zia gual hin a gen hi: Zia mun chung ah hin siatna huaisia tak hun tunsak ding ka hi, zia thu he’pha tapo nakhang chu phawng in a.

⁴ Zia mite hin ei nusia in, zia mâichâm supolche ding ah amau leh a pu leh pateu leh, Judai gam ah lengte’n le a la het ngai lo uh, pathian dangte ho’na dingin thilpiakte a la lân ta’ngal un; chuleh, zia mun hi gitlona bei mite thisan ah a sukdim tâk ziak un;

⁵ chuleh, Baal kiang ah kithoina ding ah a chateu mei ah a hâlna ding un, Baal â dingin thoimualte chawl lo in a siam un, zia gual chu bawl dingin thu ka pepua’n, ka dan lak inle a pang kha pua’n, ka ngaituana’nle a um kha puai.

⁶ Ziaziakchun, zia mun hi Topheth, Ahiloleh, Hinnom chapa phâijawl, kiti talo ah, “Kithana Phâijawl,” a kiti’na ding hun chu hung tung pai ding a hitai, Lalpa‘n a tii.

⁷ Zia mun ah hin Judah leh Jerusalem ah chêngte thil guanggal chu bangmalo sua ing ka tin; tichun, a mêlmateu chemjam ah tha sak in, a hinnau hawlte khut in pedok ding ka hi. A luang damsau chu chunglêng vachate leh gam sate an dingin pia ta’ng ka.

⁸ Chun, zia khawpi hi tizat um tak leh etzaw umlo tak in siam ing ka tin; a haw kha tapo in a siatnau huaisia tak ziak ah tiza’n, eulau khum chiat ta’n au.

⁹ Tichun, tha chimit ding ah a ûm kîmvêl ua, thi ding lau ah a kisêlna lam un, a chapateu leh a chanuteu saphe nêksak in, mitin in a Invêngteu saphe chiat kinêk tuasak ding ka hi tai.

¹⁰ Chun, a hun kitonpite mu’na’n lei bêl chu khen phel inla,

¹¹ a kiang un zia gual hin gen in: Sepai honte Lalpa chun zia gual hin a gen hi: Siamphat kit thei tâk lo ding ah lei bêl khet phel ahi gual in, zia mipite leh zia khawpi hi susia ding ka hi. Topheth mun ah chun mithi vuina ding mun awng talo ding khop in, mithi kivui ta’n au.

¹² Tichun, zia mun leh a sung ah chêngte zosia tawh, zia khawpi hi Topheth gual in siam ding ka hi, Lalpa‘n a tingal a.

¹³ Jerusalem ah In zosia, Judah lengte In zosia leh, van lam thilte ho’na ding ah thilpiakte lân ah, pathian dangte kiang ah dawnchi thillat butthâkna In zosia pum in, Topheth mun gual hial in sukbuak in hung um ta’n a.

¹⁴ Chuleh, Lalpa‘n thu gen ding ah a sawlna mun Topheth ah kipat in, Jeremiah chu hung in, Lalpa In huang sung ah dingin, mipite kiang ah chun a gen ta’n:

¹⁵ Sepai honte Lalpa, Israelte Pathian chun, zia gual hin a gen hi: A lung uh hikhau ah, ka thugen a ngai talo ziak un, zia khawpi leh a khawpel zosia chung ah siatna tung ding ah ka la genlatsa zosia kha, a chung un hun tunsak ding ka hi tai, a tii, ti in.