JEREMIAH 17 - PATHIAN LEKHABU THIANGTHO (BSI)

Judah Gitlona leh A Gawtna

¹ Judah gitlona chu thik kawlom, a mûk ah suang mantam zum ah zik a hi’n; a lunggil suangpêk leh a mâichâm ningbawk ah chun sutkuak ah zik ahi;

² a tu leh chateu in thingbul tin leh mualvum tincheng leh, gamlak tincheng ah a mâichâmte uh leh a dawikhuamteu chu a hezing ngal un.

³ La gam pumpiu ah la hausaknau zosia tawh, la go thil nei zosiau chu, la gitlo man un gâl lâk sum ah midangte hun chom nâmsak ding ka hi.

⁴ La gochan ding ah ka hun piaksate zosia khale, nangmau gitlona ziakin mansua in la tiu in; tichun, la het ngai lo gam ah chun la gâlteu nasêm in hung pang ta’n lau; ka lungnatna mei, kumtuang ah hun kâng zing ding chu sêm kuang ahi ta’ngâl a.

⁵ Lalpa‘n zia gual hin a gen hi: Mihing muang ah, mihing hatna kisuanpi ah, a lungthim ah Lalpa nusiate chu, hânsia dong in um uh hen.

⁶ Gamkeu ah hampa buk gual a hiu a, thilpha him him mu pua’n au. Chi pianna gam gual ah gam gawchâk, kuama chên lo’na mun ah chun chêng in au.

⁷ Lalpa chung ah kinga leh, Lalpa bep suangte chu mi hampha a hiu.

⁸ Amau chu tui kiang ah thing kiphu ah, a zungte lui pang ah jam lut gual chu a hiu hi. Khua a hung lum ding lau pua’n tiu in, a duate chule hing zing in a; khawkhâl kum inle lungkham lo in, gâ lo tik a nei puau hi.

⁹ Mihing lungthim chu thil dang zosia sâng in a sezaw’n, chinchan bei a hiziak in, kua a hem hethiam thei ding?

¹⁰ A umdan dungzui ua thuk ding leh, a nasep gau tawh kigûn ah pia ding in, keima Lalpa hin lungthim chu patep in, ka enchian zing ahi.

¹¹ Diklo tak ah hausakna kholkhawmte chu, vavêng ama tui hilo opkeu gual a hiu ah; a khangdawng lai un ama chu nusia intiu in, a tawp phat leh a ngolnau kilang ta’n a.

¹² Aw, lal chutpha lopi, a lim ah kipat choisa’n ah um leh, I mun thiangtho uh umna ngei tak chu aw!

¹³ Aw Lalpa, Israelte kinepna! Nang hun nusia zosia mualpho in au; nang hun nusia tapo chu, nuaimi lam ah tepte hita’n au; amau in hinna tuikhuk Lalpa chu, a nutsia tak ziak un.

Jeremiah Pauchapna

¹⁴ Aw Lalpa, ei hi’dam in, chutileh, dam thiang ding ka hi; ei hukdam in, chutileh, hukdam hita’ng ka; ka pâkchat chu nang la hi’ngâl a.

¹⁵ En tiam in, ei hosiat dan uh hi: “Lalpa thu chu khoi ah um a hita em? Hung guitung ziang leh hiding a!” a tiu a.

¹⁶ Himaleh, nang â ding ah belampu ka panna kipat in, ka tai mang pua’n, a siatna ding uh ni chu, hung tung leh le ka ti diak puai. Ka kam ah bang gual thu hung pawt ahi em ti ka hia’n; la mit mu in a kichian ngâl a.

¹⁷ Kei â ding ah tizat um hung hi kin; siatna hun ah ka kisêlna la hi’ngâl a.

¹⁸ Ei gawt gentheite mualpho uh hen la, kei vang ei mualphosak kin; amau chu lungdong uh hen la, kei vang ei lungdonsak kin. A chung un siatna ni tunsak inla, a le’ni in siatna tunsak in!

Sabbath Mat Thiantho Ding

¹⁹ Lalpa‘n zia gual hin ka kiang in a hun gen a: Chia inla, Judai gam ah lengte lut leh pawtna, Nam tinte Kotpi leh Jerusalem ah kotpi zosia ah chun vagen inla,

²⁰ a kiang un: Judai gam ah lengte leh, Judai gam leh Jerusalem khua chêng zosia, zia khawpi lutna zosiate haw, Lalpa thu hi a la ngai tiam un.

²¹ Lalpa‘n zia gual hin a gen hi: La hintheina ding un, kuama’n sabbath ni’n Jerusalem kotpi ah hin van-gik la puak lut lo ding uh ahi.

²² Chuleh, kuama’n sabbath ni chun la In ua kipat van-gik pawdok kiu inla, na’le sêm kiu in; la pu leh pateu kiang ah thu ka la piak gual khan sabbath ni chu chang thiangtho zaw tau in.

²³ Chutisapi’nle, la pu leh pateu khan a la ngaisak nuam puau ah; a lung uh hi’tâk in, a la ngaisak nuam lo in, ka hilna thu a mang puau hi.

²⁴ Lalpa‘n zia gual hin a gen a: Himaleh, ka thu la ngai ua, sabbath ni zia khawpi sung ah hi bangma la hun puak lut lo ua, sabbath ni chu chang thiangtho ah, na bangma la sep lo uh chun,

²⁵ zia khawpi kotpite ah hin David lal chutpha kitung ah, sakol leh kângtalaite chung ah chuang in, amau tawh, a milian leh lalteu tawh, Judai gam ah mipite tawh Jerusalem ah chêngte zosia chu, lut leh pawt in vak lumlet intiu in; zia khawpi hi kumkhawtuang in chên zingna hi’n a.

²⁶ Ziaphat chuleh, Judai gam ah khawpite ah kipat leh, Jerusalem kiang vêl ah mun zosia kipat, Benjamin gam ah kipat, Shephelah ah kipat, tâng gam ah kipat leh Negeb lam ah kipat in hâlmang kithoinate leh kithoinate, thâi thillat dingte leh gimtuite hun chawi in, Lalpa In ah hin kipakna thilpiakte hun chawi khawm ta’n au.

²⁷ Himaleh, sabbath ni changthiangtho ah, Jerusalem kotpite ah van-gik puak lut lo ding ka tite chu la ngailo ua leh vang, a kotpite ah chun mei sêmkuang ding ka hi; zia mei chun, Jerusalem ah lal Inte chu kâng tum intin, phelmit hita pua’n a.