JEREMIAH 16 - PATHIAN LEKHABU THIANGTHO (BSI)

Jeremiah Ji Neilo Etsakna

¹ Lalpa‘n ka kiang in thu a hun gen a:

² “Zia tak mun ah hin ji la nei lo ding, chanu chapa le la nei lo ding ahi,” ei ti’n.

³ Zia mun ah piang chate zosia leh, zia gam ah cha hing nu leh pate zosia kiang in, Lalpa‘n zia gual hin a gen ngal a:

⁴ “Natna tizat um tak thuak in thi ding la hiu. Kuama’n sûn pua’n tiu in, vui le vui pua’nau; tichun, lei tual ah ki’dak buaksia gual bep in muat in au. Kido’na chemjam leh kial in that intiu in, a luangteu chu chunglêng vachate leh gamlak sate’n ne ta’n au,” ti in.

⁵ Lalpa‘n zia gual hin a gen a: lusûnna In ah lut kin la, a sûn ding inle chia kin la, amau ziak inle lungkham him him kin; zia mite lak ah kipat hin ka thamuanna, ka ngilneina leh ka lainatnate chu ka lakmang ahi ta’ngal a, Lalpa‘n a tii.

⁶ Zia gam ah milian leh mineu chule thi gêl intiu in, vui hipua’n tiu in, kuama’nle sûn pua’nau; amau thi ziakin kuama ki-âtliam leh sam metkol le um diak pua’nau.

⁷ Kuama thisûnte thamuanna ding ah vaithum lui piak um pua’n a; chuleh, a nu a hem, a pa a hem sûnte thamuanna dinginle thingpi no khat ziang le kuama’n dawnsak pua’nau.

⁸ Luaithe’na In ah le, amau tawh ne leh dawn dingin la chia lo ding ahi.

⁹ Israelte Pathian, sepai honte Lalpa‘n zia gual hin a gen ngal a: La damsung un la mit muu in, limna husa, mo lopna, mo thâkna leh kipakna husa him him zia mun ah kipat hin suthip ding ka hi.

¹⁰ Chun, zia thute hi mipite kiang ah la gen phat leh, amau in, “Bang ding ah Lalpa‘n ka chung ua siatna zia gual tuk ah huaisia hung tung ding chu a gen ah a hem? Bang a hem ka khawlonau? Lalpa ka Pathian chung ua ka bawl khial uh bang a hem?” ti ah a hun gen phat ua leh,

¹¹ a kiang un zia gual hin la gen ding ahi: “La pu leh pateu in ei nusia in pathian dang zui in, a na sêm in, a la ho tau a; keima ei taisan in, ka dante le a zui ta puau hi, Lalpa‘n a ti’n;

¹² la pu leh pateu sâng ah sezaw’n la hung um nalai un, la leng un zia tak ah hin ka thu ngai lo in, la doinau phalo tak chu lu’lul tak in la zui tei tei nalai ui.

¹³ Ziaziakchun, zia gam ah kipat hin hun sepdok ing ka tin, la pu leh pateu leh nang unle la het khak lo gam ah chun, a sûn a jan in pathian dangte na chu sêm ta’n lau, doisakna him him hun nei talo ding ka hi’ngal a,” ti in.

Pathian in Israelte Tungding Kit Ding ahi

¹⁴ Aigupta gam ah kipat Israelte puidokpa Lalpa chu a hin nâk leh, ti ah kitiamna um tâk lo’na ding nikhua chu hung tung intin,

¹⁵ mallam ah kipat leh gam tin ah thejakna kipat Israel mipite hun pui khawm kitpa Lalpa chu a hinnâk leh ti’na hun hung tung ding a hi. A pu leh pateu kiang ah piak ka la tiamna, a gam ua chun hun pui tung kit ding ka hi’ngal a, Lalpa‘n a tii.

¹⁶ Tu’hin, sanga mante tam tak hun sawldok ing ka tin, amau chu va man khawm in au; ziazaw chuleh, gamvâk mi tam tak le sawldok ing ka tin, amau chun tâng tin leh mual tin ah kipat leh kawl suangpi kikâl ah um natiang in hun man khawm sik sek in au, Lalpa‘n a tii.

¹⁷ Ka mit in a um dan zosiau a mu suak ah, ka mu lona ding ah sêl mang thei ahi puau ah, a khawlonateu chule ka mulo ding ah sêlgûk thei a hipaw ngal a.

¹⁸ A milim ki’dak um takteu luang chun ka gam a pum ah a la sukpolche tak ziak uh leh, ka gochan chule a ki’dak umnau ah a la sundim tak ziak un, a khawlonau leh a gitlonau chu a le’ni in thuk ding ka hi.

¹⁹ Aw Lalpa, ka hatna leh ka kulpi, buai lai ah ka kisêlna; kawl kîmvêl ah kipat namtin hung khawm in, la kiang in: Ka pu leh pateu in zuau thu leh, thil manlote tilo ngal, bangma a la lemlaw puau hi.

²⁰ Mihing in amau â dingin pathian a kisiam thei ua a hem? Zia haw chu pathian ahi talojen hi!

²¹ “Ziaziakchun, amau hil ding ah ka chia tei tei ding ahi; tu chung ah hin, ka thilhithei dan leh ka hat dan hil ding ka hi; tichun, ka min chu Lalpa ahi ti he ta’n au,” ti in.