JEREMIAH 15 - PATHIAN LEKHABU THIANGTHO (BSI)

Gawtna Pumpel Theilo Ding

¹ Ziaphatchun, Lalpa‘n ka kiang in: Mosi leh Samuel, ka ma-âng ah hung ding hial ziang leule, zia mipite lam ah hin ka lungthim chu kihei diak ta pua’n a. Ka muphâk lona del mang unla, chia mangsak un!

² Amau in la kiang ah, “Khoi lam ah chia ding ka hiu em?” a hun ti phat ua leh a kiang un, Lalpa‘n zia gual hin a gen hi, ti’n la: “Natpi’ thi ding ah guat ah umte chu, natpi’n thi’n tiu in; chemjam ah thi ding ah guat ah umte chu, chemjam ah thi’n tiu in; kial ah thi ding ah guat ah umte chu, kial in thi’n tiu in; sal ah tâng ding ah guat ah umte chu, sal ah tâng ta’n au,” ti in.

³ Chuleh, amau susia dingin thil pali a chung un guat ding ka hi, Lalpa‘n a tii. A that dingin chemjam, a kai mang dingin uichate; chuleh, amau that ah ne zo dingin chunglêng vachate tawh lei ah gam sahângte haw hi.

⁴ Hezekiah chapa lengpa Manasseh in Jerusalem ah a thilbawl ziak in, lei chung lenggam zosiate tizat dingin amau chu hun siam ding ka hi.

⁵ Aw Jerusalem, kua’n hun lainat a, kua’n hun sûn ding ahi tam? Kua’n hung kihei ah la chanchin, hung kan ta ding a hem?

⁶ Keima lei la pom lo ziakin, la kinungle kit tai, Lalpa‘n a tii; ziaziakchun, nangma do dingin, ka khut lâmdok in ka hun hi’mang tai; kisûm zo talo ka hi.

⁷ A umchan uh a khiam lo ziak un, gam sung ah kotpi bul tincheng ah, bu vokna mol ah vua’n ka thîtchil tai; a cha leh nauteu ka sûn sak ta’n, ka mipite chu ka that gam tai.

⁸ A meithâiteu chu tuisuagiat pang ah, piaunêl sâng in a tam zawu ah; sunchang lai ah a khanglaiteu that ding mite ka hun sawl in, a chung ua patauna leh, dip dapna phutlo in ka tunsak tai.

⁹ Cha sagi neinu chu hatsam ah chausia’n, a hat lâk ding bep a buaipi tai; sûn lai tak in a nisa chu a tum tai; zakcha leh mualpho tak in a um tai. A dang cheng chu a mêlmateu âng ah chemjam ah, thalup dingin pia ta’ng ka, Lalpa‘n a tii.

Jeremiah’ Lalpa Chung ah A Phunna

¹⁰ Gam sung pumpi mi zosia kinakpi ding leh kinialpi ding ah ka nu’n ei la hin mai hi chu aw! Ka chung a gik na e! Kuama bat ding in ka pia ngai pua’n, kuama â le ka ba ngai diak puai; himaleh, a leng un hânsia ei law khum tho tho ui.

¹¹ Lalpa‘n zia gual hin a gen hi: La phatna dingin la hinna ka hun sukha, la buai lai leh la lungjin lai in la chung ah la mêlma dingte ka hun guat khum ahi.

¹² Mallam ah kipat thîk hung kuandok chu thîk leh sum-eng chun thiakbong zo ding ahi em?

¹³ La chênnau gam zosia hin, la gitlonau zosiate ziakin la hausaknau leh la goteu chu a thawn in gâl lâk dingin pedok ding ka hi.

¹⁴ La het ngai lo nau gam ah chunle mêlmate nasêm in hun pan sak ing ka; ka lungnatna mei chu a kuang ta’ngal a; zia mei chun hun kâng zing ta’n a, ti in.

¹⁵ Aw Lalpa, nang in la hei, ei hezing inla, ei hung kantha’n; ei sugentheite chung ah phuba ei hung lâkpiak in. La thok-hatna ziakin ei lamang kin; nangma ziak ah hosiatna thuak ka hi ti hia’n.

¹⁶ La thute chu mudaw a hita’n, chuleh, ka ne ta hen; tichun, la thute chu kei â ding ah, limna leh ka lungthim kipakna a hung hi. Aw Lalpa, sepai honte Pathian, la min ah ko ah um sek ka hi’ngal a.

¹⁷ Nunnop bawl mite lak in ka kichu pua’n, ka limpi diak puai; la khut delgikna nuai ah kei ngen in ka kichu sek a, nang in lungkim lona’n lei sungdim ta’ngal a.

¹⁸ Bang a tia ka natna chawl lo ah, ka beliam dam theilo ah, dam ding gaw lo hial ahi tam? A dik tak in, nang hi kei â dingin tuisam guam, a tui bei pai gual ah, ei thêm mai mai la bang hi.

¹⁹ Ziaziakchun, Lalpa‘n zia gual hin a gen hi: La hung kit leh hun la kit ing ka tin, ka âng ah ding di la hi. La kam ah thu manthei lo gen lo ah, thugun tak tak la gendaw chun, ka sik ah thugen in pang inla. Amau chun la kiang hun zuan intiu in, nang in vang amau kiang zuan pua’n la.

²⁰ Chuleh, zia mipite â ding ah hin, sum-eng ah kulpi kibawl, detdo tak gual in hun siam ing ka; hun do intiu in la hun zo pua’n au; nang hun hukdok ding leh hukdam dingin, ka hun umpi zing ngal a, Lalpa‘n a tii.

²¹ Mi nunsiate khut ah kipat hun hukdok ing ka tin, khawksak beite mat phâk lo dingin, hun hukdok ding ka hi.