JEREMIAH 14 - PATHIAN LEKHABU THIANGTHO (BSI)

Khawkhâlna Huaisia Chu

¹ Khawkhâlna hung tung ding chungchâng ah Lalpa‘n Jeremiah kiang ah a thugen chu:

² Judai gam in a sûn in, a kul kotkhak teule a ngui zo tau a; lungkham in lei tual in a kizam un, Jerusalem kâ thawm chu a chia to tai.

³ Miliante’n tui khai dingin a suakteu a sawl un, tuikul a va tung un, tui a la kang ta’n; a tui bêl uh a ngawn in a hun le’puak kit tau hi. A zak uh a cha ta’n, lungdong tak in puan a kilukhu tau a;

⁴ gua zuk lo ziakin lei a khikêk ta’ngâl a. Gua a zuk lo ziak ah loubawlte lungthuai in, puan a kilukhu tau hi.

⁵ Sazukpi natiang inle hampa umlo ziakin, a no gamtalai lak in a nusia tai.

⁶ Gam sabiltungte le tâng sip zum ah, si-al gual ah hui dong in a ha dup dup tau a; a nêk ding uh hampa hing umlo ziakin, a mit uh a chau hial tai.

⁷ Ka khawlonateu in ei hêk zing maleh, aw Lalpa, la min ziakin ei panpi inla; ka nungtolnau a tam ma ma’n, la chung in ka la hi’khial zo tau hi.

⁸ Aw Israelte kinepna, a buai hun si’n ua leh hukdokpa chu la hi. Bangtidan ah zia gam ah hi khualzin, jan khat bep giak gual ah um la hi em?

⁹ Bang ding ah bawl ding dan he talo mi gual leh, gâlhangsan mi panpi’na ding a, thagum sua thei talo gual a, um ziang la hi em? Hizianglehle, Lalpa, nang ka lak un la um ngâl a; chuleh, la min ah ko in ka um sek ngâl un, ei nusia kin!

¹⁰ Zia mite chungchâng ah hin Lalpa‘n zia gual hin a gen hi: Vâkmang a nuam tun tun un, a kengteu chu a thunun zo puau hi; ziaziakchun, Lalpa‘n a pom ta pua’n, tu’hin a nunsiatnau hezing in, a gitlonateu ziak ah chun, hun gawt ta’n a.

¹¹ Ka kiang ah Lalpa‘n zia gual hin a gen hi: Zia mipite hi a phatna ding un pauchap kin.

¹² Anngawl in pauchap maleu le, a dotnau ngaitha lo ding ka hi; hâlmang thilpiak leh thâilat thilpiakte hun lân maleule a la pom lo ding ka hi; himaleh, chemjam a hem, kialna a hem leh natpi a hem in a leng un hi’mangthai ing ka, ti in.

Jawlnei Lepchiate Paithâkna

¹³ Ziaphatchun keima’n, “Katei, Lalpa Pathian! Zia tak ah jawlneite hin a kiang un: Kidona chemjam chu tuak pua’n la tiu in, kialna le tuak lo in zia mun ah hin thamuang tak in um ding la hiu, a tiu a,” ka ti’n.

¹⁴ Chuleh, Lalpa‘n ka kiang in, Jawlneite chun ka min in zuau a gen un; amau chu ka sawl pua’n, a kiang ua thu vagen dinginle ka guat puai. A lungthim ua a mithep nopna ziak un, bangma a mulopiu leh Pathian in a hiatsak hilote chu a gen zawu ahi.

¹⁵ Ziaziakchun, ka sawl lo ah ka min ah thu gen sek, jawlneite chungchâng ah zia gual hin Lalpa‘n a gen ah; amau chun la: “Zia gam sung ah hin kido’na chemjam leh kialna hung tung lo ding ahi,” a tiu a. Kido’na chemjam leh kialna ziakin zia jawlneite chu that gam ding ka hi.

¹⁶ A kiang ua a thu gennau mipite chu Jerusalem khawlai ah paidok ing ka tin, kialna leh kido’na chemjam in that ta’n au. Amau vui ding a lak un, a jiteu, a chapateu leh a chanuteu ziang le um ta pua’n au. A nunsiatnau a chung un buntha ding ka hi ta’ngâl a.

¹⁷ Zia thu hi a kiang ua la vagen ding ahi: Chanu thiangtho, ka mipite ngei chu, khetbûk ah jep pâi in a um un; beliam huaisia tak a nei tâk ziak un, a sun a jan chawlnga lo in, ka mitthi tuite chu luang ta hen.

¹⁸ Gamlak ah chia leng, chemjam ah thite mu’ng ka tin, khawpi sung lut leng, kial thuak ah nat thuakte mu ding ka hi! Jawlnei hi’n, thiampu hitaleh, gam pumpi’n amau lawkna ding bep hawl in, a vak vêl vêl un, hetna him him a nei puau hi.

Mipite Ja’ngaina Dotna

¹⁹ Judah chu la nol kei ziang ahi tam? La lungthim in Zion chu ki’dak ziang la hi tam? Kei uh â ding ah sukdam zaw hi talo ding ah, bang ding ah ei vaw pâi la hem? Muanna ka hawl un ka mu puau in; damna ka hawl un tizatna ka mu zaw tau hi!

²⁰ Aw Lalpa, ka pu leh pateu gitlona tawh, la chung ah ka thilbawl khialnateu hia’n, ka nunsiatnateu ngaidam ka hun don ui.

²¹ La min ziakin ei pâmpai kin la, la lopina lalchutpha hi sumualpho kin; ka kiang ua la thuthung kha hezing inla, botsia kin.

²² Nam dangte milim pathiante chun gua a zuksak thei awm? Ahiloleh, vante chunle, gawnêl a kaisak thei awm? Aw Lalpa ka Pathian uh, nangma bep hilo maw? Zia thil zosia bawlpa chu nangma la hiziak in, la chung ah kinepna ka nga tau ahi.