JEREMIAH 13 - PATHIAN LEKHABU THIANGTHO (BSI)

Puan malngat Dialchen Etsakna

¹ Zia gual hin Lalpa‘n a hun gen a: “Chia inla, puan malngat ah kibawl dialchen vachaw’n la, la kawng ah chêng inla, chuleh, tui ah dia kin,” a ti’n.

² Tichun, Lalpa‘n ei gen gual ah chun dialchen chu ka vachaw, ka kawng in ka chêng tai.

³ Lalpa‘n a niveina dingin ka kiang in thu a hun gen kit a; ka kiang in,

⁴ “La dialchen chawk, la kawng ah la chên kha chawi inla, Euphrates luipi’ chia inla, zia tak ah suang kêk kâl khat ah chun vasêlgu’n,” ei ti’n.

⁵ Tichun, ka chia a, Lalpa thu ei piak dungzui ah chun Euphrates luipi pang ah chun ka vasêlgû tai.

⁶ Ni tamkhop zaw phatin Lalpa‘n ka kiang in, “Tu’hin Euphrates luipi lam ah chia inla, zia tak ah dialchen sêl in ka ti kha vala kit in,” ei hun ti’n.

⁷ Ziaphatchun, Euphrates luipi’n ka vachia ah, ka dialchên sêlgûk kha puaidok in, ka vala kit ta’n. Ahi’n, tu’hin zia dialchên chu a la ngot ta’n, a mat tâk ta puai.

⁸ Ziaphatchun, Lalpa‘n ka kiang in thu a hun gen kit a.

⁹ Lalpa‘n zia gual hin a hun gen a: Zia dialchên gual ah chun Judah kisak theina leh Jerusalem kisak theina huaisia tak chu susia ding ka hi.

¹⁰ Zia mipi gilote, ka thugen ngai nuam lo, amau nop dan lochal tak ah zui ah, a na sep piak ding ah pathian dang zuan ah vabia te chu, zia dialchên puan gual ah hin, bangma mat theilo ding ah sia gual hin hung um ta’n au.

¹¹ Dialchen chu kawng ah a be zing gual ah Israelte leh Judate chu le keima ah bek zing ah, keima â ding ah mipi, ka min chawi ding leh ka lopina ding ah ka siam a hiu a; himaleh, ka thu a ngai nuam puau hi, Lalpa‘n a tii.

Uain Thawl Etsakna

¹² A kiang un zia thu hi la gen ding ahi: Israelte Pathian, Lalpa‘n zia gual hin a gen hi ti’n la: Uain thawl zosia chun uain thun dim un. Ziaphat chuleh, amau haw chun, “Uain thawl zosia chu uain ah sun dim hung hita ding ahi helo dingin lei gingchau ah a hem?” ti’n au.

¹³ Ziaphat chuleh, a kiang un, “Lalpa‘n zia gual hin a gen hi: Zia gam ah chêng zosia, David lalchutpha kichu lengte hileh, thiampute leh jawlneite zosia tawh Jerusalem ah chêng zosia hi tawh, uain hun dawn khamsak ding ka hi;

¹⁴ chuleh, amau chu kisuktua sak ing ka tin, nu leh pa chu a chateu tawh, ti’n Lalpa‘n a gen hi. Amau ka suksiat phat leh lainatna nei pua’ng ka tin, khat chale hawi lo ding ka hi, ti’n vagen in,” ei ti tai.

Saltângte Vauna

¹⁵ Ngai unla, hiau in, chapo kiu in, Lalpa‘n a tii.

¹⁶ Thimna a hun tunsak ah, phalvak ah mualte ah la keng uh la kisui masang un, Lalpa la Pathian uh chu choihoina piau in; vâk la hawl lai un ama’n lungjinna leh, thimpi a hun suaksak ta hi.

¹⁷ Himaleh, la ngaithâk lo uh chun, la chaponau ziakin ka thagau a gûk in kap ding ahi; Lalpa belam honte sal ah pui mang ah a um ziak un, ka mit chu thasia tak ah kap in, mitthi tui in luangtha’n a.

¹⁸ Lengpa leh lengnu kiang in, “Kingainiamna chutna’n kitung un; la luchang ua kipat lal lukhuk mêlpha tak chu, lâkthâk hiding ahi ta’ngal a,” ti in.

¹⁹ Negeb ah khawpite chu, a hong ding mi umlo in, a kikhak suak tau a; Judai gam ah mi zosia, a leng un sal ah pui mang hita’n au.

²⁰ La mit uh teto unla, mallam ah kipat hung kuante chu en tiam un. La belam hon hoi tak, nang kiang ah hun kipia kha, khoilam tung zo a hitau em?

²¹ La kithuapi ding ah la zil thiamsak te, la chung ah thunei ah a hung pan phat ua leh, bang la gen ta diam? Numei nauvei gual ah nat in, hun tuam suak talo ding a hem?

²² La lungthim in, “Ziate hi bangtidan ah, ka chung ah hung tung ta mai a dia aw?” la tiu ahi chun, la nunsiatna a huaisiat ziak ah, la nîk kihawk piak ah, sukthanhuai la hi chulam.

²³ Ethiopia mi chun a vun uh theng in, gialbem inle a ziau a theng thei awm? Chuti ahileh, nanghaw thil phalo bawl zongsakte hinle, thil pha bawl thei tho ding la hiu chulam.

²⁴ Gamkeu ah busi hui in a tawmang gual in, hun the thâng ding ka hi.

²⁵ Keima ei hemil in zuau thu la taksan zawk ziak un, zia chu la âi ua kia, keima ah kipat la chanvo ding ua ka guat piak chu ahi, Lalpa‘n a tii.

²⁶ Keima ma’n la nîk uh, la maichang tiang un hun hawkdaw piak ing ka tin, la zachatnau chu mu hita’n a.

²⁷ Gamlak tâng chung tin ah la thanghuainateu, la ângkawmnate leh la hûk hâm gite leh, ja lam helo ah la kizoknate chu, ka mu suak hi, Aw Jerusalem, la chung a gik na e! Sukthian la hi’na ding chu, bang chan hi nalai ding a hem?