JEREMIAH 12 - PATHIAN LEKHABU THIANGTHO (BSI)

Pathian Chung ah Jeremiah Phunnawina

¹ Aw Lalpa, ka hun awimaw guat leh le, nang chu la dik him him hi; ahi’n la, kadot nop pakhat hun dong ing ka. Bang ding ah migilo lamzang a hem? Bang ding ah dawha phalo mite zosia, khangto sek a hiu em?

² Amau chu la phu ah zung kai a hiu a, a hung khanglian un, ga a hun suau a; a lungthim uh tawh kigamla ma lechin, a kam uh tawh kinaicha’n la um zing hi.

³ Himaleh, aw Lalpa, nang in lei hia’i. Ka lungthim in a hun nai zing hi ti la mu chian a, lei patep ta ahi. Amau chu belam thalup ding gual in kaidok inla, a kithana ding ni ngâk in koichuam ta’n.

⁴ Gam in bang chan sûn ah, gamlak hampa zosia bang ding ah vuaitha ding a hiu em? A sung ah chêngte nunsiat ziak leh, a gam ah mipite’n, “I um dan uh ei mu puai,” a ti ziak un, gam sate leh vachate zosia, phiatnâm a hitau hi.

Pathian in Jeremiah A Dawnhuna

⁵ Keng ah taite bawn la kitaitêkpi ah, del phalo la hileh, sakol bangti’n delpha ding la hem? Bitna gam ah bawn kipûk la hi chun, Jordan lingbuk lak ah bang suak ding la hi nam?

⁶ La chanaute leh la Inkuanpite nasan in, dawha phalo tak in a hun bawl nalai sêt un; a aw neisun un a hun ko zui un, bang gual ah thu pha gen maleu le, amau chu taksang ta kin.

⁷ Ka In hi ka nusia ta’n, ka gote le ka taisan tai; ka lunggil tak ah ka dawi takte chu, a mêlmateu khut in ka pedok tai.

⁸ Ka gote chu kei â dingin, gammâng ah sakeibaknei tawhbang a hitau in; keima ei dem in a ngai thei pen in aw a suau in, ziaziakchun, amau chu ka hua ahi.

⁹ Ka gochante chu sa-uakte’n ducha, a nêk zaw ding ua thu ka pia a hem? Sasial ne vachate’n a ûm zing ua a hem? Chia inla, gamsa zosia hun ko khawm inla, a ne zo dingin hun pui khawm in.

¹⁰ Belampu tamtakte’n ka grep huan a susiau a, ka chantum chu a chuanchil tau ah, ka channa mun pha chu gamthip, kuama umlo na’n a siam tau hi.

¹¹ Gamnungsang a suaksak tau hi; a thawmhau ta’n, ka kiang in a mau tai. Gam pumpi thawmhau tak ah siam ahi tai, maleh, kuama’n bangma’n a ngai puau hi.

¹² Gamkeu ah tâng gawchâk tin ah kipat in, gam hisia dingte chu a hung suk un; Lalpa chemjam chun gam mong langkhat lam ah kipat, a langkhat lam tiang in hun that gam intin, a suakcha um pua’n au.

¹³ Gehu bu a chîng un la lingga a ât tau a; tha chawl tak in sêmgim maleu le, bangma lawkna a mu puau hi. Lalpa lungnatna huaisia tak ziakin, a ga luak uh chu mualphopi ta’n au.

¹⁴ Lalpa‘n zia gual hin a gen hi: Ka mi Israelte’n a luana ding ua ka piak, go ah a lua ding uh gam chu a la khoikha, a kîm leh vêl ah nam gilo zosia chu, a gam ua kipat in suandok ing ka tin, a lak ua Judah Inkuan ah mite zosia chule ladok ding ka hi.

¹⁵ Ka lâkdaw zaw phat leh, amau chu lainat kit ta’ng ka tin, a gochannau leh a gam ma mau ah a leng un pui tung kit ding ka hi.

¹⁶ Ziaphat chuleh, gunchu tak ah ka mite umchan zosia a zil ua, “Lalpa chu a hinnâk leh,” ti ah ka mite Baal min ah kitiam dan a la zilsak gual ua, ka min ah kitiam dan a kizilsak nâk uh chun, ka mite lak ah chun tung ding khawm ta’ng ka.

¹⁷ Ahi’n la, kua namle ka thu ngailo taphot chu, a zung un kaldok ing ka tin, susia ding ka hi, Lalpa‘n a tii.