JEREMIAH 11 - PATHIAN LEKHABU THIANGTHO (BSI)

Israel leh Judah in Thuthung A Bawsiatnau

¹ Lalpa chun Jeremiah kiang in thu a hun gen a:

² Zia thuthung thute hi ngai inla, Judah mipite leh Jerusalem ah chêng zosiate kiang in vagensawn in.

³ A kiang un zia gual hin vagen in: Lalpa, Israelte Pathian in zia gual hin a gen hi: Zia thuthung thute ngaisak lo tapo chu hânsia dong in um uh hen;

⁴ zia chu la pu leh pateu Aigupta gam ah, thîk hâltuina thukkhûk ah kipat ka puidaw lai ah, a kiang ua, ka thugen ngai unla, ka thupiak zosia hi la zui ding uh ahi. A chutileh, ka mite hin la tiu in, keile la Pathian uh hi’ng ka tin;

⁵ tu’ni hun gual ah gampha, khuaizu leh bawngnawi luanna gam hi la pu leh pateu kiang ah piak dingin ka la kitiam ta’n, a ti’n. Zia phat ah chun ke’nle, “Chutichun hi hen, Lalpa,” ti’n ka la dawnhu tai.

⁶ Chun, Lalpa‘n ei dawnhu a: Zia thute zosia hi Judai gam ah khawpi zosia leh Jerusalem khawlai dung zosia’n va puangjak inla: Zia thuthung thute hi ngai unla, zui un.

⁷ Aigupta gam ah kipat ka puidaw lai ah kipat tu’ni tiang hin, a kiang un gunchu tak in, “Ka thu ngai un,” ti’n ka la hillawk zing a.

⁸ Himaleh, a ngai puau a, a bil uh le a daw diak puau hi; mi tin a lungtup phalo leh lu’lul dungzui in a um zing tau hi. Tichun, zia thuthung ah thute zosia hi a zui ding un thu ka pia’n; maleh, a zui diak puau hi.

⁹ Lalpa‘n ka kiang in: Judah mite leh Jerusalem ah chêngte’n ka chung ah thil phalo a guanggal ui.

¹⁰ Ka thu mang lo a pu leh pateu nunsiatna lam ma ma khan a kile’kit tau a; pathian dangte na sep piak dingin a chia tau hi; a pu leh pateu kiang ah ka thuthung kha Israelte leh Judate’n a botsia zo tau hi.

¹¹ Ziaziakchun, Lalpa‘n zia gual hin a gen hi: A pumpel theilo hial ding un a chung un siatna hun tunsak tei tei ding ka hi; ei hun ko maleu le a la ngaitha lo ding ka hi.

¹² Ziaphat chuleh, Judai khawpite leh Jerusalem ah chêngte chun, kithoina a la lat seknau pathiante kiang zuan in ko maleu le, a lungdonnau ah kipat in hukdok him him pua’n a.

¹³ Aw Judah, la khawpi jat ah tam pathian la kinei un; Jerusalem ah kotzing jat ah tam in Baal ho’na ding mâichâm la siam un, ziate chu la mualphona ding uh mâichâmte chu a hiu.

¹⁴ Nang vang, zia mite â ding hin pauchap kin la, a sik leh jal unle dot piak in pauchap kin; a lungdon man ua ei hun ko phat uh leh a la ngaitha lo ding ka hi’ngal a.

¹⁵ Zia gual tuk ah chu thil phalo a bawl zing lai un, ka ngainat ma ma te chun ka In sung ah bang thuneina nei nalai ding a hiu em? kipau tiamna leh kithoina sate chun la chung ua siatna tung ding chu heimang thei ding la kisau ah a hem? Ki-ân tak ah um thei nalai ding maw?

¹⁶ Tu’ma lam ah khan Lalpa‘n, “Oliv thinghing, ga pha leh hoi,” ti min a hun sak ah. Ahi’n, tu’hin vang van-gi tawh mei in hun hâl intin, a bakte chu kâng tum ta’n a.

¹⁷ Sepai honte Lalpa, nangma hun tungdingpa chun, la chung ah siatna tung ding chu a tâklang tai; Israelte leh Judate’n Baal kiang ah kithoina thilpiak pia’n, thil a la bawl khial tak ziak un ka lungnatna a choktho tau hi.

Jeremiah Tha A Guatnau

¹⁸ Ei hiatsak chu Lalpa ahi, ti ka he tai; nang in a thil phalo bawlteu chu lei etsak tai.

¹⁹ Himaleh, kei chu belamno nunnem tak, thâlup ding ah a kai uh gual chu ka hi. “Thingkung chu a ga pum in hisiai tiu in, mihing gam ah kipat hin sat tan hitiu in, a min hetmil veng veng hiding in bawl hitiu,” a ti lai ua khan, keima ei tha’na ding ah lungthim phalo tak, a la guanggal ahi lam uh ka la hepuai.

²⁰ Himaleh, nangma Sepai honte Lalpa, dik tak ah vaihawm ah, mihing lungthim leh ngaituana pateppa, a chung ua phuba la lâkna chu ei musak in, la chung in ka um ding dan zosia ka nga ta’ngal a.

²¹ Ziaziakchun, Anathoth khua mite, la hinna lâk gua, “Lalpa min in thu gen ta kin; achutiloleh, ka khut lum un thi mai ding la hi,” hun tite chung thu ah Lalpa‘n zia gual hin a gen a:

²² Sepai honte Lalpa chun zia gual hin a gen hi: Amau chu gawt ding ka hi; tangvalte chu chemjam ah thi’n tiu in, a chanuteu leh a chapateu chu kial thi in au;

²³ a lak ua suakcha khatle um ta pua’n au. Anathoth ah chêngte chung ah siatna hun tunsak ding ka hi’ngal ah; zia chu amau ka gawt kum chu hita’n ah, ti in.