JEREMIAH 1 - PATHIAN LEKHABU THIANGTHO (BSI)

Jeremiah A Ko’na

¹ Judai gam ah Lengpa Amon chapa, Josiah hun lai ah, a lal kum sawm leh thumna chun,

² Benjamin gam ah Anathoth khua thiampute lak ah Hilkiah chapa Jeremiah kiang in, Lalpa‘n thu a hun gen a.

³ Chuleh, Judai gam ah Lengpa Josiah chapa Jehoiakim lal hun sung leh, Judai gam ah Lengpa Josiah chapa Zedekiah lal kum sawm leh khatna, a tha nga’na Jerusalem salmat ah a pûk ni tiang ah khan a kiang in Lalpa‘n thu a hun gen nalai hi.

⁴ Tu’hin, Lalpa‘n ka kiang ah zia gual hin thu a hun gen a:

⁵ “Sûl ah ka hun siam masang ah kipat khan, ka hun hiatsa la hita’n, la pian masang ah kipat him ah khan, namtin kiang ah jawlnei hiding in, ka hun guat in, ka hun sukthiantho chuam la hi tai,” a ti’n.

⁶ Ziaphatchun keima’nle, “Katei, Lalpa Pathian! Ka naupang talua nalai in, thu gen dan ka hepuai,” ti’n ka dawnhu a.

⁷ Himaleh, Lalpa‘n zia gual hin ei dawnhu a: “Ka naupang ta luai ti kin, ka hun sawlna taphot ah chia in la tin, la gen ding ah ka hun piak cha cha chu la gen mai ding ahi.

⁸ Amau chu lau kin, nang hun hukdok dingin, la kiang ah ka um zing ngal a, Lalpa‘n a tii,” ti in.

⁹ Ziaphatchun, Lalpa‘n a khut a hun thadok a, ka mûk a hun khoi a; chuleh, Lalpa‘n ka kiang in: “Ngai in, la mûk ah ka thu ka koi tai.

¹⁰ En in, tu’ni hin nam tinte leh, lenggam tinte chung ah thuneina ka hun pia ta’n: botdok ding leh kaichim ding, susia ding leh paitha ding, sathak ding leh phu’kit dingin,” ti in.

¹¹ Chun, Lalpa‘n ka kiang in: “Jeremiah, bang la mu em?” ei hun ti’n: Ke’nle, “Vaisuaklu bâk khat ka mui,” ti’n ka dawnhu a.

¹² Ziaphatchun, Lalpa‘n ka kiang in: “La mu chu a dik hi, ka thugen chu a guitunna dingin ka et zing ahi,” a ti’n.

¹³ Lalpa‘n ka kiang in a niveina dingin thu a hun gen kit a: “Bang la mu em?” ei ti’n. Keima’nle, “Bêl ah tuiso lut lut, mallam nga ah awn ka mui,” ti’n ka dawnhu a.

¹⁴ Ziaphatchun, Lalpa‘n ka kiang in, “Gam pumpi chung ah siatna ding mallam ah kipat in hung kuan ding ahi.

¹⁵ Mallam ah nam zosia ko khawm ding ka hi Lalpa‘n a ti’n; tichun, hung khawm intiu in, Jerusalem kul kotkhak leh a pang ah kulbâng kîmvêl leh Judai gam ah khawpi zosia ah chun a lal chutphau hun lem in au.

¹⁶ Ei nusia ah pathian dangte kiang ah gimtui hâlte leh, amau khutsuak ho-te chung ah hin a gitlonau zosia ziakin, a chung ua ka vaihawmnate chu puangdok ing ka.

¹⁷ Nang vang, la kawng gâk in kisa zo in tho inla; la kiang ah ka thupiak zosia kha a kiang un vagen in. Amau chu ki’cha kin la, achutiloleh, a ma-âng un hun sudawilok ding ka hi.

¹⁸ Tu’ni hin gam zosia chung in, Judah lengte chung leh zia tak ah vaihawmte leh, thiampute chung leh mipite zosia chung ah chun, khawpi kul nei, thik khuam leh sum-eng bâng gual in ka hun siam la hi.

¹⁹ Hun do intiu in, himaleh, hun zo pua’n au; nangma hukdok ding in ka hun umpi zing la hi, Lalpa‘n a tii,” ti in.