JAKOB 4 - PATHIAN LEKHABU THIANGTHO (BSI)

Khawvel Tawh Kijawlna

¹ La lak ua kidodilna leh kinialnate hi khoi ah hung kipan sek a hem? La sung lam ua kidona siamdaw sek la nopnateu ah kipat hilo a hem?

² Thil bang a hem la dawi ua, la nei diak puau a; tual la tha khawlaw sek ui. Thil bang a hem la êng kit ua, la nei thei diak puau ah; tichun, la kinial ua, la kido sek uh ahi. La dot lo ziak un la nei ngai puau hi.

³ La don un, la dot diklo ziak un la mu puau hi; la nopsakna ding ua la mat guat ziak un.

⁴ Ângkawmte haw! Khawvel tawh kijawlna chu Pathian mêlma hi’na ahi ti la hepuau em? Ziaziakchun, kuale khawvel tawh kijawl nuam chu Pathian mêlma a hisek hi.

⁵ Ahiloleh, “Pathian in eima ah a koi Thagau chu thangsia hial in a dawi ahi,” ti Pathian Lekha thu’n a gen hi bangmalo ah a gen ah la tiu em?

⁶ Himaleh, hepina tam zaw diak a pesek hi; ziaziakchun, “Pathian in mi kilestsakte a do in, mi kingaitawmte chu doisakna a pesek hi,” ti ahi.

⁷ Tichun, Pathian kiang in kitulut un. Diabol chu dodâl un, tichun hun jamsan in a.

⁸ Pathian chu nai un; tichun, ama’nle hun nai in a. Nang uh mi gilote haw, la khut uh sil thiang unla, nang uh mi phalêmte haw, la lunggil uh hithiang un.

⁹ Lungngai unla, lusûn in kap un. La nuinau chu lungngaina chang hen la, la kipaknau chu nguina chang hen.

¹⁰ Lalpa âng ah kikoi niam un; tichun ama’n hun chawisâng in a.

Midang Demlo Ding ah Hilna

¹¹ Suapite haw, kigensiatua kiu in. Kua’n le a suapi a gensiat a hem, a vaihawm khum a hem chun, dan chu a gensia’n, a vaihawm khum ahi; dan chu la gensiat chun dan zuitu la hita pua’n, vaihawmtu la hizaw ahi.

¹² Dan petu leh vaihawmtu pakhat a um ah, ama chun a hukdam thei in, a sumangthai thei hi. Aleh, nang la vêngte vaihawm khum chu kua la hem?

A Jing â Ding ah Ki-uansakte Vauhilna

¹³ Tu’hin, nang uh, “Tu’ni a hem, jing a hem in, zia khawpi ah chun vachia in, kumkhat vachâm hitiu in, sumkawl vei in lawkna vamui tiu,” tite haw.

¹⁴ Jing leh bang a hung um diam ti la hepuau hi. La hinnau chu bang a hem? Sûmpi chomcha hung kilang ah mang kit ziang gual mai la hiu hi.

¹⁵ Tichun, “Lalpa‘n lem a sak leh dam hitiu in, zia hi a hem zia kha a hem bawl hitiu,” la ti zawk diu ahi.

¹⁶ La chaponateu chu la suang zawu ah, zia gual kisuanna zosia chu a pha puai.

¹⁷ Tichun, kuale thilpha bawl ding he ngal ah, bawl diak lo chu, gitlona bawl ahi.