Biblia Todo Logo
အွန်လိုင်း သမ္မာကျမ်းစာ

- ကြော်ငြာတွေ -

JAKOB 1 - PATHIAN LEKHABU THIANGTHO (BSI)


Chibai Bûkna

1 Jakob, Pathian leh Lalpa Jesu Khrista suak hin, nam sawm leh ni kithejakte chu chibai ka bûk hi.


Ginna leh Pilna

2 Ka suapite haw, patepna bang gual la tuak unle, kipakna lam bep in ngai un,

3 la ginnau patepna chun thok-hatna a siam hi ti la he ngal un.

4 Bangma tasam lo ah la bukim ua, la bittheina ding un thok-hatna chun sêm bukim ta hen.

5 La lak ua kua’n le pilna a tâksap chun, mi zosia kiang ah phal tak leh îtcha lo ah pepa Pathian kiang in don un, tichun piak in um in lau.

6 Himaleh, ginglel lo hial in ginna’n don un; a ginglel mi chu tuisuagiat kinawk, hui in a mut lumlet tawhbang ahi ngal a.

7 Zia gual mi chun Lalpa ah kipat bangma mu kinem ki’hen;

8 ama chu lungthim thua nei, a thil hi zosia ah det lo ahi ngal a.


Hausakna leh Châtgana

9 Gingtu, dinmun niam tak ah um chu choisa’n ahi tâk ziakin kipak hen la,

10 mihausa chu hi’niam ah a um ziakin kipak hen; mi hausa chu loulai ah hampa pâk gual ah mangthai ding ahi ngal in.

11 Nisa a hung suak ah, a satna’n loulai a hun kâng vuai ah; a pâkte chu a pultha’n, a hoinate chu a bei sek hi. Mihausa chule zia gual tho chun, hinkhua buaina lak ah a um zing lai un vuaitha ding a hiu.


Patepna leh Thepnate

12 Thepna thuak ham ham mi chu mi hampha ahi. Zia gual mi chun patepna chu a thuakzo ta’n, Lalpa‘n ama hepite â ding ah a tiam, hinna lallukhuk chu chang ding ahi.

13 Kuama’n patepna a tuak lai in, “Pathian in ei thep ka hi,” ti ki’hen; Pathian chu gitlona thep gual a hipua’n, ama’nle kuama a thêm ngai pawngal a.

14 Mi chu ama nopna ah puiman leh hîp ah a um phat leh, zia chun thep in a um sek ahi.

15 Zia nopna chun no a hun pâi in, gitlona a hing sek a; gitlona chu a hung pitin phat leh, thina a tun sek hi.

16 Ka doitakte haw, thep zaw in um kiu in.

17 Thilpiak pha leh thilpiak buting taphot hi chung lam ah kipat, vâkte pa kiang ah kipat ahi’n, ama chu danglam lo leh thimna umlo ahi.

18 A thilsiamte lak ah ga masa I hung hi’theina ding un, ama doi gual sukbutinna’n, thutak ah chun ei hing tai.


Hetna leh Sepdawna

19 Ka doitakte haw, zia hi hiau in: Kam chungnun chu’lo leh lungna vak lo in, mitin in a ngaithâk kilawp un.

20 Mihing lungnatna’n Pathian dikna a sua pawngal a.

21 Ziaziakchun, a buak leh umdan phalote chu koimang unla, thu kiphu det, la thagau uh hukdam thei chu thunuaigol tak in pom un.

22 Thu chu ngaitha mai ah nangmau kithêm lo in, thu chu sêmdok zaw tau in.

23 Kuale thu chu ngaitha ngal ah sepdaw neilote chu, mi, lîmet ah ki-en gual bep a hiu in;

24 a ki-en ah, a chia mang un, bang gual a hiu a kihemil kit ngal sek gual chu a hiu.

25 Himaleh, kuale dan buting, zalenna dan chu pha tak ah en ah, thuak-hat tak ah, a ngaithâk zaw leh hemil kit ziang lo ah sêmdok zaw te chu, zia mite chu a thil hiu ah maljawl in um ding a hiu.

26 Kuale sakhua ngaisak ah kingai ngal ah, a leiteu veng lo ah, a lungthim ua kithêm zaw te chu, amau sakhua chu bangmalo mai ahi.

27 Pathian leh Pa mit mu ah sakhaw thiangtho leh sukbuak lo chu zia hi ahi: nauchagate leh meithâite a genthei lai ua kanthâk leh khawvel kisukbuak sak lo hi ahi.

Vaiphei CL Bible - PATHIAN LEKHABU THIANGTHO

Copyright © 2014 by The Bible Society of India

Used by permission. All rights reserved worldwide.

Bible Society of India
ကြှနျုပျတို့နောကျလိုကျပါ:



ကြော်ငြာတွေ