ISAI 9 - PATHIAN LEKHABU THIANGTHO (BSI)

Dikna Vaihawm Ding Leng Hung Dingpa Chu

¹ Lungdong tak ah umte â ding chun dâna ding um diak pua’n a. Masang lai ah khan, Zebulun leh Naphtali gamte hi musit in a la umsak maleh, tu’nung lam leh vang, tuisuagiat zotna lampi leh namtinte chênkhawmna, Jordan lui gâl leh namtin chênna, Galili gamte hi, hun lûnsak kit ta’n a.

² Thim nuai ah chiate’n vâk nasa tak a mu tau; thimpi’n a jinkhumna gam ah chêngte chung ah chun, vâk a hung suak tai.

³ Nam chu la supungta’n, a limnau la sukpun piak tai; bu lâk hun ah a nopsak gual leh, gâl lâk a kihop lai ua a kipak lai gual un, la ma-âng ah lim in a um ui.

⁴ Midiante nuaisia ahi lai gual uh khan, a ngawngkol puakgik uh tawh, a liangko ah jawl kibât leh, a gawtte mol chu la khetbot piak ta’ngal a.

⁵ A do ah hung kuan sepaite kengtaw zosia, a sil leh chên thisan kâi nêt nût zosia chu, meikuangchaw gual ah hâl tum zaw hita’n a.

⁶ Ei uh â dingin nausen hung piang in, chapa piak in I um ta’ngal un; a liangko in thuneina a um ah, a min in Lemguattu, Mak, Pathian Hat, Kumtuang Pa leh Chamna Lal chapa sak ahi.

⁷ A thuneina khang jel intin, David lalchutpha leh a lenggam chun kichamna um zing ta’n a. Ama’n dikna leh thu tak ah tungding in tudet zing in a; tu’kipat leh kuamtuang tiang in. Sepai honte Lalpa phatchuam ngaina’n zia gual chun bawl ding ahi.

Simmawte leh Nuaisia Hat Chung ah Vaihawmna

⁸ Lalpa‘n Jakob kãl in thu a gen a, zia chu Israelte chung in a chu tai.

⁹ Ephraim gam leh Samaria gam ah chêng zosia’n zia chu a hiau a, maleh, a lunggil uh simmawna leh nuaisiana dim in, zia gual hin a gen tau a:

¹⁰ “Chêktangte chu a chim zo ta’n, maleh, suang kisek in lem thak hitiu; theipi kungte chu phûkthâk hitamaleh, sidar thing in theng nai tiu,” a tiu a.

¹¹ Tichun, a mêlmateu Rezin chu, amau do dingin tungding intin, a mêlmateu chu choktho in a;

¹² sualam ah Suriate leh tumlam ah Philistinte chun, a kam uh kasa’ la pang in, Israelte chu a la val zo in au. Zia gual ah a bawl zaw nung chunle, a lungnatna a dai diak puai; a khut chu a lâm nalai ngal a.

¹³ Mite chun amau vaw’pa lam chu a nga nuam nai diak puau a; sepai honte Lalpa lam chule a hawl nuam diak puau hi.

¹⁴ Ziaziakchun, Lalpa chun Israelte chu, a luchang tawh a mei sât khen intin; ni khat sung in tûm bâk leh, luangkang hun sâttha sik sek in a;

¹⁵ a upateu leh a mi kumluiteu chu a luchang uh a hiu a; zuau thu zilsak a jawlneiteu chu a mei uh a hiu;

¹⁶ zia mipi puitute hin a puimang tau a, a mi puiteu chu buai ah nutsia in a um tau hi.

¹⁷ Ziaziakchun ahi, Lalpa‘n a khanglaiteu a lainat lo ah, a nauchagateu leh a meithâiteu le a lungsiat lo; mi tin in Pathian neilo leh, thil phalo bawl ah zuau thu a gen ziak un. A lungnatna hâi thei lo in a chung un, a khut a lâm nalai lai ahi.

¹⁸ Mei in hampa leh ling a kât tum ah, gammâng nawngte a kât thian a, a meikhu van lam ah a kitun to gual in, nunsiatna chun mei gual in a kâng sek ngal a.

¹⁹ Sepai honte Lalpa lungnatna ziakin, gam pumpi a kâng ta’n; mipite chu a meisel ah a pan tâk ziak un, khat cha’nle midang khat a hukdok thei ta puau hi.

²⁰ Changlam kâi ah huaihap tak in ne maleu, a kial tho tho un; chuleh, veilam kâi in val zo maleu, a vâ diak puau hi, ti in. Amau chate sa nasan a ne tau hi!

²¹ Manasseh in Ephraim a ne’n, Ephraim in Manasseh a ne’n; a paniu in Judah a do ui. Zia gual ah a bawl zaw nung chunle, a lungnatna a dai diak puai; a khut chu a lâm zing ngal a.