ISAI 8 - PATHIAN LEKHABU THIANGTHO (BSI)

Assuriate’n a Hung Simna Ding uh Tepte’na Ding ah Isai Chapa

¹ Chuleh, Lalpa‘n ka kiang in, Lekha zikna ding suangpêk lian tak khat hun la’n la, a chung ah lekhamal lian in, “Maher-shalal-hash-baz â ding,” ti’n zik inla;

² chuleh, zia thu chu ei hetpi dingin mi ginum, thiampu Uriah tawh, Jeberakiah chapa Zekariah te ni hi chial in.

³ Chun, jawlneinu, ka ji kiang in ka chia ta’n; chuleh, nau a hun vop ah, chapa pakhat a hun hing ah. Ziaphatchun, Lalpa‘n, “A min dingin, Maher-shalal-hash-baz sak in,” ei hun ti ta’n;

⁴ zia nausen chun, “He nu” a hem, “He pa” a hem, a ti’thei masang in, Damaska hausakna leh Samaria gam gâllâk thilte chu Assuria lengpa’n chomnâm ding ahi ngâl a.

⁵ Lalpa‘n ka kiang ah zia gual hin thu a hun gen kit a:

⁶ Zia mite hin Shiloah mun ah luicha tui, nem hiau cha luang a doi lo ziak leh, Lengpa Rezin leh Remaliah chapa Pekah lau ah a kithin ziak un;

⁷ Lalpa chun Luipi tui hat tak leh tam tak, Assuria lengpa ngei chu, a lopina zosia tawh, a guam leh a luikam zosia luanglet gual in hun luan lutsak ding ahi;

⁸ tuisânglet in a chup gual in, Judah gam chu a ngawng tiang in chup intin; chuleh, aw Immanuel, a tha jak pal chun la gam pumpi hui suak in a.

⁹ “Nanghaw mipite haw, pung khawm unla, lungngai tau in; ngai un, nanghaw gamla tak ah gamte haw; lungngai tak in la kawng uh gâk unla, lungngai tak in la kawng uh gâk tau in!

¹⁰ Lung a gêl khawm un, maleh, bangmalo suak tho tho in a; ngaidan a gen khawm un, maleh, bangma’n pang diak pua’n a; Pathian chun ei umpi ngâl a,” ti in.

¹¹ Lalpa‘n a thilhitheina lopi tak tawh, zia mipite gual ah hin umlo dingin zia gual hin ei vauhil a:

¹² A vaisawmnau ah pang kin la, a kichâkteu chule kicha kin la, tiza diak kin.

¹³ Himaleh, a thiangtho chu sepai honte Lalpa chu ahi’n; ama bep chu la kichâk ah la tizat ding ahi.

¹⁴ Ama chu mun thiangtho leh mite kisuina suang hung hi’n a; Israel Inkuante â ding ah kipal pûkna suangpi hi’ntin, Jerusalem ah chêngte â ding ah chun thâng leh pial hung hi’n a.

¹⁵ Tichun, a lak ua mi tam tak kipal pâi in, kipûk intiu in, kitat phel in au; thâng ah awk in, mat in um ta’n au.

Isai Nungzuite

¹⁶ Zia thu hiatsak hi chûn tûp inla, zilsakna thu hi ka nungzuite lak ah îmchak in.

¹⁷ Jakob Inkuante mulo ding ah kisêl mang Lalpa chu ngâk ing ka tin, ama ah chun kinem zing ing ka.

¹⁸ En tiam un, kei leh naupangte Lalpa‘n ei piakte hi, Zion tâng ah cheng sepaite Lalpa ah kipat Israelte lak ah tepte’na leh etsakna ka hiu hilam.

¹⁹ Tu’hin, mite’n la kiang un, “Thugen ah phun chul chul thithate leh âisân thiamte chu dong tau inla,” a hun ti phat uh leh, mite’n a Pathian uh dong zaw lo ding a hiu em? Kua’n mihing sâng ah mithi dong zaw ding a hem?

²⁰ Zia gual ah thugente chun phalvak mu him him pua’n au!

²¹ Lunggim tak leh gilkial in gam chu chuan suak intiu in; a gil uh a kial phat leh a lung uh na’n tin, a lengpau leh a pathianteu samsia’n au. A mitteu van lam nga’n tin uh;

²² chuleh, lei lam nga’n tiu in; himaleh, lungjinna leh thimna bep mu ding a hiu, lunggimna’n thi’n tiu in; chuleh, thimna sâ tak ah naw lut in um ta’n au.