ISAI 65 - PATHIAN LEKHABU THIANGTHO (BSI)

Pathian Vaihawmna Dik Zia

¹ Ei donlote hawldaw dingin ka um in, ei hawl lote mudaw ziang dingin ka um hi. Ka min ah ei ko lote kiang in, “Zia hin ka um hi, zia hin ka um hi,” ka ti’n.

² Mipi helmangte lam ah chun, sun nitum tum in ka khutbânte hi ka jak zing ah, amau chun lampi diklo a zui un, amau lemguat dungzui in a um un;

³ ka maichang ngei ah ei cho lungna zing un, chêktang kilem khawm chung ah gimtui hâl ah, huan sung tincheng ah kithawi mai mai sekte a hiu in;

⁴ thân ah kitungden in, thoimual tincheng ah jan khawvak vak ah umte a hiu a; voksa a neu ah, a bêl sung un thil ki’dak um tincheng, a huan khawm sek un;

⁵ amau chun, “A la kivêng inla, ei hun nai kin, nang ah kipat koidaw thiantho ka hi ta’ngal un,” a tiu a. Zia gual mite chu ka nâk hawm ah meikhu ka thâdaw gual leh, sun nitum ah meikâng gual chu a hiu.

⁶ Ngaitia, ka ma-âng in zia gual hin zik ahi: “Thipsan pua’ng ka tin, thuk kit tei ding ka hi; ahi, a pheichung un thuk kit ing ka tin,

⁷ amau khawlona tawh a pu leh pateu khawlo’na chu, a leng in thuk khawm ding ka hi, Lalpa‘n a tii. Mualvum tincheng ah kithawi in, tâng tin ah ei demsiau ah; a la bawlsau zosia tawh kiphu tawk in, a pheichung un têdaw piak ing ka,” ti in.

⁸ Lalpa‘n zia gual hin a gen ah: Grep bawk lak ah a pha khen khat a um ziakin, min, “A lak ah pha khenkhat a um ziakin, susia sik sek ziang kin?” a tiu a; tichun, zia gual chun hawi ing ka tin, a leng in hise suak ziang pua’ng ka.

⁹ Jakob ah kipat suan leh pâk pian dawsak ing ka tin, Judah ah kipat in ka mualte lua ding siam ing ka; ka têlchuamte chun go chu lua in, ka suakte chu zia tak ah chun chêng ta’n au.

¹⁰ Ka mipi, keima ei hawlte ziakin, Sharon chu belam hon tatna gam hung hi’ntin, Akhor Guam chu bawng hon giakna hung hita’n a.

¹¹ Himaleh, nanghaw Lalpa nungngat ah, ka tâng thiangtho hemil ah, vangphatna Pathian hona dawkan bawl ah, vangphatna ding ah zu no sungdimte chu,

¹² chemjam ah thâgam dingin hun khêk ing ka tin, thâlup dingin hung khûn chiat in la tiu in; ka hun ko leh lei ngaisak lo ziak uh leh, ka hun ho leh lei limsak tâk lo ziak un, ka mit mu ah thil phalo la bawl un, ka thil kipakpi lou lam tak la têl zaw tau hi, ti in.

¹³ Ziaziakchun, Lalpa Pathian in zia gual hin a gen hi: Ngaitia, ka suakte chun vâ tak in ne’n tiu in, ahiziak in, nanghaw vang gilkial in lau; ngaitia, ka suakte’n niang leh tai in dawn intiu in, nanghaw vang dangchâk in lau; ngaitia, ka suakte chu lim leh kipak in um intiu in, nanghaw vang zakcha tak in hung um in lau;

¹⁴ ngaitia, ka suakte chu lungthim kipak ziakin, limna La sa’n tiu in, maleh, nanghaw vang lungthim nat ziak leh, lungngaina nat ziakin, kap jak in la tiu in, kiu veng vung in lau.

¹⁵ La min uh chu hânsia lawkhum dingin, ka mi têlchuam kiang in nusia in la tiu in, tichun, Lalpa Pathian in hun that intin; maleh, a suakte chu vang min dang khat in ko in ah.

¹⁶ Chutichun, zia leisiat ah maljawlna dawi taphot chun, dikna Pathian min in don hen la; chuleh, zia leisiat ah kihaksial taphot chun, dikna Pathian min in kihaksial ta hen; buaina masate kha hetmil a hita’n, ka mit ah mulo ding ah sêlmang ahi tai.

Thil Siam Thak Lopina Chu

¹⁷ Ngaitia, van thak leh lei thakte chu ka siam in, thil masate chu het zing hita pua’n tin, ngaituana’nle lut ta pua’n a.

¹⁸ Himaleh, zia ka thilsiam ziak ah chun, lim leh kipak tak in um zing un; ngai tiam in, Jerusalem chu kipakna ding leh, a sung ah chêngte le limna hiding in ka siam ahi.

¹⁹ Jerusalem chung ah kipak ta’ng ka tin, ka mipite chung inle lim ta’ng ka; a sung ah chun kâ thawm leh, thavai kiko thawm het hita pua’n a.

²⁰ A sung ah chun nausen a ni ah sim bep dam um ta pua’n tin; chuleh, teksia a dam kum ding ting lo le um diak pua’n a; kum za khat dam chu nausen lamjul ah thi gual hi’ntin, kum za khat ting lo ah thi chu, migilo ka hânsialaw ziak ah thi hi’n a.

²¹ Inte sa’n tin uh, lua in au; grep phu intiu in, a ga ne’n au.

²² Midangte chênna ding bep in Insa ta pua’n au; midangte nêk ding bep in thâi chîng ta pua’n au; ka mipite dam kum chu thing dam chan hita’n a; tichun, ka mi têlchuamte chun a khut sepgimna man uh, sawt tak tak chên ta ding ahi ngal un.

²³ A thawn in sêmgim pua’n tiu in, a chateu chule buaipi ding bep in piang pua’n au; amau leh a chateu chu Lalpa maljawlna chate, hita ding ahi ngal un.

²⁴ Ei ko masang un dawnhu ngal ing ka tin, a gen zaw masang un a la ngaitha ngal ding ka hi.

²⁵ Ngei leh belamno in an ne’khawm ta’n tin, sakeibaknei inle bawngchal gual in bupawl ne ta’n tin; leivui chu gûl an hung hita’n a. Ka tâng thiangtho ah chun kuama kisuknat leh, kisuksiat tuana um ta pua’n a, Lalpa‘n a ti ahi.