ISAI 64 - PATHIAN LEKHABU THIANGTHO (BSI)

¹ Aw, la mêlmate kiang ah la min tâklat ahi’n, namtin in a hun lau ua, la ma-âng ah a hung kithin theina ding un,

² mei in munphi thing a kat kuang puat puat ah, tui a chiaksak bul bul gual ah, la ma-âng ah mualte a kithin theina ding un, vante botthêk in hung kum suk mai lechin aw!

³ Ka ginchâk lo gual tak uh thil thupi tak, bawl ding ah la hung suk phat leh, la ma-âng in mualte a kithing sek ui.

⁴ Masang lai ah kipat khan, kuama’n amau jai ngak ah thilbawl piakpa, nangma tilo ngal, kuama’n Pathian dang him him, a he’kha puau in, a bil unle a huvau a hepuau in, a mit unle a mu kha puau hi.

⁵ Thanuam tak ah thil dik tak bawlte leh, la lampite ah nangma hun hezingte chu, nang in la kituakpi sek hi. Ngaitia, ka gilo tau a, nang la lung a na’n, lei kihei mangsan ziakin, ka la chawn khial tau ahi.

⁶ Kei haw vang mi buak tawh bang ka hung hitau in, ka thil dik bawl sun uh chule, puannên ki’dak um tak gual bep ahi tai. Thingdua vuai gual in ka chuai tau ah, ka khawlonau ziakin hui in a tawma’n gual in, tawmang in ka um gam tau hi.

⁷ La min hun ko nuam leh, nang hun tuzui ding ah kichok hal nuamle, kuama a um ta puau hi; ka mau ah kipat in la mai la sêlmang ta’n; ka khawlonateu ziakin lei pâmpai ta’ngal a.

⁸ Himaleh, aw Lalpa, nang chu ka pau la hi tho tho hi; keihaw vang tungman mai mai ka hiu a, nang chu a bêlsêkpa la hi; ka leng un la khutsuak ka hiu hi.

⁹ Aw Lalpa, lungna talua kin la, ka khawlonau chu hezing ziang kin. Ngai inla, ngaitua tiam in, ka leng un la mipite ka hiu.

¹⁰ La khawpi thiangthote chu gamthip a chang zo tau a, Zion chu gamthip a suak ta’n; Jerusalem chu a hawm ah nutsia ahi tai.

¹¹ Ka In thiangtho leh hoi tak uh, ka pu leh pateu in nang a hun choihoina mun uh chu, mei ah hâl tum in a um ta’n; chuleh, ka mun nuam zosiau chule hisiat zaw ahi tai.

¹² Aw Lalpa, zia gual ahi’nung tiang inle, kisûm nalai lai ding la hem? Kei haw hin genthei tak ah thuak zing ah, nang chu thip hiat hiat nalai ding la hem?