ISAI 61 - PATHIAN LEKHABU THIANGTHO (BSI)

Tatdawna Chanchinpha Chu

¹ Lalpa‘n sathau ei nu’ tâk ziakin, Lalpa Pathian thagau chu ka chung in a chu ta’n; tawden ah um gentheite kiang ah hukdamna chanchinpha vagen a, lungthimnate sudam ding leh, saltângte zalenna ding phuangdok ding leh, suangkul tângte thâdokna ding thu gen dingin ei sawl ta’n;

² Lalpa lungdamna kum thu leh, I Pathian uh phuba lâkna ni vapuangjak ding leh, lusûn zosia vathamuan dingin, ei sawl a;

³ Zion ah lusûnte â ding ah, leivui thasâng ah pakchavui pia ding leh, lusûn ah nguina thasâng ah, kipakna sathau pia ding leh, lungthim ngaituana sawlsam thasâng a, pakchatna puan pia ding in ei sawl ka hi. Tichun, a lopina etsak ding ah dikna gangpi thing, Lalpa thingkung phute ti hung hita’n au.

⁴ Tuan ah tâng ah hisiat ah a la um sate chu, hun siamthak kit intiu in, tu’ma lam ah hisiat sate chu, hun tung ding kit in au; khawpi suksiat ah umsa, khang tam tak suksiat ah a la um ta chu, hun siamthak kit ta’n au.

⁵ Mêlhetlote hung kisalâ in, la belam honteu hun vâk piak intiu in, gam dang mite chun la lou uh hun kai piak in, la grep guiteu hung ha’piak in au;

⁶ nanghaw chu vang Lalpa thiampute ti’n um in la tin uh, I Pathian uh nasêmtute min vua in um in lau; namtin hausakna chên in la tin uh, a neinungnau chu kisuanpi ta’n lau.

⁷ A zachatna thok uh a le’ni a hiziak leh, mualphona chu a chantum uh ahi, ti ah genjak a hita’n; ziaziakchun, chantum a thua ah chang ta’n tin uh, kumtuang kipakna chu chang ta’n lau.

⁸ Keima Lalpa hin vaihawmna dik ka ngaina ngal ah, a gûk ah kilâk piak leh, vaihawmna diklo chu ka huat lam tak ahi; a sep dan uh tawh kiphu tawk tak in, thuk ing ka tin, amau tawh ka kikâl un, kumtuang thuthung siam ding ka hi.

⁹ A tu leh chateu chu, namtin lak ah minthang tak in um intiu in, a suan leh pâkteu chu, mi tin lak ah challang tak hung hita’n au; amau mu kha zosia chun, ziate hi Lalpa maljawlna dongte kha a hiu, ti he ziang thei in au.

¹⁰ Lalpa ah chun nasa tak ah kipak in, ka pumpi’n ka Pathian chawihoi ing ka; ama’n hukdamna puan in ei thuam in, dikna puan ei khû ta’n, pâkkhi vui ah mopa a kithuam gual leh, mo chu sana kijem gual in, ei jem ta’ngal a.

¹¹ Lei in thâihing a kêdawsak ah, huan ah thâichi kitû a kêdaw sak gual in, Lalpa Pathian in nam tinte ma-âng in, dikna leh choihoina chu hun kêdawsak ding ahi.