ISAI 60 - PATHIAN LEKHABU THIANGTHO (BSI)

The’chek ah Um te Puikhawm Kitna Ding Thu

¹ Hung kipan inla, hung vâk in; la vakna a hung tung ta’n, Lalpa lopina chun a hun salvâk ta’ngal a!

² Lei hi thim in khû in, mipite chu thimna sâ tak chun hun tuam intin; himaleh, Lalpa vâk in hun sal in, a lopina chu la chung un hung kilang ding ahi.

³ La vâk ah chun namtin hung khawm intin uh, la jingkal phalvakna lam zuan in, lei ah lalte le hung khawm in au.

⁴ Hung khawdak inla en tiam in; a hung kipâ khawm un, la kiang in a hung khawm ui; la chapate chu khual gamla tak ah kipat hung intiu in, la chanute chule amau donte chun hun pai in au.

⁵ Ziaphat chuleh, mu’n la tin vâkdok ta’n la; la lungthim thanuam talua’n kipak intin, tuisuagiat ah hausakna leh, namtin hausakna chu la kiang ah, hun paw tung ding ahi ngal un.

⁶ Midian leh Ephah gam ah sangawngsau tuaidawng hon tawh, sangawngsau hon in hun tuam in au; Sheba ah chêng zosia hung in au. Sana leh begawte hun pua’n tin uh, Lalpa pâkchâtna chu hung puangjak ta’n au.

⁷ Kedar ah belamhon zosia, la kiang ah hun puikhawm intiu in, Nebaioth ah belam zosia’n la na hun sep piak ta’n au; ka mâichâm ah pom piak hita’n tiu in, tichun, ka In lopi chu hun chawihoi ta’ng ka.

⁸ Zia tak ah sûmpi gual leh, a tukvan ua vakhu gual ah, hung lenglutte haw saw kuate a hiu em?

⁹ Tuikual gam tin ah umte chu ka jai ei ngâk in, Tarshish longliante chu hung masa’n, khual gamla tak ah kipat la chate, a sana leh dangkateu tawh hun pawkhawm dingin, Keima, Israel Mithiangtho Lalpa, la Pathian uh hin, Keima ei chawihoi theina ding un, la mipiteu chu ka chawisâng ta’ngal a.

¹⁰ Gam dang mite chun la kulbâng uh hun bawl piak intiu in; chuleh, a lengteu chunle la nau hun sep piak ta’n au; ka lungnat ziakin ka hun vaw pâi ta’n, maleh, ka hun doisakna ziakin, la chung in ja’ngaina ka nei tai.

¹¹ La kul kotkhakteu kikhak man ta pua’n tin, a sun a jan in kikhak ta pua’n a; tichun, namtin in a hausaknau hun puak lut piak intiu in, a lengteu in ma’ hun pui in au.

¹² Kua’ nam leh lenggamle nangma nasem nuam lo taphot chu, zâhuai tak ah sukmanthai in hung um in au.

¹³ Lebanon lopina chu châk thingte, thing thauneite leh châk thingte chu, ka mun thiangtho umna cheimawina dingin, la kiang ah hun pua’n au; tichun, ka keng ngakna mun chu, hun chawihoi ta’ng ka.

¹⁴ Nangma hun sugentheite suan leh pâkte chule, la kiang lam ah chun a boksa’n hung ta’n tiu in; chuleh, nang a la musit zosia kha, la kengbul ah hung bokkhup ta’n au; ziaphat chuleh, nangma chu Lalpa khawpi, Israel Mithiangtho Zion, hun ti ta’n au.

¹⁵ Nangma chu nutsia leh huat ah um in, kuama a hun limsak um talo maleu, kumtuang ah lopi tak dingin, hun bawl ing ka tin, khang tam takte kipakna pen hung hita’n la.

¹⁶ Nam tinte hausakna leh, leng leh lalte nei leh lam zosia chomgam ta’n la; zia tak chuleh, Jakob, Mihatpa, nangma hun Tanpa, la Hukdampa chu, Keima Lalpa hi ka hi ti hun he ta’n lau.

¹⁷ Sum-eng thasâng ah sana, thîk thasâng ah dangka, thing thasâng ah sum-eng, suang thasâng ah thîk hun pia’ng ka. Nanghaw enkol dingin thamuanna chu, guat ing ka tin; sep leh bawl ah hun kaihuai dingin, Dikna chu hun guat piak ta’ng ka.

¹⁸ La gam sung un thagum sua’na hetphâk hita pua’n tin, kisuksiatna leh siat kibawlna him him, la gamgi sung un hetphâk hita pua’n a; la kulbâng uh chu Hukdamna, la kul kotkhakteu chu Pakchatna hun ti ta’n lau.

Pathian Chu Zion Lopina ahi

¹⁹ Sûn ah la meivak ding chu, nisa hita pua’n tin, jan ah a hun salvâk dingle, thapi hi diak ta pua’n a; maleh, Lalpa chu la kumtuang meivak ding hita’n tin; chuleh, la Pathian chu, la lopina ding uh hung hita’n a.

²⁰ La nisau chun tum tik nei ta pua’n tin, la thapiu inle man tik nei ta pua’n a. Lalpa chu la kumtuang meivak ding uh ahi ta’ngal a; tichun, la lusûnna hun uh tawp ta’n a.

²¹ La mite chule a leng un, midik ngen hita’n tiu in, kumtuang in gam chu luaden ta’n au. Ka lopina ding ah ka thingphu sel leh, keima khutsuak ma ma chu ahi ngal un.

²² A lak ua tawm pen chule, phungting hung suak intiu in, a neupente chule, nam hat tak hung suak ta’n au; Keima hi Lalpa chu ka hi; a hun chet chet in hun bawl ding ka hi’ngal a.