ISAI 6 - PATHIAN LEKHABU THIANGTHO (BSI)

Tempul ah Lalpa Kilâkna

¹ Lengpa Uzziah a thi kum in, Lalpa chu lal chutpha kichu, sâng tak leh lian tak in ka mu’n; chuleh, a puansil mongte chun tempul sung a lua dim hial a.

² A chung lam ah Vansawlchâkte’n a ching un; tha paguk chiat a nei ui: A tha’u pani chiat in a mai a lia piak un, a dang pani chiat ah chun a keng a tuam piak un, a dang panite ah chun a leng chiat ui.

³ Zia gual hin a kidawngtua in a kiko ua: “Sepai honte Lalpa chu: A thiangtho hi, a thiangtho hi, a thiangtho hi; a lopina’n lei pumpi a lua dim hi,” ti in.

⁴ A kiko thawm un tempul hulliap ah khuamte chu a kithinsak in, a Insung chu meikhu’n a hung dim tai.

⁵ Keima’n, “Ka chung a gikna e! Mûk thianglo ka hi, mûk thianglo lak ah chêng ka hi, a mangthai chu ka hita hi, ka mit in Lengpa, Sepai honte Lalpa chu ka mu ta’ngal in,” ka ti hen.

⁶ Ziaphatchun, Vansawlchâkte lak ah khat chun, châiche khat in mâichâm ah meiâm vachepdok in, ka kiang lam in a hung leng phei a.

⁷ Vansawlchâk chun zia meiâm chu ka mûk a hun bî ah, ka kiang in: “Tu’hin, zia meiâm hin la mûk a bî tâk ziakin, la bawlkhialna zosia lâkmang a hita’n, la gitlona le ngaidam ahi tai,” a hun ti’n.

⁸ Ziaphatchun, Lalpa aw chu ka hun he ta’n: “Kua a hem ka sawl ding? Kua a hem kei uh â ding ah kuan ding?” a hun ti’n. Keima’n, “Zia hin ka um hilam, ei sawl in!” ti’n ka dawnhu a.

⁹ Ama’n ka kiang in, “Chia inla, zia mipite kiang ah hin zia gual hin vagen in, ei ti’n: ‘Ngai zing unla, hechian kiu in; en zing unla, muchian kiu in.

¹⁰ Zia mipite ngaituana hi hi’chau inla, a nakhang uh le hi’ngong inla, a mit uh le hi’thûm piak in; achutiloleh, a mit un mu’n tin uh, a bil un ngaitha’n tin uh, a ngaituanau in hechian in, hung kihei kit in, sukdam in um kha’n au,’ ti’n vagen in,” a ti’n.

¹¹ Ziaphatchun keima’n: “Aw Lalpa, bang chan ahi diam?” ti’n ka dong a. Ama’n ka kiang in: “Khawpite a lua ding um lo ah nutsia a hung hiu a, Inte le a chêng ding um lo ah, gam pumpi hisiat dim dem ah, a hawm ah nutsia ahi masia;

¹² Lalpa‘n mi tin gamla tak ah, a thotmang zaw masia gam lailung ah, bangma um talo ah, nutsia ahi masia.

¹³ Thinghi thing a hem, gangpi thing a hem, a kiphûk nung ah le a bulsum a um gual in, a lak ua mi sawm lak ah khat ziang le, nutsia a um nâk lai chun, mei ah hâl tum hi nalai in au; chi thiangtho chu a bulsum gual in, um nalai in a,” ti in.