ISAI 58 - PATHIAN LEKHABU THIANGTHO (BSI)

Pathian Biakna Dik leh Diklo

¹ Kikodok inla, kipadâm kin! Pengkul gual in la aw hun sua in! Ka mipite’n a bawlkhialnau hil inla, Jakob Inkuante kiang in a gitlonau tâklang in.

² Ahi’n, amau chun nisi’n in ei hawl ngei un, ka lampi le a he nuam nau hi; dik tak ah bawl sek namte gual leh, a Pathian thuthung kihei mangsanlote gual in, dik tak in vaihawm in ei tiu a; Pathian nei le a nop lam uh ahi nai.

³ “Bang ding ah la mulo ding ah anngawl sek ka hiu em? La ngaisak lo ding ah bang a tia, kikoi niam sek ka hiu em?” la tiu a. Ngai tiam u, la anngawl niu ah chun, nang uh lunglutna dungzui bep ah bawl la hiu a, la nasêmteu chu, la êngbawl nalai ui.

⁴ Ngai tiam u, kinakna ding, kinialna ding leh nunsiatna khuttum ah, mi la voktheina ding bep ua anngawl la hiu. Tu’ni zia gual ah an la ngol uh hi, chung lam ah la aw’u het hi ngai lo ding ahi.

⁵ Zia gual ah kingainiam ah an ngol ni mat hi ahi em, ka dawi gual chu? Hampa nêm gual bep ah luchang khûn ah, leivui chung ah saidip puan kiphâ chung ah lup bep chu, hun tawk a hem? Zia gual chu Lalpa lung lam ah an ngolna chu ahi, tithei ding la hiu em?

⁶ Anngawl dan ka doidan chu zia gual hi ahi: Diktatlo’na khauhual thap thâk a, ngawngkol puak lâk thâk ah, nuaisia ah umte zalensak ah, ngawngkol zosia khetbot hi ahi.

⁷ Gilkialte nêk ding la piak ah, In leh lou bei gentheite la In ah la chênsak ah, nîk leh puan beite la thuam ah, la sang la suaiteu la kisêlmang san lo ding uh hilo maw?

⁸ Ziaphat chuleh, la vakna jingkal phalvak gual in, hung suak intin, la natna kin tak ah sukdam hung hita’n la; la dik zia chu la ma-âng ah chia pek intin, Lalpa lopina chu la nung lam ah a hun vêngtu hita’n a.

⁹ Ziaphat chuleh, hun ko in la tin, tichun, Lalpa‘n hun dawnhu ta’n a. Panpi’na don in kiko in la tin, ziaphat chuleh, ama’n, “Zia hin ka um hi,” hun ti’n a. La lak ua kipat ngawngkol lâkmang ahi’phat leh, khutzung ah kikawktuana tawh, thu phalo genna le la lâkman ua,

¹⁰ gilkial kiang ah an la piak ua, sukgenthei ah umte tâksapna la somdawl ua leh, la vakna chu thim lak ah chun hung kilang ta’n tin, la thimna chule sûnchang lai tak gual in, hung vâk ta’n a.

¹¹ Lalpa‘n hun pui huai zing ta’n tin, tâng gawchâk mun inle, la tâksap zosia hun tua intin, la gu leh châng zosia hihat in a. Tichun, tui in a chapno zing, huan tawhbang ta’n la tin, tuinâk pha tak, a tui kang ngai lo gual chu, hung hita’n la.

¹² La munlui suksiat ah umsate chu, siamphat kit hung hita’n tin; khang tam takte suangphûm chu, hun lem to kit ta’n la. Tichun, nangma chu a siatna siampha kitpa leh, chênna ding kotzing bawlpha kitpa, ti hung hita’n la.

¹³ Ka ni thiangtho ah nangma lawkna ding bep hawl ah, sabbath ni bangmalo ah ngai lo ah, tawden lo ah la um ah, sabbath ni hi kipakna ni la hi’sak ah, Lalpa ni Thiangtho chu la jabawl nâk chun; jabawl tak ah, nangma thu kinoptel lo ah, nangma nopna lam bep bawl lo ah, nangma lawkna ding bep la hawl lo nâk chun;

¹⁴ ziaphat chuleh, Lalpa ah chun kipak in la tin, lei mun sânna cha cha chuang dingin, hun siam ing ka tin; la pubulpi Jakob gochan ah chun, hun vâkva ing ka; ti’n, Lalpa kam chun a la gen ta’ngal a.