ISAI 57 - PATHIAN LEKHABU THIANGTHO (BSI)

Israelte Milim Mantheilo Dan

¹ Midik chu a mangthai in, ahi’n, kuama’n a ngaisak puau in; mi kipumpiakte chu pui mang in a um un, kuama’n a hethiam puau hi. Midik chu siatna hung tung ding ah kipat in, lâk mang in a um un; zia chu kuama’n a hethiam puau in;

² lam dik ah chiate chu a thamuang un, a lupna chung unle chawldam in au.

³ Nanghaw, mitvaidawi thiam chate, nawchizuakte leh ângkawmte suan leh pâkte haw, hung un.

⁴ Kua a hem tawtbawlna la mat uh? Kua eulauna ding ah la kam uh lian tak ah kâ, la lei uh thadok sek la hiu em? Bawsiatna chate, mithepna suan leh pâkte hilo la hiu em?

⁵ Gangpi thing leh thinghing bulnuai tincheng ah, thanghuai tak in la kikawi un; nanghaw, phâijawl tincheng leh, suangpi kawhawm tincheng ah la chasenteu, kithoina that sekte kha hilo la hiu em?

⁶ Phâijawl ah suangpêk zol tak tak te lak ah, la chantum ding uh a um in; amau, amau haw ma ma chu la vâng ua kia a hiu; amau kiang ah chun dawnchi kithoina tuite chu, la sungtha sek un, nêkthei le la pesek uh hilo a hem? Zia thilte ah chun lungdam ding ah, lei ngaituau a hem?

⁷ Mual leh tângsâng leh lian zosia chung in, la jalkhunteu la dawu in; zia vûm tiang ah chun, kithoina lân dingin la kal to sek un.

⁸ La kotkhak nung lam leh la kotbiang un, tepte’na la bawl un; keima ei nungngat in, la jalkhunteu ah la kihawkdok un, zia chun la kaldok un, la jalkhun uh chu lian tak in la phâmal sek ui; a kiang un la kizuak thânghuai un, a jalkhun uh la ngainau ah, a ngawnchang hi’nau chun la kihilung-awi sek ui.

⁹ Sathau chawi kawm in Molekh la zuan un, la sathau gimtuiteu chu la hi’pung un; la palaiteu chu gamla tak tak, Sheol chan hial in la sawl lut tau hi.

¹⁰ La vâkvêlna lam un la thau a chawl ta’n, ahi’n la, “A thawn bep ahi,” la ti nuam nai diak puau hi. La thatnopnau a chokphûl un, la tha chawl lam uh le la hepuau hi.

¹¹ Kua la lau ziak leh la kichâk ziak ah zuau gen ah, keima ei hemil ah, la lungthim ah le ei gêl kha talo la hitau em? Thipbek ah um in, ka mit ka sîn san ziak ah ei lau lo la hiu maw?

¹² La diknau leh la thil bawlteu hun tâklang ding ka hi; maleh, ziate chu phachuam pua’n a.

¹³ La patau phat uh leh, la milim lâk khawm haw chun hun hukdok tau hen! Hui in tokmang hen la, hu in mût mang ziang ta hen. Himaleh, keima ei bêl taphot chun, gam hi hun lua in, ka tâng thiangtho hi go in hun lua ta’n au.

Panpi Ding Leh Sukdam ding ah Tiamna

¹⁴ Zia phat chuleh, “In bawl unla, bawltûp un, lampi siam tau in; ka mipite hungna ding dâl thei zosia ladok sik sek un,” hun ti ta’n au.

¹⁵ Mi chungnung, choisa’n ah um leh, kumtuang ah hing zing, a min Thiangtho kiti chun, zia gual hin a gen ta’ngal a: Mun sâng leh thiangtho ah chun ka chêng in, chuleh, mi kingainiamte hinna suhal ding leh, kisik ngawi ngawite lungthim, suhal kit dingin, lunggil ah kingainiamte leh, kisik ngawi ngawite kiang inle ka um hi.

¹⁶ A kum a khua’n hun mawsak zing pua’ng ka tin, la chung inle lungna zing diak pua’ng ka; achutiloleh, ka ma-âng in thagau leh, a hinnau ka siam piak nasan chu, basam zo mai ding ahi ngal in.

¹⁷ Huaihap tak ah a nunsiat ziak un, a chung un ka lungna ma ma in; ka la vaw ta’n, ka lungnatna ziakin, ka kisêl mangsan tai; maleh, ei nusia tei tei un, amau nop dan dan in a chia tei tei ui.

¹⁸ A chiana lampiu chu ka mu zing ah, maleh, sudam ding ka hi; amau chu kaibât in, thamuan kit ing ka tin, lusûnte chu thamuanna pia ta’ng ka.

¹⁹ A gamla leh a nai tuam ah umte haw, thamuang unla, thamuang tak in um un, Lalpa‘n a tii; tichun, sudam ding ka hi.

²⁰ Himaleh, mi nunsiate chu vang, tuisuagiat kichok het hut ah, umthim theilo gual chu a hiu a; a tui kinawkte chun buanthuak leh ki’dak, a nawkdok sek ui.

²¹ Mi nunsiate â dingin thamuanna ding a um puai, ka Pathian in a tii.