ISAI 52 - PATHIAN LEKHABU THIANGTHO (BSI)

Zion Chu Kipak Tahen

¹ Aw Zion, hung tho inla, hung thodok in, la hatna chun hung kithuam in! La puan hoi takte khan hung kithuam inla, aw Jerusalem khawpi thiangtho; zektanlote leh mi buakte chu, hung lut talo ding ahi ngâl un.

² Aw sal ah tâng Jerusalem, la chung ah leivui bek chu thing tha’n la, hung thodok in. Aw Zion chanu sal ah tâng, la ngawng ah kol chu lîptha ta’n!

³ Lalpa chun zia gual hin a la gen ta’ngâl a: Bangmalo mai mai ah zokdaw in la um un, a man bei ma ah tatdaw kit ding la hiu.

⁴ Lalpa Pathian in zia gual hin a la gen ta’ngâl a: Masang lai ah khan ka mipite chu Aigupta gam ah châmden dingin a vachêng un; a ziak leh jal bei in Assuriate’nle a sugenthei ui.

⁵ Tu’hin, a ziak leh jal umlo ah ka mipite chu puimang a hiu ti ka mu ziakin, bang hun bawl ding ka hi diam, Lalpa chun a ti ta ahi. A chung ua vaihawmte chun ki-uang tak ah chawl lo in, sûn nitum tum in, ka min a gensiau hi, Lalpa‘n a tii.

⁶ Ziaziakchun, ka mipite’n ka min hun he ta’n tiu in; zia hun phat chuleh, a kiang ua thugen chu keima ka hi ti hun he ta’n au; keima a genpa chu zia hin ka um hi.

⁷ Zion kiang ah, “La Pathian in vai a hawm hi,” ti ah kichamna chanchinpha gen ding ah, thangko ding ah mual leh tângte chung ah, hung kalsuante chu a mêl uh a pha na e!

⁸ Ngai un! La gâlvêngteu in aw a sua ui, a leng un kipak in La a sa khawm ui; Zion ah Lalpa hung kit chu, a mit chiat un a mu ta’ngâl un.

⁹ Nanghaw hisiat ah um ta Jerusalem ah umte haw, kipak ah La sa’n hung kikodok tau in; Lalpa‘n a mite a thamuan in, Jerusalem chu a hukdok kit tai.

¹⁰ Nam tinte mit mu in Lalpa‘n, a khutbân thiangtho chu a lâmdok ta’n; tichun, kawl kîmvêl tiang ah mi zosia’n, I Pathian hukdamna chu hun mu ding a hiu.

¹¹ Hung pawt un, hung pawtdok unla, zia kipat chun hung pawtdok un! Nanghaw Lalpa bêl thiangtho, pua tawl tawl ah pangte haw, thilbuak chu khoikha kiu in; a lak ua kipat hung pawtdok unla, kihi’thiangtho un.

¹² Kinaw tak ah la chiau ngai pua’n tin, lauthawng ah taidaw le ngai pua’n a; Lalpa chun la mau pui intin, Israelte Pathian chun la nung uh, hun dâl ding ahi ngâl a.

Sukgenthei ah Um Suakpa Chu

¹³ En un, ka nasempa chu lawting in a; ama chu chawihoi leh choisân ah um in, sâng tak ah koisân in hung um ding ahi.

¹⁴ Mi tam tak in ama chu mak hun sa’n au; a mêl leh pâng hi’danglam ahi bêk ziakin, mihing mêlle pu ta pua’n tin,

¹⁵ tichun, nam tam takte hun sulung jing ta’n a; ama ziakin lengte’n le a mûk uh chi ta’n au; a kiang ua a la kigen kha lo chu hun mu’n, a het ngai lo uh chu hun ngaitua ta ding ahi ngâl un.