ISAI 51 - PATHIAN LEKHABU THIANGTHO (BSI)

Pathian Mite  Ding ah Maljawlna Kikhol

¹ Nanghaw dikna del ah, Lalpa hawlte haw; ka thugen hi a la ngai un. Khuak daw ah la umnau suangpi en unla, chawdaw la hi’nau khûk chu en un.

² La pau Abraham chu en unla, a hun hingnu Sarah chule en un; ka la ko lai ah khan ama chu a chang ah um ahi’n, himaleh, ka maljawl ah, tam tak in ka siam tai.

³ Lalpa‘n Zion chu thamuan ding ahi ngâl a; a mun siatna zosia chu thamuan intin, a gamthip chu huan a hem gual in, a gamkeu haw chule Lalpa huan gual in hun siam in a. Kipakna leh limna ama ah um intin, kipak thugenna leh Lasak git het hita’n a.

⁴ Ka mipite haw, ka thugen ngai unla, ka nam têlte haw, ei ngaisak tiam un; keima ah kipat in kihilna hung pawt intin, ka vaihawmna thu le mi tinte salvâk dingin, hung pawt in a.

⁵ Kin tak in ka hukdamna hun naisak ing ka tin, ka hukdamna pawtdok in, ka khutbân in mi tinte chung ah vaihawm ding ahi; kawlkil tiang ah mite’n ei ngâk un, ka khutbân chule a kinepnau ahi.

⁶ Khawdak in vante en to unla, nuai lam ah lei hile en suk un; vante chu meikhu gual in mangthai intin, lei hile puan gual in hung chul ta’n tin, a chung ah chêngte chule thovai gual in, hung thi zo ding ahi ngâl un; maleh, ka hukdamna chu kumtuang in um zing intin, ka tatdawna chun tawp ni nei pua’n a.

⁷ Nanghaw a dik hete haw, ka hilna thu lungthim ah vopte haw, ngai un; midangte hun vauna chu lau kiu inla, a hun engho lai unle lungthuai kiu in.

⁸ Nget in puan gual in ne zo intin, lung in samul a nêk zaw gual hiding ahi ngâl un. Himaleh, ka hukdamna chun kumtuang dai intin, ka hukdamna chun suan zosia tiang dai in a.

⁹ Aw, Lalpa khutbân chu hung tho inla, hung thodok in, hatna’n hung kithuam ta’n! Nidang lai ah khangluite hun lai gual ah khan, hung thodok in! Nangma hilo maw Rahab a them them ah âttel ah, dragon sunlum kha?

¹⁰ Nangma hilo maw tuisuagiat leh, tuili thûk takte sukang ah, tuisuagiat lithûk ah le tatsate, chia gâlkâina ding lampi hon piak kha?

¹¹ Tichun, Lalpa tatsate chu hung kile’kit in, La sa kawm in Zion ah hung in au; a luchung ua kumtuang kipakna khuk in, limna leh kipakna chang in, lungngaina leh lusûnna zosia bei ta’n a.

¹² Kei, Keima hi ka hi nanghaw hun thamuanpa chu; a thi mang ziang thei mihing bep leh, hampa gual ah vul kit ziang ding haw hi, bang ding ah lau la hiu em?

¹³ Nangma hun Siampa Lalpa chu la hemil ta’n, ama’n vante kaimal in, lei pumpi kingaknate a lem hi. Hi’mangthai ziang ding ah um hita, a hun nuaisiate lungnatna chu lau in, sun nitum in la um ui. Mi nuaisiate lungnatna chu, khoilam tung zo a tam?

¹⁴ Tawden ah umte chu kin tak ah thâdok in, hung um intiu in; amau chu thi in, mithi khua’n lut suk pua’n tiu in, nêk ding an le tasam ngai pua’n au.

¹⁵ Keima hi Lalpa la Pathian, tui kinawkte gi hum hum ding ah, tuisuagiat chokphûlpa chu ka hi’ngâl a, a min chu sepai honte Lalpa ahi.

¹⁶ Ka thute chu la kam ah ka koi ta’n; chuleh, ka khut lîm ah chun ka hun sêlgu tai. Vante khi ka kaipal ah, khawvel kingaknate hi ka lem in, chuleh, Zion kiang in, “Ka mipite la hiu,” ka ti tai.

¹⁷ Aw Jerusalem, hung tho inla, hung kipan inla, hung dingdok tiam in; Lalpa khut ah a lungnatna no ah um chu, la dawn kham ta’n, kithinna no ah a tawnên tiang in, la chîp kang ta chulam.

¹⁸ Ama hinsa a chate lak in, ama chingsui thei ding khatle a um puau in; ama hindaw a chate lak in, a khutbân ah kaibât ding khat le a um puau hi.

¹⁹ Zia thil panite hi la tuak ding a um ah, kua’n a hun dâpi ta diam? Hi’gamna leh hi’siat dim dem hun ah, kialna leh chemjam lênna, kua’n a hun thamuan ta diam?

²⁰ La chate a basam zo tau ah, sazukchal lênthâng ah awk thachau gual in, khawlai kotzing tin ah a kitâl tek tuk tau hi; Lalpa lungnatna huitung tak tuak in, la Pathian vauna awsia pua a hiu.

²¹ Ziaziakchun, nang hi’liam ah um, vâk kham ah um, uain dawn kham chu hilo, zia thu hi a la ngai in:

²² Chungnung Penpa Lalpa, la Pathian, a mipite sik leh jal gen piak sekpa chun, zia gual hin a gen hi: En un, kithinna no chu, la khut ah kipat in ka lamang tai; ka lungnatna no ah kipat in, dawn kit ta pua’n la.

²³ Tichun, nanghaw hun sugenthei ah, la kiang ua: “Tual ah bok mât un, la chung uh hun haw malam ding ka hiu,” ti sek ah, la chamlo ua lei tual ah la kizam ua, khawlai tual tawh hun chuan den ding a hiu.