ISAI 50 - PATHIAN LEKHABU THIANGTHO (BSI)

¹ Lalpa‘n zia gual hin a gen a: La nuu ka la nolna lekha khoi ah a um em? Kua kiang ah ka bat ditna ding ah ka piak a hem? Ahipuai, la gitlona ziak un kizuak mang la hiu a, la thil bawlkhialnateu ziak ah la nuu chu, naw mang a la hi tai.

² Ka hung lai ah khan bang ding ah pakhat chale, a la umlo la hiu em? Ka hun ko lai ah khan bang ding ah, pakhat cha’nle ei dawnhu lo la hiu em? Hukdok theilo ding khop ah ka khut chu, sukchom in a um ah a hem? Ahiloleh, hukdok zo lo ding ah, thahâtna neilo ka hi em? Ka vau leh tuisuagiat le a kang mai a, luipite le gamkeu ka suaksak a; tui tâksap ziakin a sung ah sangate le, a ui veng vung un, dangchâk ziakin a thi zo tau hi.

³ Vante chu thimna’n ka tuam a, a kituamna ding un saidip puan ka pia’i.

Pathian Suakpa Sukniamna leh Thiamchanna

⁴ Paukam khat mai inle mi basam, a chawhal kit theina ding ah ka hiltheina dingin, Lalpa Pathian in lei ei pia tai. Jingkal si’n leh ka nakhang chu, zilsak ah umte gual ah hethiam thei dingin, ei phawnghal zing a.

⁵ Lalpa Pathian in ka nakhang ei hi’vâk piak ta’n; tichun, thukhel ta lo in, kihei mang kit ta pua’ng ka.

⁶ Ei vawte ma-âng in ka nungjang ka daw in, ka khamul ah ei mante kiang in, ka ngeibiang le ka daw hi; ei hosia leh a chil ei siatkhumte âng in, ka mai ka sêl puai.

⁷ Lalpa Pathian in ei panpi hi; ziaziakchun, sukminsiat ah umlo ka hi; tichun, ka mai chu meisuang gual in, ka daw ngam ta’n, sukmualpho ah umlo ding ka hi ti ka hia’i;

⁸ ka chung ah vaihawmtu chu a nai hi. Kua a hem ei nial thei ding? Kua la hiu em ei nial ngam? Hung un kimaitua hitiu. Ei hun he him him tiam un.

⁹ Ei panpipa chu Lalpa Pathian ahi; kua a hem thiam lo ei chansak ding? puan gual in hung chul intiu in, nget in hun ne zo ta’n a.

¹⁰ La lak ua kua’n Lalpa kicha, a suakpa thu ngaitha, vak nei lo ah thim nuai ah chia a, Lalpa min suang zing ah, a Pathian ah kinga zing la um awm?

¹¹ Himaleh, la leng un mi hâlna ding a, mei sêmkuang la hiu. La mei sêmkuang leh la meiâm un, nang uh hun hâl in, hun bî ta hen! Zia hi ka khut ah kipat la tuak ding uh chu hi’n a; gawtna thuak in um den ta’n lau.