ISAI 49 - PATHIAN LEKHABU THIANGTHO (BSI)

Pathian Suakpa Nasep

¹ Tuisuagiat pang ah mite haw, ngai unla, gamla tak ah nam tinte haw, a la ngai tiam un! Ka piandaw ma’n Lalpa‘n ei la ko ta’n, ka nu sûl ah ka um lai ah kipat in, ka min a la phuak zo tai!

² Ka kam hi chemjam hiam tak gual in a siam a, a khutpêk lîm nuai ah chun ei sêlgu tai; thalchang kinawtval tak gual in ei siam a, a thalbawm sung in ei sêlmang tai.

³ Chuleh, ka kiang in, “Nangma hi ka suakpa, chawihoi ah ka umna ding, Israel chu la hi,” a ti’n.

⁴ Himaleh, keima’n, “A gimthawn ka hi tai, bangmalo ding leh a thawn ding bep in, ka hatna zosia ka la mang zo tai; ahi’n la, ka chung thu chu Lalpa ah um ahi’n, ka sepgim ga chu ka Pathian kiang in a um hi,” ka la ti tai.

⁵ Chuleh, tu’hin, a suak hiding ah, sûl ah ei la siampa Lalpa chun, Jakob a kiang ah puikitna ding leh, Israel a kiang ah pui khawm kit theina dingin, Lalpa mit mu ah lûl tak ka hiziak leh, Pathian chu ka hâtna ahi tâk ziakin, ka kiang ah zia gual hin a gen hi:

⁶ Israelte lak ah a suakcha sunte tundin kit ah, Jakob namte photdin kitna ding ah, ka suak ah la pan hi thil bailam ahi puai; kawlkil tiang ah mite kiang chan ah, ka hukdamna a tun theina dingin, namtin salvâk dingin hun siam ding ka hi.

⁷ Israelte Tandokpa leh a Mithiangtho, nam tinte musit leh ki’dak ah um, vaihawmte suakpa Lalpa chun zia gual hin a gen hi: “Lengte’n la pawtdok uh mu’n dingdok intiu in, lalte’n hun mu’n, la ma’n bokkhup in au. Lalpa ginum leh, Israel Mithiangthopa’n nang uh, hun têldokpa ziakin,” ti in.

Zion Chanute In lam Tutkitna

⁸ Lalpa‘n zia gual hin a gen a: Doisakna hun in ka la dawnhu a, hukdamna ni hin ka hun panpi tai; gam nutsia sa lua kit ding leh, go ah lua ding gam chu hawm piak dingin, nam tinte â ding ah thuthung gual in, hun pia ding ka hi.

⁹ Suangkul tângte kiang in: “Hung pawtdok un,” a ti’n; thim lak ah umte kiang in: “Hung kilangdok un,” a ti’n. Lamlian dung ah ne malam pek intiu in, tâng gawchâk zosia chu, hampa hing phatna mun hita’n a.

¹⁰ A gil uh kial ta pua’n tin, a dang uh le châk ta pua’n a; hui lum tak leh nisapi’n kâng pua’n tin, amau lainatpa chun pui intin, luipi luang geijul ah kaibât ta’n a.

¹¹ Tichun, ka tâng chung zosia chu, lamlian suaksak ta’ng ka tin; ka lamlian gunte chu, hi’sâng ing ka.

¹² En in, ziate chu gamla tak ah kipat hung ding a hiu, a la ngai in, ziate chu mallam ah kipat, tumlam ah kipat leh, Syene gam ah kipat hung ding a hiu.

¹³ Aw vante haw, kipak in La sau in, aw khawvel, lim ta’n; aw tângte haw, La sa’n hung kikodok un! Lalpa‘n a mite a thamuan ta’n, genthei thuakte chung in, a lainatna tunsak ding ahi ta’ngal a.

¹⁴ Himaleh, Zion in vang, “Lalpa‘n ei nusia ta’n, ka Lalpa‘n ei hemil tai,” a tii.

¹⁵ Numei in a cha nawichep lai a hemil thei em? Ama sûl ah piang ngei ngei chu, lainatna nei lo in um thei ding a hem? Amau chun hemil thei ziangleu le, ke’n vang hun hemil pua’ng ka.

¹⁶ En tiam in, ka khutpêk sung ah hin, ka hun zik lut la hi tai; la kulbângte chu ka ma-âng in a um zing hi.

¹⁷ Nang hun hi’sete sâng in, a hun sa’thakte chu a hatzawu a; tichun, nang hun chomnâmte chun, a hun taisan tau hi.

¹⁸ Hung khawdak inla, hun en vêl tiam in; a kikai khawm un, la kiang a hung tung tau hi. Lalpa chun, “Ka hin ziakin, ziate chu kicheina’n mang in la tin, mo kicheina gual in amau chu, kivanna’n mang in la,” a tii.

¹⁹ La mun se’sau, giauchangte leh, la gam suktawp ah umte chu, matheilo in chêng dim kit in, neu talua hun sa hial ta’n lau; nanghaw hun chomgamte chu vang, gamla tak in jam ta’n au.

²⁰ La lusûn lai tak ah piang, la chate chun la nakhang un: “Ka umnau a teltêp talua tai; chênna mun ding ei pia’n,” hun ti’n au.

²¹ Ziaphat chuleh, la lungguk in, “Ziate haw hi kua ei hun hinpiak a hitau em? Kei chu la chate sûn ah cha nei theilo, sal ah pui mang ah um leh, naw mang ah um ka hita’n, a leh, ziate haw hi kua’n a la kaitua ahi tam? Keima ngawn ah nutsia in ka la um ah, ziate haw hi khoi tak ah hung kipan a hiu em?” hun ti ta’n lau.

²² Lalpa Pathian in zia gual hin a gen hi: Nam tinte lam in ka khut lâm ing ka tin, mitin kiang ah ka tepte’na tâkdok ding ka hi; tichun, la chapateu chu hun âng pai in, la chanuteu chu hun liangkawlosot in lau.

²³ Lengte chu la pateu hung hita’n tiu in, lengnute chule a hun dontu la nuu hung hita’n au. La ma-âng un lei tual si hial in hung bokkhup intiu in, la kengpêk ua leivui nasan, hun liak thian piak ta’n au. Ziaphat chuleh, Keima hi Lalpa ka hi ti hun he ta’n lau; keima ei ngâkte chu mualpho ngai ngai pua’n au.

²⁴ Mihat khut ah kipat in kua’n a sa matsa, a chûdaw piak zo em? Lal gilo tak sal matsa, kua’n a hukdok kit thei awm?

²⁵ Himaleh, Lalpa‘n zia gual hin a gen hi: Mihat khut ah saltângte natiang ladok ing ka tin, lal gilo tak khut ah sal matte chule, tandok kit ding ka hi. Nangma hun do-te chu, keima’nle do ing ka tin, la chate chu hukdok ding ka hi’ngal a.

²⁶ Nang uh hun nuaisiate chu, amau taksaphe ma ma nêksak ing ka tin; zu a dawn gual un a thisan uh dawnsak ding ka hi. Ziaphat chuleh, mi zosia’n Keima hi, nang hun Hukdampa leh Tanpa, Jakob Mithiangtho, Lalpa ngei chu ka hi, ti hun hechian ta’n au.