ISAI 48 - PATHIAN LEKHABU THIANGTHO (BSI)

Pathian Chu Siampa leh Tandokpa ahi

¹ Aw Jakob Inkuan, Israel min ah kikote, Judah khâlbe’ kipat piangte haw, ngai un: Nangmau dikna ziak leh thutak ziak hilo in, Lalpa min ah kihâksial ta’n, Israel Pathian chu la ko ui.

² Khawpi thiangtho min ah kiminvua te, Israelte Pathian ah kinga ah, la kisaktheipi ma mau chu; a min, sepai honte Lalpa ahi.

³ Masang pek ah khan, ma lai ah thil tung dingte chu, ka la tâklang ta’n; ka kam in ka la gen ta’n, ka la hiatsak zo tai; phutlo in ka la bawl ah, a la guitung ta mai hi.

⁴ Nang chu mi lu’lul, la ngâwng chu thîk gual ah khau, la chalki chule sum-eng gual ah tak, ahi ti ka he ngal a,

⁵ A tîl ah kipat khan ka tâklang ta’n, a hung tun masang khan ka hun hil ta kha lam, “Ka milimte thilbawl ahi’n, ka milim siam leh sunthawte thupiak ah tung ahi,” la ti lona ding in.

⁶ La he suak ta’n; tu’hin zia zosia hi en ah, puangdok lo ding la hi em? Tu’hun ah kipat hin zia thil thak, la la het khâk lo thil kisêlgute chu, hun hiatsak pan ding ka hi tai.

⁷ Tu’ma ma’ chu ka siam ahi, tu’ma lam pek ah kha kisiam ahi puai; “Ka hetsa ahi tai,” la ti thei lona ding in, tu’ma khan la la he ngai puai.

⁸ A thawm gi la la het khâk nai lo, a thuthang le la la het nai lo, masang lai ah kipat khan la nakhang chu, hi’vâk a la hikha nai puai. Lepchia tak ah hun bawl ding la hi ti leh, la pian ah kipat him ah mi helmang hiding la hi, ti ka he ngal a.

⁹ Keima min ziakin ka lungnatna chu, ka tutâng tadi in, nangma ka hun paithâk lona ding in, la chung ah pâkchatna ka law khâk leh ti’n, ka kisûm tadi ahi.

¹⁰ En in, ka hun hâl thian la hi tai, dangka thîk hâl thian gual chu hilo in; sukgentheina meikuang lak in ka hun patep la hi tai.

¹¹ Ka min ziakin, keima min ziak bep in, zia gual chun ka bawl hi; ka min chu polche tak ah umsak ding ka hia a hem? Ka lopina hi midang kiang ah pelo ding ka hi.

¹² Aw Jakob, ka têlchuam Israel, a la ngai tiam in: Keima hi ama chu ka hi’n, a masa pen ka la hi’n, a nunung pen le ka hi.

¹³ Ka khut hin lei kingakna suangphûm chu ka la lem in, ka khut changlam hin vante khi ka la kaimal tai; amau chu ka vak ko si’n leh, ja tak in a hung ding sek ui.

¹⁴ La leng un kikokhawm unla, ngai un! A lak ua kua pen in zia gual thilte hi a gen lang kha em? Lalpa‘n ama chu a hepi ah; Babulon chung ah a thiltup mualsua intin, a khutbân chu Kaldaite chung in hun tha ta’n a.

¹⁵ Keima, keima ngei hin ka la gen ta’n, ka la ko ta ahi; amau chu ka hun pui ah, a chiana lampi chun hampha’n a.

¹⁶ Ei hun nai unla, zia hi he tau in! A tîl ah kipat khan a gûk in ka gen pua’n, a hung um ah kipat in ka la um tai. Chuleh, tu’hin Lalpa Pathian in, a thagau ei pia’n, ei sawl tai.

¹⁷ Nangma hun Tanpa, Israel Mithiangtho, Lalpa chun zia gual hin a gen hi: Keima hi Lalpa la Pathian, la phatna ding ah hun hilpa, la chiana lampi hun kaibâtpa chu ka hi.

¹⁸ Ka thupiakte kha a la ngaisak hitama lechin aw! La vangphatna chu luipi luang gual leh, la lawtinna chule tuisuagiat kinawk gual in um ta’n tin;

¹⁹ la hin la choite chu piaunêl gual ah tam in, la suan leh pâkte chule suangchang jat hita’n au; a min uh thaimang in um ngai pua’n tin, ka ma-âng ah kipat hi’mangthai in, umlo ding hive’n.

²⁰ Babulonte ah kipat pawtdok unla, Kaldaite ah kipat in tai mang un; kipak tak ah kiko in, “Lalpa‘n a suak Jakob chu a hukdok tai,” ti’n, kawlkil tiang in genjak unla, va puangjak tau in.

²¹ Gamkeu ah a puithen lai inle a dang uh a châk pua’n; amau â dingin suangpi kipat in tui a luan dawsak in; suangpi khen kêk in, zia kipat chun tui a luangdok tai.

²² “Mi nunsiate â dingin, thamuanna him him a um puai,” Lalpa chun a tii.