ISAI 43 - PATHIAN LEKHABU THIANGTHO (BSI)

Vênbit Ding Thutiam A Bawl Pathian in A Mite Tundin Kit Ding leh Vênbit Ding Thutiam A Bâwl

¹ Himaleh, aw Jakob, nangma hun siampa, aw Israel, nangma hun guanggalpa, Lalpa chun zia gual hin a gen hi: Lau him him kin, ka hun tandok ta’ngal in; la min in ka hun ko ta’n, keima â la hi.

² Tuili thûk la hawthen tak leh le, hun umpi ing ka tin; luiliante hawtheng lechinle, hun chup pua’n tin; meikuang paltheng ma lechinle, hun kâng diak pua’n tin; meikuang in hun kângtum lo ding ahi.

³ Lalpa la Pathian, Israel Mi Thiangthopa, a hun hukdokpa chu ka hi’ngal a. Nangma kitatdawna dingin, Aigupta gam chu ka pedok ta’n, nangma thatheng dingin, Ethiopia leh Sheba gamte hi ka pedok tai.

⁴ Ka mit mu ah lûl tak leh, ja-um tak la hi tâk ziakin, ka hun hepi a; tichun, la thatheng ah thuak dingin, nam dangte ka pedok in, la hinna tawh kitheng dingin, nam tinte chu ka pedok ta ahi.

⁵ Lau him him kin, ka hun umpi ngal a; la suante chu sualam ah kipat in, hun pui khawm ing ka tin, tumlam ah kipat inle hun pui khawm ding ka hi;

⁶ mal gam kiang in, “Hun pedok un,” ti’ng ka tin; sim gam kiang inle, “Tuchak ta kiu in, gamla tak ah kipat in ka chapate chu hun pui unla, leimong lam ah kipat in, ka chanute hun pui khawm tau in,

⁷ ka min ah kiko mimal tin chu, ka lopina ding ah ka siam leh, ka la bawlsa la hiu,” hun tiding ka hi.

⁸ Mit nei ngal ah mutheilote leh, bil nei ngal ah hetheilote chu hun puidok un!

⁹ Nam zosia chu hung khawm uh hen la, chi tinte chu hung kikhawm tau hen. Zia thil hi hun tâklang thei leh, thil umsate ei hun genlawk piak thei, la lak un kua la um awm? A dik dan hiatpite hun puidok uh hen la, chutichun, ngai uh hen la, “A dik hi,” ti tau hen.

¹⁰ Nanghaw hi ei hiatpite chu la hiu a, ka nasemtu ka hun têldaw la hiu a, keima hi lei hun het ua, lei taksan theina ding uh leh, ama chu Keima hi ka hi ti, lei hetchianna ding un, Lalpa‘n a ti ahi. Ka masang ah hin pathian khat chale, siam a la um pua’n, ka nung inle um diak lo ding ahi.

¹¹ Kei, Keima hi Lalpa chu ka hi, Keima tilo ngal hukdampa dang a um puai.

¹² La lak ua pathian dang a umlo ziakin, Keima ngei in tâklang in, hukdam in, ka puangdok tai; chuleh, nanghaw chu ka thu hiatpite chu la hiu; Lalpa‘n a ti ahi.

¹³ Keima hi Pathian ka hi’n, tu’kipat in Ama chu ka hi zing hi; ka khut ah kipat ei lâkpiak thei kuama a um puai; keima’n ka bawl lai chu kua’n ei nang thei ding a hem?

¹⁴ Lalpa, nanghaw Tandokpa, Israel Mithiangtho chun: Nangmau ziakin Babulon ah mi sawl ing ka tin, a khawpi kul zosiau hisia’n, Kaldaite limna husa chu Kâ La’n theng ding ka hi.

¹⁵ Keima Lalpa, la Mithiangtho uh, Israelte Siampa leh la Lengpau chu ka hi.

¹⁶ Tuisuagiat lak ah lamlian siam ah, tui hat tak lak ah lampi siampa,

¹⁷ sakol leh a kângtalai, sepai leh gâlhat hun puidok ah; a chu suk un, thodok kit talo ah, thaumei kimutmit gual ah hi’mitpa, Lalpa chun zia gual hin a gen hi:

¹⁸ Hun chiasa thilte kha hezing ta kin la, nidang lai hun luite kha le ngaitua ta kin.

¹⁹ Thil thak khat hun bawl ding ka hi; tu’hin a hung dawndok tai, muthei nai lo la hiu em? Gamthip ah chun lamlian hun bawl ing ka tin, gamkeu ah chun luiliante hun luan sak ding ka hi.

²⁰ Gamlak sate’n ei hun ja intiu in, si-al leh vagawlsauten le ei hun ja ta’n au; gamthip ah tui ka piak ah, gamkeu ah luiliante luansak in, ka mi têlchuamte dawn ding ka piak ah,

²¹ ka mipi hiding ah ka siamte, ka pâkna tâklang dingte dawn ding ka piak tâk ziakin.

²² Aw Jakob, a chuti sapi’nle lei ko nuam pua’n, aw Israel, lei ningtel nalai sêt hi!

²³ Hâlmang thillat dingin la belam lei pia ngai pua’n, la thil latte ah chunle jana lei pia puai. Thil latte ah puakgik ka hun guan pua’n, gimtui hâlna’nle ka hun hi’gim puai.

²⁴ Kêlzu thum tak lei chawk piak kha pua’n, kithoina gancha thau inle, ka lungkimna ding la bawl kha puai. Himaleh, la gitlonau puakgik lei guan un; la khawlonau ziakin lei hi’tha chawl ui.

²⁵ Kei, Keima ngei hin, ka min ziakin la bawlkhialnate ka thai mang ah, la gitlonate chu hezing talo ding ka hi.

²⁶ Ei hun hêk inla, thutanna mun ah chia hi ti; la dikna hi’lang dingin, la thiamchanna thu hun gen in.

²⁷ La suantu bul pen in thil a la hi’khial ta’n, la paulettuteu inle thil a la bawl khial zo tau hi.

²⁸ Ziaziakchun, mun thiangtho ah, miliante chu ka hun hi’buak ta’n, Jakob chu siatna tuak dingin ka pedok ta’n; Israel chule mite daichâkvai dingin ka pedok ta ahi.