ISAI 42 - PATHIAN LEKHABU THIANGTHO (BSI)

Lalpa Suakpa, Namtin Salvâktu

¹ Ngai un, ka suakpa, k eima tundaw, ka têlchuam leh ka lungdamna ma ma chu; a chung in ka thagau ka koi ta’n, namtin chung in vai hun hawm ding ahi.

² Kiko pua’n tin, aw sâng inle pau pua’n a; khawlai ah hetkham inle husa nei pua’n a;

³ mi vokna luangkang thiakbong pua’n tin, thaumei de liak liak chule mut mit diak pua’n a; ama’n dik tak ah vaihawmna hun pan in a.

⁴ Khawvel ah a vaihawmna a dindaw masia, chautha pua’n tin, lungthuai diak pua’n a; thialkâl gam ah mite’n a thuhilna chu a la ngak zing ui.

⁵ Lalpa Pathian, vante siam ah kaipalpa, lei jak pal ah a sung ah um zosia umsakpa, a chung ah chêng mipi zosia hinna pepa leh, a sung ah chia lumlet zosiate thagau pepa chu:

⁶ Keima, Lalpa chu ka hi’n, dikna’n ka hun ko in, la khut in ka hun tûk in, ka hun vêng bit hi; nam tinte â ding ah thuthung hiding in ka hun pia’n, namtin salvâk ding leh,

⁷ mitthûmte mit hi’vâk piak ding, suangkul tângte hukdok ding leh, suangkul thim lak ah umte puidok dingin.

⁸ Keima hi Lalpa chu ka hi’n, zia chu ka min ahi; ka lopina kuama ka pepua’n, ka choihoina chule milimte kiang in, ka pe ngai puai.

⁹ En un, thil masate chu a bei kawm ta’n, thilthakte chu ka hun tâklang tai; zia thilte chu a hung tun ma’n, a um ding dan chu ka hun hil la hiu, a tii.

Pâkna Lâ

¹⁰ Lalpa pâk in La thak sau inla, kawlkil langkhat lam ah kipat, a langkhat lam tiang in pâk tau in! Tuisuagiat leh a sung ah chêng zosia, tuikual gam leh a sung ah chêng zosia’n le, a awu sua chiat tau hen.

¹¹ Gamkeu leh a sung ah khawpi zosia leh, Kedar ah chêng zosia’nle a awu suau hen la; Sela ah chêngte’n kipak in La sau hen la, mual vûm ah kipat in hung kiko chiat tau hen.

¹² Lopina chu Lalpa piau hen la, tuikual gam tin ah a pâkchatna, puangjak chiat tau hen.

¹³ Sepai hangsan tak gual in Lalpa chu a kipan in, gâldo ah kuan gual in a kihântaw hi; a kiko in, ngai tak in a kiko hi, a hat dan a gâlte chung in a etsak tai.

¹⁴ Hun sawt tak chu ka thip hiat hiat a, tawilok lo ah um in, ka la kisûm tun tun ah; tu’hin vang, numei nauvei gual in kiko ta’ng ka tin, halâ tak leh hatdong in um ta’ng ka.

¹⁵ Mual leh tângte hun nuai ing ka tin, a chung ah hamhing zosia keugawpsak ta’ng ka; luipite chu thialkâl suaksak ing ka tin, dilte chule keusak ing ka.

¹⁶ Mitthûm chu lamlian hetkhaklo’na kaibât ing ka tin, a lampi hetkhâk lonau ah chun pui huai ding ka hi. A ma-âng ua thimna zosia vaksak ing ka tin, lampi phot lek luk chu hi’nâm piak ding ka hi. Zia thilte chu bawl piak ding ka hiziak in, amau chu nusia lo ding ka hi.

¹⁷ A milim siamkawm ua kinga, a milimteu kiang ah, “Nanghaw hi ka pathianteu la hiu,” ti zosia chu naw kit ah um in, mualpho ta’n au.

¹⁸ Nanghaw bengngongte haw, ngai unla; nanghaw mitthûmte haw, hung khawdak unla, en un!

¹⁹ Ka suakpa sâng ah mitthûm zaw leh, ka tângsam ah ka hun sawlpa sâng ah, bengngong zaw kua a hem um? Ka mi têlchuam gual ah mitthûm leh, Lalpa nasempa tuk ah mitthûm a um em?

²⁰ Thil tam tak a la mu ta maleh, a la ngaisak pua’n; a nakhang a vâk ta’n, himaleh, bangma a he diak puai.

Israelte Thumatlonau

²¹ Lalpa chun a dikna ziakin, a zilsakna choisa’n ah suklopi chu a lung lam tak ahi.

²² Himaleh, zia mipite hi suam ah um leh, gâl lâk ah lâk ah umsate chu a hiu a; a leng ua pum ah kia leh, suangkul ah sêlgûk ah um a hitau in; matsa a hitau ah, amau hukdaw gua’, “Ei hun Pedok un,” ti ding mi a um ta puai.

²³ La lak ua kua la hiu em zia thu ah nakhang hun daw ah, thil hung tung ding ngaisak tak ah, a la ngaitha zing ding kua la um awm?

²⁴ Jakob chu kua’n gâl hing ah mat ding ah pia’n, Israel chu suammangte khut ah kua’n a la piak a hem? A chung ah I la gitlonau, a lampi I zui tâk lo uh, a dan le I la zop tâk lo uh, Lalpa chu hilo a hem?

²⁵ Ziaziakchun, a chung un a lungnatna meiâm leh, a gâldo’na lungnatna huaisia a hun butthâk khum tai; a kîmvêl ah mei hun sêmkuang maleh, a hethiam diak pua’n; ama a hun kâng kha hial ta na’n, a ngaikhawk diak puai.