ISAI 40 - PATHIAN LEKHABU THIANGTHO (BSI)

Pathian Mite Thamuanna Thu

¹ La Pathian un, “Thamuan unla, ka mite chu thamuan un,” a tii.

² Jerusalem kiangah chun aw nem tak in thugen un: A thok gimnau kum a ting ta’n, a gawtna ding uh piak zaw a hita’n, a gitlonau zosia thukna chu, Lalpa khut ah kipat in a lêni’n a mu kit zo tai.

³ Aw hung gi chun: Gamthip ah Lalpa lamlian ding bawl tup unla, gamkeu ah chun I Pathian â dingin lamlian bawl zang un.

⁴ Guamkuak zosia vuk sân hihen la, mual leh tâng zosia sukniam hi hen; a lei kituaklonate chu siam tuak hihen la, a photnate chule suknâm hihen.

⁵ Ziaphat chuleh, Lalpa lopina chu hung kilang ta’n tin, mi zosia’n zia chu hun mu chiat ta’n au, ti’n Lalpa kam in a la gen ta’ngal a.

⁶ Aw khat chun, “Kikodok in,” a tia; “Bang gen ah kiko ding ka hem?” ti’n ka dawnhu a. Mi zosia hi hampa gual a hiu in, a lopinau chule gamlak pakcha gual bep ahi.

⁷ Lalpa hun a hun mût phat leh, hampa chu a vuai ah, pakcha le a tuai sek hi; mi zosia hi hampa gual chu ahi takzet ui.

⁸ Hampa chu a vuai ah, pakcha chu a tuai sek hi; himaleh, I Pathian uh thu chun vang, kumtuang dai ding ahi.

⁹ Aw Zion, chanchinpha hun tuntu, mual sâng chung ah kal to in. Aw Jerusalem ah chanchinpha hun tuntu, a ngai thei pen in kiko inla, kikodok inla, lau kin; Judai gam ah khawpite kiang in: “La Pathian uh zia hin a um hi,” ti’n hil un.

¹⁰ En un, Lalpa Pathian chu thilhitheina tawh a hung in, a bân thahât in vai a hawm hi. En un, a kipakman chu a kiang in a um in, a thukna chun a kitonpi zing hi.

¹¹ Belam chingpa’n a belam hon an a piak gual in an a pia’n; belam note a khut in pâi khawm intin, a ângkawm ah pâi in, a belamte chu jaidam takin kaihuai in a.

¹² A khutpêk kuak in tuisuagiat a te’ a, a khâp ah vânte te’ a, kua’n lei chung ah leivui zosia pawcha te’ in, mualte gik dan bûkna’ bûk in, tângte gik dan bûkna lian ah kua’n a bûk ngai em?

¹³ Lalpa thagau nasep ding dan kua’n a kawkmu ah, ama thuhil in kua a pang ngai ah a hem?

¹⁴ Ama hilpilna dingin kua a dong kha’n, vaihawmna dik kua’n a hil ngai awm? Kua’n hetna a hil kha ngai ah, hiatthiamna lampi kua’n a kawkmu kha him him awm?

¹⁵ Namtin hile bâltin ah tui vat khat gual bep a hiu in, bûkna te’na kuak ah leivui bek gual bep a hiu; en un, ama’n thialkâl gamte hi, leivui nêl gual bep in a ladok sek hi.

¹⁶ Lebanon tânggam ah thing in, a mâichâm thing ding dai pua’n tin, a gam ah gancha umte’n le, hâlmang kithoina ding dai zo pua’n au.

¹⁷ Nam zosia hile a ma-âng ah bangma kham lo a hiu; bangma kham lo leh a umlo gual bep ah ngai a hiu.

¹⁸ Pathian chu kua tawh la te’ a, ahiloleh, bang lim tawh a kipua em?

¹⁹ Milim maw? Mi khutthiam in a siam a, sana siampa’n sana tui luan khum in, dangka khaidiat le a bawl piak a.

²⁰ Sana leh dangka thîk nei zolote chun, a muat theilo ding thing a hawl un; sevak ziang lo ding ah milim bawl piak ding, mi khutthiamte a hawl ui.

²¹ A la he’kha lo la hem? he’kha lo lai la hem? A lim ah kipat a hun hil puau ah a hem? Lei kisiam lim ah kipat a la hethiam nai lo la hiu em?

²² Leilung huap phâk khêl lam ah, lal chutpha sâng tak in a kichu hen, a mipite chu khauphak hon a bang ui. Puanjak gual in vânte khi a kaipal in, chênna ding puanbûk gual in a kaimal hi.

²³ Lal chate chu bangmalo in a koi in, khawvel gam vaihawmte chu bangmalo mai in a siam hi.

²⁴ Phû ahi masang leh, tû ahi masang leh lei ah a zung uh a thâk masang un, a chung uh a hun mût sak phatin, a vuaitha zo tau ah; busi gual in huipi chun a tokmang tai.

²⁵ Kua tawh lei têpi diam uh? Kua a hem ka kibatpi? Mi Thiangthopa chun a tii.

²⁶ La mit uh te sâng unla, en tiam un; zia zosia chu kua siam a hem? Amau siampa chun aksi honte a mal mal in a tiam ah, a min chiat un a ko hi; a hat ma ma ziak leh, a thilhitheina chungnun ziakin, pakhat chale a hi’khial puai.

²⁷ “Ka buaina hi Lalpa‘n a he’pha pua’n, ka chung thu hi ka Pathian in a ngaisak ta puai,” bang ding ah Jakob in ti’thei ah, Israel in zia gual ah chu gen thei la hiu em?

²⁸ He’kha lo la hem? A la he’kha nai lo la hem? Lalpa chu Kumtuang Pathian ahi’n, kawlmong tiang Siamtu chu ahi. Ama chu chau ngai lo leh chawl ngai lo ahi; a thil hiatthiamna chu suidaw ding gual ahi puai.

²⁹ Tha chaute chu hâtna a pia’n, mi hâtlote a suhat hi.

³⁰ Khangdawng nalai nasan a chawl un, a chautha thei un; khanglaite chule hung sawlsam in kilîk in au;

³¹ himaleh, Lalpa ngâkte chu, a hatnau sukthak piak ah um in, mupi gual in a tha un leng sâng intiu in, tai intiu in, maleh, chawl pua’n au; lam zawt zawt maleu le basam diak pua’n au.