ISAI 38 - PATHIAN LEKHABU THIANGTHO (BSI)

Hezekiah Damlona

¹ Zia hun lai ah chun Hezekiah chu thi tavang ah damlo gim in a um a. Amoz chapa jawlnei Isai a kiang ah hung in, zia gual hin a hung gen a: Lalpa‘n zia gual hin a gen hi: “La Insung sutûp in, thi ding la hi ta’ngal in; damdok talo ding la hi,” vati’n, ti in a gen a.

² Ziaphatchun, Hezekiah chun bâng lam nga’n, Lalpa kiang in zia gual hin a pauchap ta’n:

³ “Aw Lalpa, tu’hin hezing in, ka lungthim zosia’ ginum tak ah la mit mu ah ka umdan leh, la mit mu ah thilpha bep ka bawl sek dante hi hezing in, ti’n ka hun ni hi,” a tia. Tichun, Hezekiah chu ha-kâ in a kap tai.

⁴ Ziaphatchun, Lalpa‘n Isai kiang in:

⁵ Chia inla, Hezekiah kiang in: Lalpa, la pa David Pathian chun zia gual hin a gen hi vati’n, ti’n a sawl a: La pauchapna ka la he ta’n, la mitthi tuite le ka la mu tai; la damsung kum sawm leh nga hun belap piak ding ka hi.

⁶ Nangma leh zia khawpi hi, Assuriate lengpa khut ah kipat hukdok ing ka tin, zia khawpi hi vêng bit ding ka hi.

⁷ Lalpa‘n bawl ding ah a tiamsa chu bawl ngei ngei ding ahi ti la hettheina ding ah, Lalpa ah kipat nang â ding ah tepte’na chu zia hi ahi:

⁸ “En in, Ahaz in nisa hunbî a tepte’na, a liasa chu, kãl sawm tiang in hung kinung tawlsak kit ding ka hi,” a ti’n. Tichun, nisa’n a nutsiana nung chu kãl sawm tiang in a kinungtawl kit tai.

⁹ Judai gam ah lengpa Hezekiah in, a damlona kipat a hung damdaw kit nung in, zia gual hin lekha’n a zik a:

¹⁰ Ka vanglai tak in, thi’na kotkhak ah lut theng ding ka hita hi aw, ka hun um nalai cheng hile, Sheol kotkhak sung ah mang zo mai ding ka hita dia aw?, ka la ti hen.

¹¹ Mihingte gam ah hin Lalpa chu mu kit ta pua’ng ka tin; khawvel ah chêng nalaite lak ah hin, mihing kuama mu kit talo ding ka hi, ka la ti’n.

¹² Belamchingte puanbûk gual in, ka chênna In chu phiat ah um in, keima ah kipat lâk mang in a um ta’n; puan-gatte’n a puan ga lai a zial daw gual un, ka hinna ka zialdok ta’n; puankol ah kipat ei ât tan ta’n tin; sun kâl a hem, jan khat kâl a hem ah, ka hinna hi’tawp mai ding hi’n la, ti’n ka ngaitua a.

¹³ Jan khawvak tiang in panpi don in ka pauchap a, ahi’n, sakeibaknei gual in ka gu zosia ei hi’bot piak tai; sun si’n, jan si’n in ka hinna lamang ziang dingin ka ngai a.

¹⁴ Pialpîm a hem, Vakengsâng a hem gual in ka ngîk ka ngîk a; Vakhu gual in ka thûm lît lît hi. Chung lam ka thîlna lam in ka mit a kham zo tai. Aw Lalpa, tawden in ka um tai, ka bitna hung hita’n!

¹⁵ Bang gen thei ding ka nei em? ama’n ka kiang in thu a gen ta’n, ama’n a bawl ahi ngal a. Ka lungthim genthei ziakin, ka ipmu thei ta puai.

¹⁶ Aw Lalpa, zia thilte ziak ah chun mihingte ka dam un, zia thilte zosia ah chun ka hinna thagau a um hi. Aw, hisêlna ei pia kit inla, ei hinsak nalai in!

¹⁷ Zia gual ah haksatna ka tuak chu, kei â dingin thil pha ahi ngei hi. Ka gitlona zosia la nung lam ah la pai mang tâk ziakin, siatna khûk ah lut lo dingin, ka hinna la nungkai kit tai.

¹⁸ Sheol in la kiang ah kipakna châng a hepua’n, thina’n le a hun pakcha thei paw’ngal a; Khûk thim ah lût zosia’n, nangma ah kinepna a nei thei ta puai.

¹⁹ Tu’ni ka hun pâkchât gual in, a hingte chun, a hing nalaite ma ma chun, a hun pâkcha sek ui; pu leh pate chun la ginum zia, a chateu kiang in a hilsawn ui.

²⁰ Lalpa chun ei hukdam intin, tichun, Lalpa In ah chun, pêkgit thei tawh, nangma pâkchâtna La, ka damsung zosiau ah hin, sa ta’ng kau.

²¹ Isai in, “Theichang ga gawt nawn unla, a natna ah chun bek un; tichun, damdok kit ziang ding ahi,” a la ti ta’ngal a.

²² Hezekiah inle, “Lalpa In ah chia to kit ngei ngei ding ka hi ti tepte’na ding chu bang a hem?” ti’n a la gen a.