ISAI 37 - PATHIAN LEKHABU THIANGTHO (BSI)

Hezekiah in Isai A Dotna

¹ Lengpa Hezekiah in zia thu chu a het phat in, a puante botthêk in saidip puan a sil ah; chuleh, Lalpa In ah chun a valût a.

² Lal In sung ah vaihawmpa Eliakim tawh, lekhaziktu Shebna tawh thiampute lak ah upa deu deute chu saidip puan sil pum in Amoz chapa, jawlnei Isai kiang in a hun sawl ta’n.

³ Isai kiang in zia gual hin a vagen tau a: “Hezekiah in zia gual hin a gen hi: Tu’ni hi lungkhamna, vauna leh simmaw ah umna ni ahi; chate hung piandaw hun chu a hita’n; ahi’n la, a piansakna dingin tha leh zung a um ta puai.

⁴ Lalpa la Pathian in, Assuria lengpa’n Pathian hing hosia ding ah Rabshakeh a hun sawl in, a thugen zosia kha a la he ta ngei intin; zia a thugen a het zosia dungzui chun Lalpa la Pathian in a la vau thuk kit ta hen. Ziaziakchun, nutsia ah a la umte â ding ah chun a la pauchap piak ta’n,” a tiu a.

⁵ Lengpa Hezekiah suakte chu Isai kiang a hung tun phat un,

⁶ Isai in a kiang un, “La puu kiang ah chun: Lalpa‘n zia gual hin a gen hi vatiu in, a tia: Assuria lengpa suakte’n ei demsiatna thu a gen uh la hiatteu chu lau him him kiu in.

⁷ A la ngai un! Amau ah thagau khat hun khum ing ka tin, thawmgi khat hiatsak ing ka tin, a gam lam un kile’kitsak ding ka hi; tichun, amau gam ngei ah chun chemjam ah that ding ka hi, ti’n vagen un,” a ti tai.

⁸ Assuria lengpa’n Lakhish a nusia tai ti thuthang a het phat in, Rabshakeh chu a chia kit ta’n; chuleh, a lengpau Libnah tawh kido lai tak a vatuak kha tau a.

⁹ Tu’hin, Lengpa Sennakherib in, Ethiopia Lengpa Tirhakah chu ama do ding in a hung kuan hi ti thuthang a la he ta’n. Zia thu chu a het phat phatin Hezekiah kiang in thangko a sawl a,

¹⁰ Zia gual hin, Judai gam ah Lengpa Hezekiah kiang in la vagen ding uh ahi: Jerusalem hi Assuria lengpa khut ah pelo ding ahi ti ah thutiam bawlpa, la kisuanpi, la Pathian chu kithep zawsak kin.

¹¹ Assuria lengte’n, gam dang zosia a la hisiat dim dem danteu kha a la he ta ngei ding la hiu a. Nang uh chu ama khut ah kipat suakcha ding ah kingai la hiu em?

¹² Ka pu leh pate’n a la hisiat uh, Gozan, Haran, Rezeph leh Telassar ah um Eden mite zosia khale a la hukdok thei pathiante a nei him him ua a hem?

¹³ Hamath lengpa, Arpad lengpa, Sepharvaim khawpi ah lengpa leh Hena lengpa; ahiloleh, Ivvah lengpa haw kha khoilam tung zo a hitau em?, ti’n, a gen a.

Hezekiah Pauchapna

¹⁴ Chun, Hezekiah in a thangko sawlte ah kipat chun lekhathot chu a mu ta’n, a sim ngal a; ziaphatchun, Lalpa In ah lût in, Lalpa kiang in a phaljak a.

¹⁵ Hezekiah chu Lalpa kiang in zia gual hin a pauchap ta’n:

¹⁶ “Aw, sepai honte Lalpa, Cherubte chung lam ah lal chutpha kichu Israelte Pathian, lei chung lenggam zosia lak ah nangma bep hi Pathian la hi; nang in lei leh van hi la siam a.

¹⁷ Aw Lalpa, keima lam ah la nakhang hun daw inla, ei ngaitha’n. Aw Lalpa, la mit hak inla hun en tiam in; Pathian hing hosia ding ah mi a hun sawlte ah kipat in Sennakherib thugente hi a leng in la he ta’n.

¹⁸ Aw Lalpa, Assuria lengte hin namtinte gam zosia a la hise zo tau hi, ti hi a dik hi,

¹⁹ chuleh, a pathianteu chule mei lak in a la se’lut piak zo tau ah, ziate chu pathian le chu a hipaw him un; mihing khutsuak, thing leh suang ah kisiam a hiziak un hisiat ah um him a hiu a.

²⁰ Tu’hin chu, Aw Lalpa, ka Pathian uh, lei chung lenggam zosia hin nangma bep hi Lalpa la hi ti a hettheina ding un, ama khut ah kipat hin ei hukdok in,” ti’n a pauchap a.

²¹ Ziaphatchun, Amoz chapa Isai in Hezekiah kiang in zia gual hin thu a thot ah: Lalpa, Israelte Pathian in zia gual hin a gen hi: Assuria Lengpa Sennakherib chung thu ah ka kiang ah la pauchap tâk ziakin,

²² ama chung chang ah zia gual hin Lalpa‘n a gen hi: Zion Chanu, nungak thiangtho, nang a hun musit ah, hun hosia ahi; Jerusalem chanu, la nung lam ah a luchang a hun thinkhum ta ahi.

²³ La simmaw ah la hosiat chu kua a hem? Kua dodâlna ding ah la aw khati sânsak ah, la mit kha khati têt sânten la hem? Israel Mithiangtho dodâlna ahi kha lam!

²⁴ La suakte mang in Lalpa chu la hosia ta’n: Ka sakol kângtalai tam tak tawh, mual sangte ah ka kaldok in, Lebanon tâng sânna pen tiang ka tung in; a sidar thing sâng pente chu ka phûk pai in, a châk thing îtchâk um cha cha chu ka phûk pai hi; a tângvûm gamla pen tiang ka tung in, a gammâng phatna pente chu ka tung hi.

²⁵ Tuikulte ka cho in, a tuite ka dawn tai; ka kengpêk in Aigupta gam ah, luicha tui zosia ka chuan kang tai, la ti hen.

²⁶ Malai pek ah kha ka la guanggalsa ahi tai ti, henai lo la hi em? Kulpi det nei khawpite chu, suang kisia khawm gual ah ka hun bawlsak hi, tuan ah tâng ah ka la guanggal sa, tu’hun ah ka guitunsak ahi.

²⁷ A sung ah chêng mipite chun, tha leh zung him him nei talo in; a lungdong un, a lungkham tau hi. Loulai ah hampa gual leh, hampa selthak no dik diak, In chung ah kekdok, piting man lo ah katvuai ah um kit ziang gual chu a hiu.

²⁸ La din, la chut, la kuan leh la tun, ka chung ah la lungnat dante chu, ka he sik sek hi.

²⁹ Ka chung ah la lungnatna leh, la husiat dan ka la het tâk ziakin, la nâk ah nâkkhau thun ing ka tin, kamkhau la mûk ah hun vua ding ka hi; tichun, la hungna lampi khan hun kai kit ding ka hi, ti in.

³⁰ Chuleh, zia hi Hezekiah â ding ah tepte’na hi’n a: Tu’kum chu bu li’kek ga ne’n la tin, a kum kit leh a sel kit gate ne’n la tin; a kum thumna phat leh, bu chîng in, ât in la tin; grep gui phut in, a gate chu hun ne’n lau.

³¹ Judah Inkuan ah mi, a um nalai sunte chun, nuai lam ah a zung uh tha’n, chung lam ah ga hun sua kit ta’n au;

³² Jerusalem ah kipat a thibang sunte hung pawtdok intiu in, Zion tâng ah kipat a suakcha honting tak pawtdok in au; sepai honte Lalpa phatchuam ngaina chun zia chu bawl ding ahi.

³³ Ziaziakchun, Lalpa‘n zia gual hin Assuria lengpa chung thu ding chu a gen hi: Zia khawpi sung hin hung lut pua’n tin, thalchang khat ziang le hung kâpdok pua’n a. A phaw le hun paw lut pua’n tin, khawpi lutna dinginle panmun hung bawl pua’n a.

³⁴ A hungna lampi chun kile’kit intin; zia khawpi sung hin hung lut him him lo ding ahi, Lalpa chun a tii.

³⁵ Keima ziak leh ka suak David ziakin, zia khawpi hi vêng in, humbit ding ka hi’ngal ah, ti in.

Sennakherib Guallelna leh A Thi’na

³⁶ Ziaphatchun, Lalpa vansawlchâk a hung kipandok ah, Assuriate giamun ah sepai nuai khat sîng giat leh sang nga a hung that ta’n; jingkal khua a hung vak phatin, mithi ngen a hitau a.

³⁷ Ziaphatchun, Assuria Lengpa Sennakherib chun a nusia ah, In lam ah kile’kit in, Nineveh ah chun a chêngden tai.

³⁸ Chuleh, a pathian Nisrokh biakna In ah a pathian ho pet in, a chate Adrammalekh tawh Sharezer in chemjam in a that un; amau chu Ararat gam in a tai mang tau a. Ama chapa Eshar-haddon in a thasâng in vai a hawm tai.