ISAI 33 - PATHIAN LEKHABU THIANGTHO (BSI)

Mêlmate Lak ah Kipat Hukdok Ding Genlawkna

¹ Nangma’n siatna tuak lo ah, midangte susepa leh kuama’n lepchia tak ah a bawl lo uh, nang in lepchia tak ah la bawl ziakin, la chung a gik hi! Nang in midangte hisiat la haisan phat leh, nangma chu hisiat ah um ding la hi; midangte lepchia tak ah la bawl lo phat leh, nangma chu lepchia tak in hun bawl in au.

² Aw Lalpa, ka chung un ja’ngai in, nangma ngâk ka hi’ngal un. Jingkal si’n leh ka hatnau hung hi’n la, lungdon phat si’n leh ka hukdamnau hung hita’n.

³ Kidona thawmgi ziakin, mipite a tai mang zo tau; la hung kipatdaw phat leh, namtin lau in a taichek zo tau hi.

⁴ Lungmul an ne gual in gâl lâk a chom khawm un; khaubepi chawm gual in, gâl lâkte lak in a chawm sau sau ui.

⁵ Lalpa chu choisa’n in a um tai, chung lam sâng tak ah chêng ahiziak in; Zion chu vaihawmna dik leh felna’n hi’dim ding ahi;

⁶ ama chu la hun leh phat kingakna, hukdamna kiningting, pilna leh hetna hung hi’ntin; Lalpa kichâkna chu a go hi’n a.

⁷ Ngai un, mihatte chu khawlai in a kiko ui; chamna thugen ding a palaiteu chu, a kap lût lût ziang tau hi.

⁸ Lamlianpite chu taisan zaw a hita’n, lamlian ah zin leh vâk tua a um ta puau hi. Thuthung bawsiat in a um ta’n, a hiatpite chule musit in a um un, mihing kija’na a um ta puai.

⁹ Gam chun a sûn ah a chautha tai; Lebanon chu mualpho in a vuaitha tai; Sharon chu Arabah gamkeu a bang ta’n, Bashan leh Karmel chun, a dua zosiau a thingtha tau hi.

¹⁰ Lalpa chun, “Tu’hin kipan ing ka tin, tu’hin kichawisâng ta’ng ka tin, tu’hin choisa’n in hung um ta’ng ka.

¹¹ Busi chu nau gual in la vop un, bupawl bep la hing sek ui; la hu pawt un meikuang gual in, nangmau ma ma hun kâng tum ding ahi.

¹² Chuleh, mipite chu vang, kât ah kihâl gual in hung um ta’n tin uh, hampa lingnei kisât tha, mei ah kihâl tum gual in hung um ta’n lau,” a ti’n.

¹³ Nanghaw, gamla tak ah umte haw, bang a la bawl ka hi em ti a la ngaithau in; nanghaw, nai tuam ah umte haw, ka thil hi’thei dan hi a la he tau in.

¹⁴ Zion ah migilote chu a lau tau a, pathian neilote chu a kithingse tau a: “Zia gual ah mi kâng mang thei meikuang lak ah hin, I lak ua kua a hem pang zo ding? Kumkhua meikuang lak ah chêng thei ding, I lak un kua I um awm?” a tiu a.

¹⁵ Kuale dik tak ah tawi ah, dik tak ah thugen a, mi neisa lâkpiak ah punna doi lo ah, gawlgûkna la’lo ding ah a khut kaimang ah, thisan sua’na ding thu hetkhâk ding lau ah kivêng sek ah, thil phalo mu ding nuam lo ah mitsîng sekte chu,

¹⁶ zia gual mite chu munsâng leh, thawveng ah chêng intiu in; a kisêlnau chu suangpi lak ah kulte chu hi’ntin, a nêk ding uh piak hizing intiu in, a tui dawn ding uh kang ngai pua’n a.

Leng Lopi Tak Lenggam Chu

¹⁷ La mit in lengpa mêlphatna mu’n la tin, gam lian tak kithung chu mu’n lau.

¹⁸ La lungthim ah la lau gûk zing uh: Paisa simpa chu khoi ah um a hita em? Thil gik te’pa chu khoi ah um a hita em? Gâlvênbûk jat tiampa chu khoi ah um a hita em? ti’n la lungthim un ngaitua zing ta’n lau.

¹⁹ Mi huham tak tak, a pau uh la het lo, a pau uh ngaidonle la hettheilote chu, mu kît talo ding la hi.

²⁰ I nunnop bawlnau khawpi Zion chu en tiam un! La mit un Jerusalem leh, a sung ah thamuang tak ah chêngte leh, chawn mang theilo ding puanbûk khat, a hênna molte bangtik ah le bawdaw lo ding leh, a khauhual tele sia ngai lo ding chu mu ding ahi ngal a.

²¹ Ziaziakchun, lopi tak ah um Lalpa chu, mêlmate pum jap thaw leh, long thupi takte’n a haw khak lo, ei uh â ding ah luipi leh, lui lian tak umna gam lian tak hung hita’n a.

²² Lalpa chu I chung ua thutanpa ahi’n, Lalpa chu I vaihawmpau ahi’n, Lalpa chu I lengpau ahi’n, ei hukhing ding ahi ngal a.

²³ La long puanlap hênna khauhualte a kikol zo ta’n; puanlap chu a um ding gual tak in, a kaichak zo ta puai. Ziaphat chuleh, sal ah mat leh, gal lâk thilte tam tak tak in kihawm intin uh; kengbai nasan gâl lâk thil chomkhawm in pang in a.

²⁴ Chun, a gam sung ah chêng kuama’n, “Ka dam puai,” ti ngai ta pua’n tin; zia khua chêngte chu a bawsiatnau ngaidam hita’n au.