ISAI 31 - PATHIAN LEKHABU THIANGTHO (BSI)

Aigupta Kizoppi A Phatchuam lo Dan

¹ Aiguptate panpi’na hawl ah chiasukte, sakol hatna kisuanpite, sakol kângtalai tam ziak ah kimuangte, sakol hat ma ma te muang ah, Israel Mithiangtho ngaisak lo leh, Lalpa ngaisaklote chu, a chung uh a gik na lawm lawm e!

² Ama chule a pil ah, siatna a tunsak sek ah, a kamsuak chu a la kit ngai pua’n, maleh, thil phalo bawl Inkuan chu, hun do ngei ngei intin, bawsiatna lam ah mi a la panpite chu, hun do ngei ngei in a.

³ Aiguptate chu mihing mai mai a hiu a, Pathian a hipuau hi; a sakolteu chule phe leh vo mai a hiu a, thagau a hipuau hi. Lalpa‘n a khut a hun lap phat leh, mi panpite tawh a panpiteu chu, pûk khawm chiat ta’n tiu in, a leng un mangthai khawm ta’n au.

⁴ Lalpa‘n zia gual hin ka kiang in a gen ngal a: Sakeibaknei, sakeibaknei vanglai in, a samat chung ah a kitum lai tak in, belamchingte chu a naw dingin a hon ah hung in, bang gual husa nei maleu, a lau diak lo gual un, Zion tâng leh a mual chung ah, sepai honte Lalpa chu, hung kuan suk ding ahi.

⁵ Vacha’n a bu chung sâng tak ah lêng ah, a note a venbit gual in, sepai honte Lalpa chun Jerusalem vêng bit ding ahi ngal a; vêng bit in, hukdok intin, hinghoi in humbit ding ahi.

⁶ Aw Israel mipite haw, nasa tak in ama a la do ta maleu chin, a kiang lam ah hung kile’kit mai tau in.

⁷ Zia ni phat chuleh, mi tin in la kiang ua la thîk milimteu leh, la sana milimteu, la gitlona khutsuakteu chu hun paimang ding la hi ta’ngal un.

⁸ “Ziaphat chuleh, Assuriate chu mihing chemjam hilo, chemjam in thi’n au; mihing chemjam hilo, chemjam in ne zo in a; chuleh, chemjam ah kipat tai mang in, a tangvalteu chu midangte suak in pang ta’n au.

⁹ A kulpi detdo takteu chu, tizat umna ziakin chim intin; sepai hotute’n le a panmunteu chu, lauthawng tak in nusia ta’n au,” ti’n, Zion ah meikuang leh, Jerusalem ah tummeipi Lalpa chun, a gen ta’ngal a.