ISAI 30 - PATHIAN LEKHABU THIANGTHO (BSI)

Aiguptate Ah Kingak A Phatchuam lo Dan

¹ Aw naupang thukhelte haw, ka ti lo gual ah thil guanggal ah, ka lung lo lam lam ah kithukoppi ding siam ah, gitlona a thua thua ah bawlte chung chu a gik na e! Lalpa‘n a ti’n.

² Kei uh dong lo in, Aigupta gam ah chia suk ding ah kipandok in, Pharaoh nuai ah vênbitna a hawl un, Aiguptate lîmbêl ding a vangaitua ui.

³ Ziaziakchun, Aigupta vênbitna chu, la zachaknau hung hi’ntin, Aiguptate lîm la bêl uh chu la mualphonau hung hi’n a.

⁴ Gam palaite chu Zoan leh, Hanes tiang tung hial ta maleu le,

⁵ amau â ding ah mipi panna bei, panpi thei lo leh a phatchuamna ding uh, bangma bawl piak theilote, zachatna leh mualphona bep tun theite a bêl ziak un, mi zosia chu mualpho ta’n au.

⁶ Negeb ah ganchate chung thu ah chunggikna hung tung ding chu: Lungkhamna leh lungjinna gam, sakeibakneipi leh sakeibakneichal hâm laite, gûlsia leh gûl lengtheite lak haw theng in, a nei leh lamteu sabiltungte puaksak in, a go thilteu chu sangawngsaute puaksak in, amau â ding ah phatchuamna bei mite kiang in vachia in au.

⁷ Aiguptate panpi’na chu phatchuamna bei leh, a thawn mai ahi ngal a; ziaziakchun, Aigupta chu, “Kichu hiat hiat Rahab,” ka sak tai.

Mi Thukhelte Chu

⁸ Tu’hin chia inla, a âng un suangpêk in sun inla, lekhabu’n zikdaw piak in; tu’nung phat leh, zia chu kumtuang ah amau hiatpitu ah, pangden ta ding ahi ngal a.

⁹ Amau chu mithukhel, chapa lepchia, Lalpa hilna thu ngai nuamlote ahi ngal un.

¹⁰ Zia mite chun, thil mulawk theite kiang in: “Bangma mu ta kin,” a tiu a; jawlneite kiang in, “Ka kiang un thudik bangma gen ta kiu in; thu ngainop um cha cha gen unla, ngaituana vantang mai mai gen un;

¹¹ zia lampi chu nusiau inla, lampi chu pet mangsan tau in; Israel Mi Thiangthopa chu ka ngai nuam ta puau hi,” tiu in.

¹² Ziaziakchun, Israelte Mithiangtho in zia gual hin a gen hi: Zia thu hi la musit ah, nuaisiana leh thukhelna suang ah la muan zawk ziak un,

¹³ ziaziakchun, nunsiatna chu, nang uh â dingin bâng sâng khikêk, kikêusa chimtha vang vang, hung chimtha phut ziang thei gual chu hi’n a.

¹⁴ A kêk kâl chu bêlvêlte bêl kêk jak dim dem, a hal meiâm luakna ding leh, tuibêl ah tui thâlna thei le, um talo gual hiding ahi.

¹⁵ Lalpa Pathian, Israel Mithiangtho chun, zia gual hin a gen ngal a: Hung kile’kit in chawldam leu chin, hukdam in um in la tiu in, thip hiat hiat in ei ging leu chin, hatna nei inla; ahi’n la, nang uh la nuam puau hi.

¹⁶ Nang uh chun, hilo e! Sakol ah chuang in jam ing kau, la tiu a; ziaziakchun, jam ma ma in lau; chuleh, Sakol tai hatte chung ah chuang ing kau, la tiu a; himaleh, a hun delzuite chu tai hat zaw ding a hiu!

¹⁷ Mi pakhat lau in mi sang khat jam in la tin uh, mi panga lau in tângvûm ah diallap khuam gual leh, tângsip ah tepte’na diallap tawhbang ah, nutsia la hi masangsiau tai mang zo ta’n lau.

Zion  Ding ah Pathian Thutiam Chu

¹⁸ Ziaziakchun, Lalpa‘n lainat tak in nanghaw a hun ngak zing a, ziaziakchun, a zainemna hun etsak dingin, ama a kichawisâng hi. Lalpa chu dik tak ah vaihawm Pathian ahi ngal a; ama ngâk zosia chu mi hampha a hiu!

¹⁹ Aw Jerusalem ah chêng Zion mipite haw, kap ta pua’n lau. La kâ thawm uh chu hia’n lainat intin, a het phat phat leh hun dawnhu ngal ding ahi.

²⁰ Lalpa‘n kihuatna vaithum leh, sukgentheina tui hun pe maleh, la zilsakpau chun hun kisêlmangsan ta pua’n tin, la mit un la zilsakpau chu mu zaw ta’n lau.

²¹ Chuleh, la changlam a hem la veilam a hem ah la kiheina’n, la nung lam ah thu kigen la nakhang in hia’n tin, “Zia lam hi ahi a lampi, zia lam hi haw in,” ti in.

²² Ziaphat chuleh, dangka tuiluan ah milim kisiamte leh, sana tuiluan ah milim kisiamte chu hun khên tel ta’n lau. Puansia ki’dak um tak gual in pai mang in, “Pawt mang tau in,” hun ti ta’n la.

²³ Lei ah la thâichi tûte â dingin gua hun zuksak ta’n tin; chuleh, lei in ga a hun suadaw chu tam tak, tui tak takte ngen hung hita’n a. Zia ni phat chuleh, la ganchate hampa phatna gam lian leh kiningting tak ah chun ta hiat hiat ta’n au.

²⁴ Loukai ah pang bawngchalte leh sabiltungte chunle, bujêpna mol leh phajâp ah kijâp thiangsa bu gate chu ne ta’n au.

²⁵ Kitha’na ni huaisia chu a tun phat leh, gâlvên bûk zosia chimtha ta’n tin, mual lian zosia leh tângsâng zosia ah kipat in luichate chu hung luangdok ta’n a.

²⁶ Zia bep chule hilo in, Lalpa‘n a mite liamna a tuam piak ah, a thalchang in a sukliamnate a sukdam piak phat leh, thapi vak dan chu nisa gual hung hi’ntin, nisa vakna chule a le’sagi, ni sagi a vakna kigawm gual in hung vâk ta’n a.

Assuria Chung ah Vaihawmna

²⁷ Ngai un, Lalpa thilhitheina chu a lungnatna kuang tawh, meikhu kitung luai luai kawm in gamla tak ah kipat in a hung hi; a mûkte chu lungnatna’n a dim in, a lei chu mi kângmang ziang thei mei gual ahi.

²⁸ A hat git chu luicha tuilet, ngawng tiang ah luang gual chu ahi; nam tinte chu, khendanna leidâl ah sêp in, mite’n a kaimangna ding un kam khau bul ta’n au.

²⁹ Israelte Suangpi kiang ah chia ding ah, Lalpa tâng thiangtho ah theile tawh mite a chia lai ua, a lungthim uh a kipak ma ma gual leh, kût thiangtho la bawl jan ua lim tak ah la um gual un, La hun sa ta’n lau.

³⁰ Ziaphat chuleh, Lalpa chun lungna tak in mi kângtum thei meikuang tawh, têk leh van-gi tawh gial kithua in hung intin; a aw lopi tak chu het in um in tin; mu dingin a khutbân hun vai suk ding ahi.

³¹ Lalpa‘n Assuria a vok phat leh, a aw chu mol ah mang in, huaisia tak ah vok hiding ahi.

³² Lalpa‘n a moltum ah a vok tawh kituak in, a mipite chun khuang leh dâk sâi in au. Pathian ma ma chun Assuriate chu hun do ding ahi ngal a.

³³ Topheth chu tu’ma lam pek ah kha bawl zawsa a hita’n, lengpa â ding ah guanggal zaw ahi tai. A thing chu zau tak leh sâng tak ah siavum zaw ahi ta’n, mei leh a thingkhua kiningting tak ding ah bawl zaw ahi tai. Lalpa‘n meikuang a hu’n hun mutdok intin, kâttui gual in kâng ta’n a.