ISAI 25 - PATHIAN LEKHABU THIANGTHO (BSI)

Hukdawna Ziak Ah Pakchatna

¹ Aw Lalpa, nang chu ka Pathian la hi; la kumtuang lemguatna ginum leh thutak in la tuansua ah, thil lamdang tak la bawl ziakin, la min pâk in, hun chawihoi ing ka.

² Nang in khawpi chu thilsia kisung vûm in la siam ah, khawpi kul ah ki-ûmte chule la hisia’n; mêlmate lal In haw chu khawpi hita lo dingin la siam ah, tundin kit hita pua’n au.

³ Ziaziakchun, mihatte chun hun chawihoi intiu in, nam huham takte khawpi chun, hun ki’cha ta’n a.

⁴ Migentheite’n kisêlna’n a hun mang un, a lungdon lai ua tasamte kisêlna la hi’n; thigawpi lak ah bitna leh, nisa lak ah dailîm la hi. Phalbi lai ah thigawpi gual ah mi huhamte’n a nawu a,

⁵ gam gawchâk ah khawlum, a thok-hak gual ah mêlmate husa chu, nisa satna sûmpi’n la lia liap sak gual in, a satna chu la hivot tai; mi huhamte Hân La chu a thip tai.

⁶ Zia tâng ah hin sepai honte Lalpa chun mi zosia â ding ah an tui tak, uain kumlui takte leh, sa leh theng ah kisiam an tui tak leh, uain thiang chîk leh kumlui takte’n, luaithe’na siam ding ahi.

⁷ Chun, zia tang ah hin mi zosia liatu leh, nam zosia lia ah kijakpal chu hun hise ta’n a; thi’na chu kumtuang dai dingin, ama’n subei ta’n a.

⁸ Ziaphat chuleh, Lalpa Pathian in, maichang zosia ah mitthi thiak-hul ta’n tin; chuleh, a mipite mualpho’na zosia, lei chung ah kipat in lamang ta’n a; Lalpa‘n zia gual chun a la gen ta’ngal a.

⁹ Zia ni phat chuleh, zia gual hin kigen in a: En tiam u, zia hi I Pathian uh, ei hukdok ding ah sawtpi I la ngâk uh kha ahi. Zia hi I la ngâk uh Lalpa chu ahi; a hukdamna hin lim in kipak hitiu.

¹⁰ Zia tâng ah hin Lalpa khut chu, kichawl den ta ding ahi ngal a. Bupawl buaksia khûk ah chotchil ahi gual in, Moab mite chu a umna mun un chotchil in hung um ta’n au.

¹¹ Tuizap te’n a khutbân uh a jak gual un, a lak un a khutbân uh jak jak maleu, a theitawp uh sua a bat nung unle, a kisaktheinau chu tawden tho tho ding ahi.

¹² A kulbâng sâng tak takteu chu, hi’chip in hung um ta’n tin; lei tual ah leivui lakah, paithâk in um ding ahi tai.