ISAI 24 - PATHIAN LEKHABU THIANGTHO (BSI)

Lei chung Pumpi Vaihawmna Hungtung Ding Chu

¹ Ngai un, Lalpa‘n khawvel pumpi hisia’n, chên mawna hun siam in, lei hi a bungbu lam ah umsak in, a sung ah chêng zosia the’chek ding ahi.

² Mipite chung ah tung gual in, thiampute chung inle tung intin; suaknu leh a pu chung ah tung gual in, a pi chung inle tung intin; van chawtu chung ah tung gual in, a zuaktu chung inle tung intin; a thunglâkte chung ah tung gual in, a thunglâksakte chung inle tung intin; sumpung nei ding ah latu chung ah tung gual in, sumpung um ding ah petu chung inle tung in a.

³ Lei chu suksiat dim dem leh, chomgam sik sek hung hi’n a; Lalpa‘n zia gual ah um ding chun a la gen ta’ngal a.

⁴ Lei chu keugawp in a vuaitha ta’n, khawvel chu ngui in a vuaitha tai; vânte’n le lei chu a sûnpi tau hi.

⁵ Lei chu a sung ah chêngte sukbuak in a um zo tai; amau chun dan a botsiau ah, chawn dan a zui puau ah, kumtuang thuthung a bawsiat tak ziak un.

⁶ Ziaziakchun, hânsia chun lei a val zo ta’n, a sung ah chêngte’n a mawna ziak un a thuak tau hi; tichun, lei chung ah chêngte a kiam un, mi tawmcha bep nutsia a hitau hi.

⁷ Grep tui a kang ta’n, grep gui a vuai ta’n, lungthim kipakna zosia thûmna a chang zo tai.

⁸ Khuangneu gitte a chawlnga ta’n, kipakna husa a thip zo ta’n, theile git le a thip zo tai.

⁹ La sa kawm in uain a dawn ta puau a; zukha le a dawnte â dingin a kha tai.

¹⁰ Buaina khawpi chu suksiat a hita’n, In zosia chu kuama lut thei talo ding ah, kamchak suak ahi tai.

¹¹ Uain tâksap ziakin khawlai ah chun, mite a kiko veng vung ui; kipakna zosia’n mual a khum tai; lei ah kipakna zosia’n mual a khum tai.

¹² Khawpi sung chu a hawm ah nutsia a hita’n, a kul kotkhakte chule suksiat sik sek ahi tai.

¹³ Oliv ga khet pul ah a um gual leh, grep lâk khawm hun kichai phat ah, chomkhialte lâk khawm gual in, lei chung ah namtin lak in um in au.

¹⁴ Aw ngai tak in kipak in La a hun sau a, Lalpa lopina chu tumlam ah kipat in a hun pâk ui.

¹⁵ Ziaziakchun, sualam ah mite chun, Lalpa chu choihoina piau inla, tuisuagiat pangjul ah gamte’nle Lalpa, Israel Pathian min chu chawihoi tau in!

¹⁶ Kawlmong ah kipat in, Mithiangtho pâkna La sak git I hiau hi. Himaleh, keima’n: Lungkham ah thi ding ka hi tai! Lungngai ah thi ding ka hi tai, ka chung a gik na e! Mi dawhathûk chun dawhathûk tak in a bawl in, dawhathûk chun dawhathûk zaw sêm in a bawl hi, ka ti hen.

¹⁷ Aw, lei ah chêngte haw, nanghaw â dingin tizat um tak, khûkse’kua leh thâng a kikam zing hi!

¹⁸ Thawm gi tizat um lau ah jam tapo chu, pum ah ke’lut intiu in; zia pum ah suakcha sunte chu thâng ah awk in au. Van tukvante chu a kihong ah, lei kingakna bulpite chu a kilaw lîng tâk ziakin.

¹⁹ Lei hi suksiat dim dem a hita’n, lei hi puaitel zaw a hita’n, lei hi nasa tak ah lawlîng ahi tai.

²⁰ Zukham gual in lei hi a hoi dong dong in, bûkcha gual in lei hi a kilâwng hi; a bawsiatna a chung in a gik ma ma in, hung kipûk intin, thodok kit ta pua’n a.

²¹ Zia ni phat chuleh, van mun ah chun, van sepai honte leh, lei ah lalte chu lei chung ah hin, Lalpa‘n hun gawt ta’n a.

²² Khûkse’kua suangkul ngâkte a khum khawm gual un, amau chu hun hawl khawm intin; suangkul ah kot kam khum intiu in, ni sawt tak zaw nung leh hun gawt ta’n a.

²³ Zia ni phat chuleh, thapi kisel ta’n tin, nisale zakcha ta’n a; Sepaite Lalpa chun, Zion tâng leh Jerusalem ah chun, vai a hawm ding ziak leh, a mipi puitute ma-âng ah a lopina, a tâklat tâk ding ziak in.