ISAI 22 - PATHIAN LEKHABU THIANGTHO (BSI)

Jerusalem Siatna Ding Hillawkna

¹ Kilâkna Phâijawl chung châng thu chu: Bang ding ah la leng ua In chungvûm ah kal to la hiu ah,

² nang, limna leh kipakna ziak ah, kiko chiak veng vung khawpi hilo maw? La sung ah mithite chu chemjam leh kidona thi ahi puau hi.

³ La vaihawmteu a tai mang zo tau a; thalchang khatle kâpdok lo in pum mat a hizo tau hi. Gamla tak ah tai mang maleu le, mu phâk ah um taphot chu, sal ah mat a hizo tau hi.

⁴ Ziaziakchun, zia gual hin ka gen tai: Ei kiheimangsan unla, theitawp in kap ing ka; ka mipi doitakte siatna sûn ka hiziak in, ei he’nêm se se kiu in.

⁵ Sepai honte Lalpa Pathian in kilâkna phâijawl ah chun: Lungkhamna, palchek ah umna, bâng hichipna leh kap veng vung ah, mual leh tângte kiang ah panpi don ah, kiko’na ni chu a guat ta’ngâl a.

⁶ Elam mite’n thalbawm a hun puau a, sakol kângtalai leh sakol sepaite tawh, Kir in a phawu a hun lâmdok tau hi.

⁷ La phâijang pha pente chu kângtalai in dim intin, khawpi kotkhakte ah chun, sakol sepaite chu chângpang ta’n au.

⁸ Ama chun Judah kikhûna zosia chu a lamang tai. Ziaphatchun, gammâng In ah gâlvante chu la gâl thîl ta mai a,

⁹ David khawpi kulbâng siatna chu la mu ta’n; chuleh, dil thangnung zaw tui la thâl tau a.

¹⁰ Jerusalem ah Inte chu la sim un, a Inte chu pheltha’n kulbâng hi’det la guau a.

¹¹ Dil lui ah tui kitinna dingin, a bâng thuani kikâl ah tuibêm la siam un. Himaleh, zia chu kua’n a la bawl a hem ti leh, kua’n masang lai ah kipat khan a la guanggal ahi em ti la ngaisak puai.

¹² Zia ni ah chun, sepai honte Pathian chun, kap ah lusûn ding leh sam metkol ah, saidip puan sil dingin a hun ko a;

¹³ himaleh, zia thasâng ah chun, kipakna, luaithe’na leh nunnopna, bawngchal tha’na, belam tha’na, zu leh sa nêkna’n la mang ui. “Ne leh dawn hitiu, jing leh thi ta ding I hi’ngâl un,” la tiu a.

¹⁴ Sepai honte Lalpa ma ma chun, ka nakhang ah ei hun hil a: “Matheilo in, la thi masiau, la thil bawl khial uh ngaidam hita pua’n a,” ti’n sepai honte Lalpa Pathian in a gen hi.

Amau Lawkna Bep Hawl Miliante Demna Thu

¹⁵ Sepai honte Lalpa Pathian in zia gual hin a gen ngâl a: Hung tia, a Insung ah sepkolpa Shebna kiang ah vachia inla, a kiang in zia gual hin va gen in:

¹⁶ Zia hi bang kithuneisak ten la hem? Zia tak ah hin chanau bang gual mi la nei ah, tângsâng ah hin la thânkua ding la kikhuak ah, suangpi ah la chênna ding la khuak a hem?

¹⁷ Lalpa chun huham tak in hun dîlmang ding ei ve, lawipa! A khut ah det tak in hun tu’n tin,

¹⁸ hun pei luhâi ten intin, a zaw leh gam thawveng tak ah chun hun paimang in ah; zia tak ah chun thi ta’n la tin, la sakol kângtalai kisuanpi takte chule kizam tek tuk ta’n au. Aw nang, la pu Inkuante himualphotu ding bep hung hita’n la!

¹⁹ La nasepna mun ah kipat hun nawdok ing ka tin, la dinmun sâng tak ah kipat chun hun kaitha ding ka hi.

²⁰ Zia ni phat chuleh, Hilkiah chapa Eliakim, ka nasêmtu chu ko ing ka tin,

²¹ la puanâk chual chu âksak ing ka tin, la kawng chule ama gâksak ding ka hi. Nangma thuneina zosia ama khut in pia’ng ka tin; tichun, Jerusalem khua chêng zosia leh, Judah Inkuante zosia â ding ah a pa ding uh hung hita’n a.

²² David suan ah mite chung ah thuneina chabi pia’ng ka tin; ama honsa chu kuama’n khâk thei pua’n tin, a khâksa chule kuama’n hong thei diak pua’n au.

²³ Kungbul det tak ah kihên gual in hi’det ing ka tin, pu leh pate â ding ah ja’umna lalchutpha hung hita’n a.

²⁴ Tichun, a pu leh pate, a tu leh chate ja’umna zosia, a si a sên ah pauva khawn leh a zuthawl natiang un, a chung in bât ta’n au.

²⁵ Zia ni phat chuleh, sepai honte Lalpa chun zia gual hin a gen a: Kungbul det tak chu bawdok in um intin, sât tan ah um in, ketha ta’n a; chuleh, ama ah kihên zosia chule mangthai ta’n au, ti’n Lalpa‘n a la gen ta’ngâl a, ti in.