ISAI 19 - PATHIAN LEKHABU THIANGTHO (BSI)

Aigupta Siatna Ding Thu

¹ Aigupta siatna ding thu kigen chu: En un, Lalpa chu sûmpi hat tak ah leng chung ah chuang in, Aigupta lam in a hung hi; a ma-âng ah chun Aiguptate milim haw chu kithing intin, Aigupta mite lungchang chule a sung un timaw zo ta’n au.

² Aigupta mite do dingin Aiguptate ma ma chokphûl ing ka tin, amau leh amau kido intin uh, a Invêngteu chiat kidopi intin uh, khawpi khat in khawpi dang do intin, lenggam leh lenggam hung kido ta’n au;

³ Aigupta mite thil guanggal zosia, ka hisiat piak ding ziakin, a sung ua a thagau uh chu suadok piak ing ka; tichun, milimte leh mithisate, thithate leh dawi leh kaute hun dong ta’n au;

⁴ chuleh, Aiguptate chu lal nunsia tak khut in pedok ing ka tin; leng tizat um tak chun a chung un vaihawm ta’n a, ti’n, sepai honte Lalpa, Chungnung penpa chun a la ti ta ahi.

⁵ Nail luipi ah tuite chu kang intin, a luidung chu hul in, keugawp ta’n a;

⁶ a tuilamteu chu namsia ta’n a, chuleh, Aigupta luipi Nail luibâkte chu, kiam in keugawp intin; phâiluang leh ngathalte chule muat ta’n a.

⁷ Nail lui pang leh lui kiang ah gam châi ta’n tin; Nail lui pang ah thâichi kichîng zosia le keugawp in, muat mang ta’n tin, châi tîl tial ta’n a.

⁸ Sanga mante chu thûm in mau ta’n tin uh, Nail lui ah ngakuai khai sekte chu kap ta’n tiu in, a tui ah lên jak sekte chule hung basam ta’n au.

⁹ Pat chîngte leh lên phan ah nasêmte chule, dângtha zo ta’n au.

¹⁰ Puan-gatte le lungkham ta’n tin uh, sumlaw ah nasêm zosia chu, hung buaisia gawp ta’n au.

¹¹ Zoan ah lal chate chu a ngol zo tau a; Pharaoh lemguat thiamte lemguatna chule ngolhuai a suak tai. Bangatileh, Pharaoh kiang ah, “Kei hi, malai ah lengte suan ah mi, mipil khat ka hi,” ti’thei ding la hem?

¹² La mipilteu khoilam tung zo ahi tau em? Sepai honte Lalpa‘n Aigupta gam siatna ding, a guanggal chu hun hil uh hen la, hun hiatsak leu hiding a paw em?

¹³ Zoan ah lal chate chu a ngol zo tau in, Memphis ah lal chate chu thep zaw ah um hita lo a hiu em? A nam puituteu chun Aigupta chu a pui khial tau hi.

¹⁴ Lalpa‘n a lak un buaina thagau a sunthâk khum tai; zukham vuang dong dong ah a luak gual in, Aigupta chule a thilbawl zosia in a hawi dong dong tai.

¹⁵ A luchang hi’n, a mei hileh, tûm bâk hi’n, phâiluang hita leh, Aigupta â ding ah bangma bawlthei a nei ta puau hi.

¹⁶ Zia ni phat chuleh, Aigupta chu numei tawhbang bep hita’n tin, amau gawt ding ah sepai honte Lalpa‘n a khut a hun lap phat leh, lau in kithingse ta’n au.

¹⁷ Chuleh, Judah gam chu Aiguptate â ding ah tizat um hung suak ta’n ah; a gen kha taphot inle, sepai honte Lalpa‘n a chung ua siatna ding a guanggal ziak ah chun, lau ma ma ta’n au.

Aigupta, Assuria tawh Israel Maljawlna Ding Chu

¹⁸ Zia ni phat chuleh, Aigupta gam ah chun Kanaante pauthaw khawpi panga leh, sepai honte Lalpa â ding ah kitiam hung um in au. Zia khuate lak ah khat chu Nisa Khawpi ti min sak hi’n a.

¹⁹ Zia ni phat chuleh, Aigupta gam lailung ah chun, Lalpa â ding ah mâichâm khat hung kidin intin; chuleh, a gamgi bul ah chun Lalpa min in khuam pakhat hung kiphut in a.

²⁰ Zia chu sepai honte Lalpa â ding ah, Aigupta gam ah tepte’na leh hiatpitu hung hi’ntin; amau sugentheite ziak ah Lalpa a hun ko phat uh leh, amau hukdok ding hun sawl piak intin, amau panpi in, hukdok in a.

²¹ Aiguptate kiang in Lalpa chu kihiatsak ta’n a; ziaphat chuleh, Aiguptate’n Lalpa chu he ta’n tin uh, kithoina leh hâlmang thilpiak in ho ta’n tin uh, Lalpa kiang ah thutiamte bawl intiu in, a thutiam uh mualsua in au.

²² Lalpa‘n Aiguptate suchimit intin, a sukchimit te chu hi’dam kit in a; Lalpa lam hun nga ta’n tiu in, tichun, ama’nle a dotnau a la ngaitha’n, hi’dam in a.

²³ Zia ni phat chuleh, Aigupta ah kipat Assuria zotna lamlian hung kithung ta’n tin, Assuriate chu Aigupta gam ah hung intiu in, Aiguptate le Assuria gam ah chia ta’n au; tichun, Aiguptate tawh Assuriate chun Pathian ho khawm ta’n au.

²⁴ Zia ni phat chuleh, Israel inle Aigupta tawh Assuria hun zawm ta’n tin, khawvel pumpi â ding ah maljawlna hung hita’n au;

²⁵ sepai honte Lalpa‘n a maljawlte kiang ah chun, “Ka mipi Aiguptate, ka khutsuak Assuriate leh ka gochan Israelte chu maljawl in um tau hen,” a la ti ta’n a.