ISAI 16 - PATHIAN LEKHABU THIANGTHO (BSI)

¹ Gamthip lampi hun hawtheng in, Sela khua kipat in, gam vaihawmtu â ding belamno, Zion chanu umna mual ah chun a hun thot ui.

² Moab chanute chu Arnon lui palmun ah chun, vacha thajap sel sel gual leh, vacha nosên kithe thâng gual hi’n au.

³ Amau chun: Lem ei guat piak unla, dikna’n vaihawm un; sûnchang lai in janthim gual in, nilîm ei bawl piak in; nawdok ah umte chu sêlgu’n la, galjamte chu kuama matsak kin.

⁴ Moab gam ah kipat nawdaw ah umte chu, la lak un chêng uh hen la; amau susetu ah kipat a kisêlnau hung hi’n. Hi’gentheitute a bei ah, siatna a hung bei ah, gam ah kipat susetute a bei phat uh leh,

⁵ Lal chutpha khat chu ngilneina leh ja’ngaina’n, David puanbûk ah tundin hi’ntin; a chung ah dikna ngaina leh, ginumna ngaina, kin tak ah dikna leh, ginum tak ah vaihawmtu ding chu hung kichu ta’n a.

⁶ Moab kiletsak dan ka la hiau a, a kiletsak na lawm lawm e! A kingaisânna, a kiletsakna leh, a lungchom dante ka hiau; a kisuanpiteu chu bangmalo mai mai a hiu.

⁷ Ziaziakchun, Moab patau hen la, mitin in Moab sûn in, patau chiat tau hen. Kir-hareseth khawpi grep ho ah vaithum kisiam a nêk lai niteu kha, lungthim ngui tak in sûn uh hen; lungdonna tawp khawk a tuak tau hi.

⁸ Heshbon loute chu a vuai zo ta’n, namtin lalte’n a bawk ah kipat khatvei a la dawn kham sau, Sibmah grep guite chu Jazer tiang a tung tau a; gamkeu lam pek in a jam mang tau hi; a zungteu chu khatvei gam pawlam a la tungsa leh, tuipi gâl a la kâisa a hiu.

⁹ Ziaziakchun, Jazer ka la kâ khum gual ma in, Sibmah ah grepte chule ka kâ khum hi; aw Heshbon leh Elealeh, ka mitthi tui in a hun luan khum tai; la thâichi gate lim ah kikopi ding leh, la pawltâk ding a um ta paw’ngal a.

¹⁰ Lou mun thâichi phatna munte ah, kipakna leh limna lâkmang a hita’n; grep huante ah le La sakna a um ta pua’n, kuama a kiko ta puau hi; uain sûkna khûk ah kuama’n, uain a sûkdok ta puau hi; grep lâk hun ah kiko thawm a thip tai.

¹¹ Ziaziakchun, Moab sûnna gawsem gual in, ka lungchang a phu dûp dûp in, ka hinna’n le Kir-heres lungsiat ziakin a phu zot zot hi.

¹² Moab chu lungdong ah a thoimual ah a hung phat leh, pauchap leh le lawting pua’n a.

¹³ Tu’hin vang Moab chungchâng zia gual hin Lalpa‘n a gen hi:

¹⁴ Lalpa chun, “Moab, lopina chu mipi tam maleh, sum kithalawte gual in, kum thum sung in chuaitha ta’n tin; a um sun chule simmaw um tak leh tawmcha hita’n au,” ti’n a gen a.