ISAI 15 - PATHIAN LEKHABU THIANGTHO (BSI)

Moab Siatna Ding Thu

¹ Moab gam chung thu chu: Ar khua chu jan khat thu phiat nâm ah a um tâk ziakin, Moab chu zawsa ahi; Kir khua chu jan khat thu phiat nâm ah a um tâk ziakin, Moab chu zawsa ahi.

² Dibon chanu chu a kap dingin a thoimual in a kal to hi; Nebo leh Medeba tângvûmte chu Moab in a kâ khum tai. Luchang zosia metkol in, khamul zosia le met nâm ahi’n;

³ khawlai dung ah saidip puan a sil un, Inchung tin leh khawlai ning tin in, mitin a kap tawl chuai chuai ui; lau in a chautha zo tau hi.

⁴ Heshbon tawh Elealeh a kap jak tau a, a kâ thawm uh Jahaz tiang in a hiau a; Moab sepaite nasan lau talua’n a kithing un, hânsanna him him a nei ta puau hi.

⁵ Ka lungthim in Moab ka kâ khum in; a galjamte chu Zoar tiang leh, Eglath-shelishiyah tiang in a jam ui. Luhith lamto ah chun kap kawm kawm in a kal to un; Horonaim lampi chun siatna tâng a sam un;

⁶ Nimrim tuinâk pût chu nutsia in a um ta’n, hampa a vuai gawp tai, a kek thakte le a hing zo diak puau ah, hampa hing him him a um ta puai.

⁷ Ziaziakchun, a thil lamdawteu leh, a khol khawm zosiau kipuak in, Huisûm guam gâl lam in a taipi tau hi.

⁸ Moab gam pumpi kâ thawm a kiu tawl veng vung ta’n; a patau thawm uh Eglaim tiang in hetphâk ahi’n, a patau thawm uh Beer-elim tiang in hetphâk ahi.

⁹ Dibon lui tuite chu thisan in a dim zo ta’n; a gam ah um nalai sunte, Moab gam ah suakcha nalaite that dingin, Dibon ah chun, sakeibaknei hun sawl lut nalai ding ka hi.