ISAI 13 - PATHIAN LEKHABU THIANGTHO (BSI)

Babulon Kãl ah Thugenna

¹ Amoz chapa Isai in Babulon chungchâng ah a thil mu lawk chu zia gual hi ahi:

² Tângsâng tak chung ah diallap tâkdok unla, ngai tak in uau un; miliante kotpi a bulu theina ding un la khut un jap un.

³ Keima ngei hin ka mithiangthote thu ka pia’n, ka sepai hangsante ka ko khawm in, ka doichuam kisathei takte chu, ka lungnatna phuba la dingin ka guat ta ahi.

⁴ Ngai un, mipi tam tak husa gual in tâng lam ah husa! Ngai un, lenggamte leh namtinte kipun khawmna husa chu! Sepai honte Lalpa‘n kido’na dingin sepai hon a pui khawm hi!

⁵ Gamla tak tak, lei kil langkhat lam ah kipat hung kuan a hiu; Lalpa leh a lungnatna matchâkte chu, lei pumpi susia ding ah hung a hiu.

⁶ Patau un, Lalpa Ni chu a nai ta’ngal a; Hat Chungnung ah kipat siatna, hung tung gual chu ahi.

⁷ Ziaziakchun, khut zosia zawitha ta’n tin, mi tin lungchang chautha ta’n tin,

⁸ lungthuai zo ta’n au. Natna leh lungngaina’n man intin, numei naunei ding gual in, nat thuak in thûm ta’n a. Lamdangsa’n ki-entua intin uh, a mai uh zakcha’n mual ta’n a.

⁹ En in, Lalpa‘n a lungnatna huaisia tak leh, a thangtawm hiamngamna a suklatna ding ni chu, hung tung ding ahi tai. Zia ni chun ama’n lei chung ah mihingte hi hi’mangthai in, lei chu a hawm ah nutsia in hun umsak in a.

¹⁰ Van ah aksite leh aksi honte chun a vâk uh sua ta pua’n au; jingkal nisale thim ta’n tin, thapi le vak ta pua’n a.

¹¹ Khawvel chu a gitlona ziakin gawt ing ka tin, mi nunsiale a thilbawl siat ziakin gawt ta’ng ka; chuleh, mihuhamte kisaktheina le hitawp ing ka tin, leng gilo leh lungpawngte chu koi niam ding ka hi.

¹² Mihingte chu sana thiangtho sâng ah, vâng zaw’n hun siam ing ka tin; mihingte chule Ophir sana sâng in, hung vângzaw ta’n au.

¹³ Ziaziakchun, sepai honte Lalpa lungnatna hun, a lung kitongkhon ni a hung tun phat leh, vante kithinsak ing ka tin, lei chule a umna mun ah kipat, thindaw in hung um ta’n a.

¹⁴ Sapeng kidel thachawl tak gual leh, belam hon a ching umlo gual in, amau mite kiang lam chiat ah chia intiu in, a gam lam chiat uh del ta’n au.

¹⁵ Mai phâk ah um taphot chu sutthil hi’n tiu in, mat ah um taphot chu chemjam ah thalup hi’ngal in au.

¹⁶ A mit muu in a chasenteu khet tel hi’n tiu in, a In uh chomnâm hi’ntin, a jiteu tatsiatpi hita’n au.

¹⁷ Ngai in, amau do dingin Mediate ka chokphûl hi; amau chun dangka enla pua’n tiu in, sana inle kipak diak pua’n au.

¹⁸ A thalpiu chun tangvalte that intin, gil ah gate chung in lainatna nei pua’n tiu in, naupang daidawpna le nei diak pua’n au.

¹⁹ Chuleh, Babulon, lenggamte lopina leh, Kaldaite kisuanpi lopina chu, Pathian in Sodom leh Gomorrah, a paithâk gual ah khan hung um ta’n a.

²⁰ Tu’ leh khang zosia tiang inle, kuama chêng kit ta pua’n au; Arab khualzinte’n a puanbûk uh jak kit ta pua’n tin uh, belam chingte’nle a belamteu, kualsak kit ta pua’n au.

²¹ Zia tak ah chun gamsate kual zaw ta’n tin, a Inteu chule gamsa honte chênna hita’n a; zia chun vagawlsau chêng intin, sakêlte lâmtual hung hita’n a.

²² A gâlvênbûkteu ah chun sa-uak hâm intin, a lal In nuam tak teu ah chun si-alte hâm ta’n au; zia hun chu a nai ma ma ta’n, a nite chu vokchawn hipua’n a.