ISAI 11 - PATHIAN LEKHABU THIANGTHO (BSI)

Lenggam Thamuang Chu

¹ Jesse bulsum hung sel intin, a zung ah kipat in bâk khat hung khangdok in a.

² Pilna leh hetthiamna Thagau, lemhetna leh hatna Thagau, hetna leh Lalpa launa Thagau, Lalpa Thagau ngei chun hun thuam ta’n tin,

³ Lalpa launa chu a kipakna lam hi’n a. A mit in a mu gual in vaihawm pua’n tin, a bil ah a het gual mai mai in thu tan pua’n a;

⁴ himaleh, dik tak in migentheite vaihawm piak intin, lei ah mi nunnemte le kibang chiat in, thutanna bawl piak ta’n a; a kam ah mol chun lei hi jep intin, a mûk ah hû chun mi nunsiate that in a.

⁵ Dikna chu a kawnggâk hi’ntin, ginumna chu tâigâkna’n mang in a.

⁶ Ngei tawh belamno takhawm intin, gialbem tawh kelno kual khawm in, bawngno tawh sakeibaknei leh, bawng thau takhawm intin uh, chapang khat in ching ta’n a.

⁷ Bawngpi tawh savom in hampa ne’khawm ta’n tin, a noteu le kual khawm ta’n au; sakeibaknei inle bawngchal gual in bupawl ne ta’n a.

⁸ Nau nawichep lai le gûlsepi kawhawm in kihel ta’n tin, naupangte’nle thangchom a nop nop un khoi thei ta’n au.

⁹ Ka tâng thiangtho ah chun, kuama a kisusia leh kihi’na um ta pua’n a; tui in tuisuagiat a chup gual hin, lei chu Lalpa hetna’n hung dim ding ahi ta’ngal a.

Israel leh Judah Umsun te Kile’kitna

¹⁰ Zia ni phat chuleh, Jesse zung chu namtinte â ding ah tepte’na hung hi’ntin; namtin in ama umna hun kandok ta’n tin uh; tichun, a chênna chu hung lûn ma ma ta’n a.

¹¹ Zia ni phat chuleh, Lalpa‘n a mite lak ah a um nalai sunte chu, Assuria, Aigupta, Pathros, Ethiopia, Elam, Shinar, Hamath leh tuisuagiat pang ah gam zosia ah kipat huai khawm dingin a khut chu a vêl in hun lâm kit ta’n a.

¹² Nam tinte â dingin tepte’na diallap tâkdaw piak intin, Israelte lak ah nawdaw ah umte leh, Judah lak ah the’chek ah a la umte chu, lei killi’ kipat in hun lakhawm kit in a.

¹³ Ephraimte îtsîkna chu hung bei ta’n tin, Judate huatna sât thâk in um ta’n a; Ephraim in Judah thangsia ta pua’n tin, Judah inle Ephraim haw ta pua’n a.

¹⁴ Tumlam ah Philistinte do khawm intin uh, sualam ah mite suam in pang khawm ta’n au. Edom tawh Moab do-na’n a khut lâm khawm ta’n tin uh, Ammonte’n le a thuu jawm ta’n au.

¹⁵ Aiguptate tuisuagiat likawi chu, Lalpa‘n susia dim dem intin; thil kânggawp thei khop ah huilum chun, Luilian chu a kât gawpsak theina dingin, a khut hun lâm ta’n a; tichun, luicha sagi ah khenjak in, keng ah pal kâi thei hun sua ta’n a.

¹⁶ Tichun, Aigupta gam ah kipat, Israelte hungna ding lampi a um gual khan, a mipi nutsia ah um sunte â dingin, Assuria ah kipat in lamlian hung um ta’n a.