ISAI 10 - PATHIAN LEKHABU THIANGTHO (BSI)

¹ A hei, nanghaw, diklo tak ah thutanna bawl ah, mi tawdenna ding ah dan thu zik ah pang a;

² mi tasamte diklo tak ah vaihawm piak ah, ka mipite lak ah migentheite, a diknau lâkmang piakte, meithâite galmat gual ah man a, nauchagate suamgamte haw, la chung uh a gik hi!

³ Gawtna la hun tuak phat uh leh, gamla tak ah siatna chu, la chung ua a hung tun phat leh, bang la law ta diam? Pani’na hawl ah kua kiangah chia in, la hausatna kua kiangah nusia in,

⁴ suangkul ngak ding ah sawl lut leh, a thite lak ah um ding bep in a um tau ah; Chutisapi’nle, a lung a dam diak puai, a khut a lâm nalai lai hi.

Mi Huham Assuria Chung ah le Vaihawm hi’n ah

⁵ E he, Assuria chu ka lungnatna moltum, a khut ah khetbûk chu, ka hachang thakna ahi.

⁶ Pathian ngaisak lo namte do dingin, amau chu ka sawl in; ka lungnatna mipite chung ah, gâl lâk ah la ding leh vachom ah vasuam gam ah, khawlai buanthuak gual ah, vachuan chil dingin thu ka pia tai.

⁷ Ahi’n, zia gual chu a lungtup leh, lunggêl a hikhel pua’n, a lungthim inle a ngaitua kha puai; himaleh, a lungtup chu, nam tawmchate sukbei ding a hizawi.

⁸ Ama’n, “Ka sepai hotu zosia hi, leng hichiat lo a hiu em?

⁹ Kalno khua chu Karkhemish khua gual tho hilo a hem? Hamath khuale Arpad khua gual tho hilo a hem? Samaria le Damaska gual tho hilo a hem?

¹⁰ Ka khut in Jerusalem leh, Samaria sâng ah lian zaw milim leh, lenggamte a khoiphâk gual in,

¹¹ Samaria leh a milimte chung ah ka bawl gual kha, Jerusalem leh a milimte chung ah hun bawl lo ding ka hi em?” a tingal in.

¹² Lalpa‘n Zion tâng leh Jerusalem chung ah a thilbawl ding cheng a bawl zaw phat leh, Assuria lengpa kisaktheina leh kiletsak takah a kilopisak ziakin hun gawt ding ka hi.

¹³ Ama chun: “Ka khut thahâtna ziak ah ka sepdaw leh, keima pilna ziakah ka hetdaw ahi, hiatthiamna ka nei ngal a; namtinte gamgi ka lâkmang piakah, a gothilteu chule ka lâkpiak tai; bawngchal hangsan gual in, a sung ah lalchutpha kichute, ka kaitha ta’ngal a.

¹⁴ Mipite hausakna zosia chu, vacha’n a bu a bawl gual ah, ka khut in a hawldaw ahi; vacha’n a tui a nutsiasa, min a kiluak gual in, lei chung pumpi ka kiluak khawm tai; a tawilok ngam leh a kam kâ, paudok ngam khat chale a um puau hi,” a ti’n.

¹⁵ Heichapi’n ama mangte chung ah kiletsak tak ah kisuang in, chuleh, thing âtna’n ama mangte chung in a kiletsak thei em? Mol le a mangte chung in a kiletsak diak puai!

¹⁶ Ziaziakchun, sepai honte Lalpa, Chungnung penpa chun a sepai hangsan takte lak in, thachauna natna hun tun intin, a lopina’n meikuang gual in hun kângna ding ahi.

¹⁷ Israelte Vâk chu mei gual hung hi’ntin; a Mithiangtho uh chule meikuang gual hung hi’n a; tichun, a ling leh a khauguite chu, ni khat sung in hun kâng tum ta’n a.

¹⁸ A gammâng lopina leh a lou gam ga sua thei tak chule, a taksa leh a thagau tiang in, thi’na ding ah natna’n mi a chausak gual in, Lalpa‘n hun hi’mangthai ta’n a.

¹⁹ Gammâng ah thing tawmcha bep hawi hi’ntin; chapang ziang inle zik thei ta’n a.

Israelte Lak ah Gitlona Haisan Ziak ah Khêkchâk ah Um te Chu

²⁰ Zia ni phat chuleh, Israelte lak ah a thibang sunte tawh, Jakob Inkuan ah a suakcha sunte chun, amau gawtte ah kinga talo in, Lalpa Israel Mithiangtho ah chun ti tak tak in kinga zaw ta’n au.

²¹ A thibang sunte, Jakob Inkuante lakah a thibang sunte chu, Hatchungnung Pathian lam in hung kihei kit ta’n au.

²² La chipi Israelte chu tuisuagiat ah piaunêl jat ah tam himaleu, a thibang sunte bep hung kile’kit in au. A chung ua siatna tung ding ah tiamsa a hita’n, diktatna luanglêt ahi.

²³ Sepai honte Lalpa Pathian in, khawvel pumpi tawpna bawl dingah a la gensa gual in, hung guitung ngei ngei ding ahi ngal a.

²⁴ Ziaziakchun, sepai honte Lalpa Pathian in zia gual hin a gen hi: Aw ka mipi, Zion ah chêngte haw, Aiguptate’n la chung ua a mol uh a lap gual ua, Assuriate’n a mol ua a hun jep phat uh leh lau kiu in.

²⁵ Hun chomlokâl sung in la chung ua ka lungnatna dam pai ta’n tin; tichun, ka lungnatna amau siatna dingin a chung un chuta’n a.

²⁶ Sepai honte Lalpa‘n, Oreb Suangpi Midiante a la jep gual leh, Aiguptate chung ah a mol a chuk gual khan, a mol chu tuisuagiat chung ah lâm intin, Assuriate chung in chu ta’n a.

²⁷ Ziaphat chuleh, la liangko ah la puakgik chu lakdaw in um ta’n tin, la ngawng ah a ngawngkol chule sukbot in um ta’n a. Rimmon ah kipat in a hung kipandok ta’n,

²⁸ Aiath mun a hung tung tai; Migron a hawtheng in, Mikmash mun in a van a koi malam in;

²⁹ chiangkot ah chiatheng in, Geba mun ah a jan giak un; Ramah lau in a kithing ta’n, Saul khua Gibeah a jamsia tai.

³⁰ Aw Gallim chanu, ngai tak in kiko ta’n! Aw Laishah, ngai in! Aw Anathoth, ama dawnhu in!

³¹ Madmenah khawte a taijak tau a, Gebim ah chêngte bitna hawl in a jamsia tau hi.

³² Tu’ni hin ama chu Nob khua’n a nichuang in, Zion chanu mual Jerusalem umna tâng ah chun, a khuttum a lûmzial hi.

³³ En in, Lalpa, sepai honte Lalpa chun, a thilhitheina tizat um tak in a bâkjamte chu suamtha ding ahi; thing sang pente chu tan bot hi’ntin; a mun lua pente chu kainiam hita’n au.

³⁴ Gammâng buk takte chu heicha’n vât thiang intin; Lebanon tâng chule, a thing ja um pente chu tawh, pûk in kainiam ta’n a.