HOSEA 9 - PATHIAN LEKHABU THIANGTHO (BSI)

Israelte Chung Ah Phuba Lâkna

¹ Aw Israel, kipâk kin! Namdangte gual in lim kin; nawchizuak in, la Pathian la nusia ta’ngâl a. Buphual jawl tin cheng ah nawchi man la ngaina tai.

² Buphual leh uain sûkna khûkte chun amau vâk pua’n tin; uain thak nei ta pua’n au.

³ Lalpa gam ah hin umden pua’n au; Ephraim vang Aigupta lam ah kile’kit intin; Assuria gam ah chun an thianglo ne ta’n au.

⁴ Lalpa kiang ah dawn thilpiakte uain sungtha ta pua’n tiu in; a thillatteu chun ama kipaksak pua’n a. Zia gual thillatte chu lusûnte vaithum gual hi’ntin, a ne taphot chu buak ngâl in au; a vaithum uh chu a gilkialnau â ding bep ahi ngâl a; zia chu Lalpa In ah hung lut pua’n a.

⁵ Kût kiguatte a hung tun phat leh, Lalpa â ding ah kût ni ah chun bang la bawl ta diam uh?

⁶ Siatna pumpel in suakcha maleu, Aiguptate’n chom khawm intiu in; Memphis in amau vui in au. A dangka golûlteu chu zakthâite’n lua intin; a puanbûkteu ah chun lingte um in a.

⁷ Gawtna nite chu a hung tung in, thukna nite chu a hung tung tai; Israel in ko intin, “Jawlnei chu mingol ahi’n, thagau mi chule a ngol ahi tai,” ti in. La khawlona huaisia tak ziakin, la huatna le a huaisia ahi.

⁸ Jawlnei chu ka Pathian â dingin, Ephraim chung ah gâlvengpa ahi; tichun, a lampi zosia ah chun, thângkamte thâng a um in, a Pathian In ah chun kihuatna a um hi.

⁹ Gibeah ah a um lai gual uh khan, amau leh amau nasa tak in a kisubuak ui; a khawlonau chu hezing intin, a gitlonau chu gawt ding ahi.

¹⁰ Israel chu gamthip ah grep ga gual in ka mu tai. La pu leh pateu chu a hun masa pen ah, theipi ga masa gual in ka mu ta ahi. Himaleh, amau chu Baal-peor mun ah a hung un, jachâk um tak in a kipumpiak tau a; a thil ngainatteu gual in ki’dak um a hung hi zo tau hi.

¹¹ Ephraim lopina chu vacha gual in leng mang intin; nau pian, nauvop leh nau kizil um ta pua’n a!

¹² Chate hun nei ta mawng leule, pakhat ziang le a sûn lo uh koi pua’ng ka. Amau ka nutsia dingte chung chu a gik na lawm lawm e!

¹³ Tu’ma khan Ephraim chu mun nuam tak ah, tûm thingno kiphut gual in ka la mu’n; himaleh, tu’hin Ephraim in, a chate chu thâ gam dingin, hun puidok têi ding ahi.

¹⁴ Aw Lalpa, amau chu pia’n; bang a hem la piak ding? Amau chu sûl naunei kituplo’na leh, nawitui kanna chu pia’n.

¹⁵ A gitlonau zosia kipatna chu Gilgal ahi’n; zia kipat khan ka hua ahi. A thilbawl uh sual tak ziakin, ka In ah kipat in deldok ding ka hi. Hepi ta pua’ng ka; a milianteu zosia chu helmang ahi ngâl un.

¹⁶ Ephraim chu jep in a um ta’n, a zung a keu tai, ga sua kit ta pua’n au. Nau hun hing maleu, a sul ah nau a doi um tak chu that tho tho ing ka.

¹⁷ Ama a ngaisak lo ziak un ka Pathian in nol intin; nam dangte lak ah vâkchek ta’n au.