HOSEA 8 - PATHIAN LEKHABU THIANGTHO (BSI)

Israelte Nungtolna Huaisia

¹ Pengkul chu la mukteu tawh sutuau in! Lalpa Inkuan chung ah mulukol gual khat a um hi; ka thuthung a botsiau ah, ka dante a bawsiat tâk ziak un.

² Israel in ei ko hi, “Ka Pathian, kei uh Israelte’n nang ka hiau hi,” ti in.

³ Israel in thilpha chu a pêk mang in, mêlma chun ama delzui in a.

⁴ Keima pang lo in leng a kisiam un, ka hetlo kâl in hotute a kisiam ui. Amau siatna ding bep in a dangkau leh, sana’n milim a kisiam ui.

⁵ Aw Samaria, la bawngno lim chu pai thâk ahi tai. A chung un ka lung a na ma ma hi. Thil phalo bawl zing in bang chan um nalai ding la hiu em?

⁶ Israel lak ah kipat in mi khutthiam khat in a siam ahi’n, Pathian khutsuak ahi puai. Samaria ah bawngno lim chu khet gawp hi’n a.

⁷ Hui a tû ziak un chîmpei ât ding a hiu. Buvui in ga a sua pua’n, nêk ding piang pua’n a; ga sua ta mawng leh le, gam dang mite’n ne zo in au.

⁸ Israelte chu valzaw a hitau in; namte lak ah bêl matna bei gual a hung hitau hi.

⁹ Gamsabiltung khât gual in Assuria lam in a chiau a; Ephraim chu a dawichâkte kiang in a kizuak tai.

¹⁰ Nam dangte lak in kizuak maleu, tu’hin, amau chu hun ladok khawm ding ka hi. Leng leh lalte puak gik nuai in hun thuak gim pai ta’n au.

¹¹ Ephraim in gitlo thoina ding ah mâichâm a sukpun po leh, gitlona ding mâichâm bep a hung hitau hi.

¹² Ka thuhilnate tampi zik piak maleng, thil lamdang hi’n a ngai ui.

¹³ Amau in doichuam thillatte pemaleu, sate chu ne maleu, Lalpa‘n ziate chu a pom puai. Tu’hin, a khawlonateu chu hezing intin, a gitlo’nau chu gawt in a; amau chu Aigupta lam in kile’kit in au.

¹⁴ Israel in ama Siampa a hemil in, lal Inpite a sau a; Judah in khawpi kul neite a hi’pung a, ahi’n la, a khawpite chung ah mei sawl ing ka tin, a khawpi siamdette chu kâng tum in a.