HOSEA 7 - PATHIAN LEKHABU THIANGTHO (BSI)

¹ Israel sukdam ka guat leh, Ephraim thulimlo’na tawh, Samaria nunsiatna a hung kilang hi; zuauthei tak in a bawl un, gucha’n a phevang in, pawlam ah suammang hawn a suam kit ui.

² A gitlonau zosia ka he suak hi ti lam a ngaitua puau hi. Tu’hin, a thil bawlteu in a umchil ta’n, ka ma-âng ngei in a um tau hi.

³ A gitlonau in lengpa a kipak sak un, a lepchianau in mi lopite a kipaksak ui.

⁴ A leng un ângkawm a hiu ah, vaithum siampa’n changbuang a hel ah kipat, a vaithum min hun masia thukkhûk ah mei a sawtbe ngailo ah, thukkhûk mei in a hai lumsa tawhbang a hiu hi.

⁵ I lengpau ni ah chun miliante chu, uain salum in a nat khawlaw un; ama chun musitte tawh a khut a jak khawm hi.

⁶ Thukkhûk gual ah kihâl âm a hiu in, a sung ua a lunggil uh chu a liausa pep pup hi; a lungnatnau jankhua’n a kitum in, jingkal phatin mei kuang gual in a kuangjak hi.

⁷ Thukkhûk gual in a sa chiat un, a vaihawmteu a ne gam ui. A lengteu zosia a puk tau a, pakhat cha’nle ei ko puau hi.

⁸ Ephraim chu namdangte tawh a kichok-hel zo ta’n; Ephraim chu vaithum kilumlet lo tawhbang ahi.

⁹ Gamdang mite’n a hatna a nêk zaw piak un, ama’n la zia chu a hepuai; a kumte chu tiam himaleh, zia chu a hepuai.

¹⁰ Israel kisaktheina chun a thiamlo zia a sulang in; zia zosia ah chunle Lalpa, a Pathian kiang lam un a kihei kit puau a, ama le a hawl diak puau hi.

Namdangte Ah Kingak A Thawn dan

¹¹ Ephraim chu vakhu lung mawl, hetna nei lo gual chu ahi; Aiguptate a ko un, Assuria lam in a chiau hi.

¹² A chiana lam un lên in khû ing ka tin, chunglêng vachate gual in kaitha’ng ka tin; a kikhopnau ah thu kitut dungzui in amau hun sawi ing ka.

¹³ Ka kiang ah kipat a vâk mang ziak un, a chung uh a gik hi! Ka chung ah a helnau ziakin, a chung un siatna tung in a! Amau hukdok nuam maleng, ka chung ah zuau thu bep a gen ui!

¹⁴ A lunggil tak un ei ko puau a, a lupna chung ua thûm mai mai a hiu; a bu leh uain â ding ah amau kisuliam ahi zawu hi; ka chung in a hel zing ui.

¹⁵ A khutbân uh suhat ah, a zil thiamsak chu keima ka hi; ahi’n, ka siatna ding a gûk in a ngaituau hi.

¹⁶ A phachuam lo lam ngen in a kihei un, thalpi mat tâk lo gual a hiu hi; a pau hoithawnau ziakin a milianteu chu, chemjam in pûk in au. Aigupta gam ah a phunchiak ziak un, zia cheng chu a chung un ka bawl ahi.