HOSEA 6 - PATHIAN LEKHABU THIANGTHO (BSI)

Gitlo Thupha Chawi Ding Ah Kona

¹ “Hung un, Lalpa kiang lam ah kile’kit hitiu; ei puaitel chu ama ahiziak in, ama’n ei hi’dam ding ahi, ei vaw liam maleh ei tuam piak ding ahi.

² Ni ni zaw leh ama’n ei hi’hal ding ahi; a ma-âng ah I hintheina ding un, ni thum ni leh ei kai tho kit ding ahi.

³ Lalpa chu hia’i tiu in, hetzing gaw tai tiu; a hung kilatna ding chu phalvak gual ah kichian ahi; ama chu I kiang un gawtui gual in hung intin, khâl gawtui in lei a chap no gual in hung tung in a.”

Israel Leh Judah Gitlo Thupha Chawi Theilo

⁴ Aw Ephraim, bang hun law ding ka hi tam? Aw Judah, bang hun law ding ka hi tam? La hepinau la phâisûm gual bep ahi’n; jing dai kia, bei kit ziang gual ahi.

⁵ Ziaziakchun, jawlneite mang in amau ka sâttan ah, ka kam ah thute’n amau chu ka that tai; ka vaihawmna chu vâk gual in a kikhawdok hi.

⁶ Kithoina hilo in ja’ngaina ka dawi in; hâlmang thilpiakte sâng in, Pathian hetna chu ka doi zaw ngal a.

⁷ Himaleh, Adam ah chun thuthung a la bawtsia tau a; zia chun ginum lo tak in ka chung in a bawl tau hi.

⁸ Gilead chu thil phalo bawlte khawpi, thisan ah sukbuak ahi.

⁹ Suammangte’n mi a chânguk gual un, thiampute a pung khawm un; Shekhem zawtna lampi’n mi a that un, tualtha’na huaisia tak a bawl tau hi.

¹⁰ Israel Inkuan lak in thil huaisia tak ka mu ta’n; Ephraim nawchi zawkna chu a um a, Israel chu sukbuak ahi tai.

¹¹ Ka mi saltângte ka puidaw kit phat leh, Aw Judah, nang â dinginle, bu lâk hun chu guatsa ahi tai.