HOSEA 11 - PATHIAN LEKHABU THIANGTHO (BSI)

Israel Kipakna Châng Hetlo’na Chung ah le Pathian Khawtuana

¹ Israel chu naupang a hilai khan ka hepi ah, Aigupta ah kipat in ka chapa chu ka kodok tai.

² Ka hâ ko po leh ei gamlat diak un; Baalte kiang in a kithawi zing un; milimte kiang in gimtui a lân zing nalai ui.

³ Ephraim lamzawt dan hil chu la keima ka hi’ngal a; ka khut in amau ka kaibât ah; amau in la ka sukdam ahi lam uh a hepuau hi.

⁴ Mihingte lainatna khau hual leh hepina khau lom in amau ka pui ah, nausen a biang chawp piak ding ah vak domsângte gual chu ka hi. Amau bânpha’n ka kûn suk ah, a nêk ding uh ka piai.

⁵ Aigupta gam ah kile’kit intiu in, ka kiangah a hung kile’kit nop lo ziak un, Assuria chu a lengpau hung hi’n a.

⁶ A khawpi sung un chemjam kilek intin, amau thuhil thiampute chu that gam in au; a lemguatnau ziakin val zo in au.

⁷ Ka mite chun ei nutsia gua’n a kiheimang tau hi. Chungnung Penpa chu ko maleu, ama’n a phong ding diak puai.

⁸ Aw Ephraim, bangti’n hun haisan thei ding ka hem? Aw Israel, bangti’n hun pedok thei ding ka hem? Admah gual ah bangti’n hun siam thei ding ka hem? Zeboim gual ah bangti’n hun bawl thei ding ka hem? Ka sung ah hin ka lungchang a kitum in, ka khawtuana a nasa’n, a thûk ma ma hi.

⁹ Ka lungnatna huaisia tak chu mualsua pua’ng ka tin; Ephraim susia kit pua’ng ka; mihing hilo in Pathian nangmau lak ah, Thiangthopa chu ka hi’ngal a. Chuleh, lungna kawm inle hung lo ding ka hi.

¹⁰ Sakeibaknei gual ah kitum Lalpa chu hun zui ta’n au; a hung kitum phat leh a chate chu, tumlam ah kipat in lau ah kithing kawm in hung in au.

¹¹ Aigupta gam ah kipat vacha gual ah kithing kawmah hung in, Assuria gam ah kipat in vakhu gual in hung in au; amau In chiat un pui kit ing ka, Lalpa chun a tii.

¹² Ephraim in zuau thu’n ei ûm kîmvêl un, Israel Inkuan in dawha’n ei ûm ui; himaleh, Judah vang Pathian tawh a kiton in, Thiangtho Pa â dingin a ginum nalai hi.